Read Yimchungru Naga Thrün 18 Bible Online

Thrün 18 - Yimchungru Naga bible

Thrün 18

¹Animuro api khimyam ripit ki binde alachoki, Mamre arüngako sangdungbo thüninde ATUNGPUH ju Abraham ki akhiuk.

²Abrahamnü abinkih-a kheah tüsho mihtsürü 3 aphüni zhipde ngü, küyimki apinü arü ngükheanü arü shorupü apinü khimyam ripit kinü niokheamde yü tüsho alo kheak khukning,

³tüsho apinü tha, “I tungpuh, muzhobah I hode düyü.

⁴Muzhobah ke anikhüh lude arübah nü jing müsühshang, tüsho sangdung khüp nü sühakhimang.

⁵Tüsho kheakü nü I yam ching arüa lah, inü nü kilim yikhap khürü lude aranü, junangde nü mulong kinglobah. Jushu nü limro ching yüang.” Tüsho arünü tha, “Nünü athakhi nangde rhimoang.”

⁶Jumonü Abrahamnü Sara kilim khimyam ching niokheamde yü tüsho tha, “Nahdang, ayikangkang atsüdak atüm 3 luang tüsho neambah yikhap nunga takjang.”

⁷Abrahamnü moshi boto kilim alihde yü, tüsho moshi nunu atsübe lubah yamlarü kilim jih, tüsho apinü ju mozümodopü chithsa.

⁸Jumonü apinü mozümodokhi shihkingkung le niuhke tüsho moshi nunu lubah arü miki zojih; tüsho arü tsühde alachoki sangdung khüp arü ki api zhip.

⁹Judüki arünü api ki tha, “Nü niube Sara küching la?” Apinü alo, “Khimyam ching lah.”

¹⁰Tüsho apinü tha, “Tsükjide inü shikam hadüchoki kim ching nü kilim alode arübah, tüsho nü niube Sara tsührü khülang labah.” Tüsho Saranü api dunglim lakhi khimyam ripit kinü anide alakheah.

¹¹Abraham le Sara büne shina, tüsho kam hihde alakheah, tüsho khungarü lapü thsüde Sara kam hoa lakheah.

¹²Jumonü Saranü lümakheahbah anihbe zangrü müne, “I tüsho I tungpuh shinabahbah shih asühkhi lanahki du?”

¹³Tüsho ATUNGPUHNÜ Abraham ki tha, “Tümü thsükhi Saranü münede athakhea, ‘Tümütüsho I shina lale, I tsükjide khungarü laba de?’

¹⁴ATUNGPUH thsungkheaknü tümükhüh khide chakla de? Münchikhi kim ching shikam I nü kilim alode arübah, tüsho Sara tsührü khülang labah.”

¹⁵Sara trede alakheah, jumonü anihbenü arochihde tha, “Inü mümüne.” Tüshe apinü tha, “Yung, nünü münedo.”

¹⁶Judüki mihtsürübonü ju kheaknü wusu tüsho Sodom limpeang kheah, tüsho limro bea dükhepü Abraham arü lung yü.

¹⁷Tüsho ATUNGPUHNÜ tha, “Inü tümü rhimopü lanü Abraham kheaknü aramba de?

¹⁸Tümütüsho tsükjide Abraham ato tüsho sühmüh lakhi trükshih khülang kambah, tüsho lomi trükshih alala api kheaknü müngühmühibah.

¹⁹Tümüde inü api mokhit, ju hode arünü alim tüsho thiyuro rhimopü ATUNGPUH limro zopü api tsührübo tüsho api dunglim ayamkhün ki apinü thiyukhüm jihbah, junangde apinü anihbuh ki alokhikhi lüpdükhi Abraham thsungkheak rhimobah.”

²⁰Tüsho ATUNGPUHNÜ tha, “Tümütüsho Sodom tüsho Gomorra azhihde azhikhi tüsho arü neak tode lah,

²¹arü azhihde azhikhi inü asokhi atsütsü a shi yungnü ayimkhitpü I kheakü yükibah.”

²²Judüki mihtsürübo ju kheaknü rholo tüsho Sodom limpeang yü, tüshe Abraham a ATUNGPUH miki zhip.

²³Abrahamnü thüninde arü tüsho tha, “Nünü thiyuro-lungkirü she mihbukmuyukrü lung dükheakshihba de?

²⁴Kiuto ching ju thiyurolungkirü thünim lakhülaa; nünü ju dangpung thiyuro-lungkirü thünim dünkheaknü aningshihba shi?

²⁵Thiyuro-lungkirü ju mihbukmuyukrü lungnü alaksahpü nü kheaknü limshuang, jude thsüsho thiyurolungkirü ju mihbukmuyukrü nangde akambah; ju nü kheaknü limshuang! Alomi alala mahkhaprünü alim mürhimobea de?”

²⁶Tüsho ATUNGPUHNÜ tha, “Inü Sodom ching thiyuro-lungkirü thünim ngüsho, arü thsülimnü kiubüm lashihbah.”

²⁷Abrahamnü alo tüsho tha, “Kheakü I asungthulung tüsho awahnü mulong tode ATUNGPUH ki asukchoh:

²⁸Mürangkhüh thiyuro-lungkirü thünim kheaknü phüngü nükde lakhülaa; phüngü mülamonü nünü kiuto alala dükheakshihba shi?” Tüsho apinü tha, “Ju ching yirükheak phüngü ngükhülaa, inü ju müdükheakshih.”

²⁹Judüki anihbuhnü api ki alochode tha, “Mürangkhüh ju ching yirü ngükhülaa küde?” Tüsho apinü tha, “Inü yirü thsülimnü ju mürhimo.”

³⁰Tüsho apinü tha, “ATUNGPUH bukdakhiuk shi, tüsho inü asukanü: Mürangkhüh ju ching samrü ngükhülaa?” Tüsho Apinü alo, “Inü ju ching samrü ngüsho ju mürhimo.”

³¹Judüki apinü tha, “Kheaküshe inü mulong tode ATUNGPUH ki asukchoh: Mürangkhüh ju ching muku ngükhülaa küde?” Tüsho apinü alo, “Muku thsülimnü inü ju müdükheakshih.”

³²Apinü tha, “ATUNGPUH bukdakhiuk, tüsho inü khülang ki asukbah: Mürangkhüh ju ching thürü ngükhülaa küde?” Tüsho apinü alo, “Thürü thsülimnü inü ju müdükheakshih.”

³³Jumonü apinü Abraham ki asukachih kheam yanalünde ATUNGPUHNÜ api limro ching yü; tüsho Abrahamnü api lapung lim alode yü.