Read Yimchungru Naga Thrün 19 Bible Online

Thrün 19 - Yimchungru Naga bible

Thrün 19

¹Yunirü 2 arelim Sodom ching arü, tüsho Lot ju Sodom chipiripit ki zhipde alakheah. Küyimki Lotnü ane ngükheanü, apinü ane shorupü wusu, tüsho amiro alo lim kheahbah khukning.

²Tüsho apinü tha, “Kheakü aniang, O I tungrübo, muzhobah nüsa yamlarü yam ching arang tüsho azhing ching binkheambah nüsa jing müsühang; jushu nüsa mükikde asürang tüsho nüsa limro ching yüang.” Tüsho arünü tha, “Muh, isa azhing ching wungdophulung binbah.”

³Tüshe apinü reangkih; jumonü arünü api kilim rholo tüsho anihbuh yam ching yüzah. Jushu apinü arü khilim tsühyungpü mozümodojih, phaüm muyukkhi yikhap nung tüsho arünü tsüh.

⁴Arü ayappü müngüh Sodom kiuto amühit aban chingnü athunurü tüsho azorü mihtsürü alalanü thüyam zündo.

⁵Arünü Lot ki ji, “Khihre nü yam ching arükhi mihtsürübo kükheak la? Arübo isa kilim bede akhiukang, junangde isanü arü kheak müzammürambah.”

⁶Jumonü Lotnü ripit limronü arü kilim wukhiukbah adunglimnü khimdopü rih,

⁷tüsho tha, “I keoniorübo, muzhobah mihbukmuyukde dürhimo!

⁸Kheakü kheahang, athrürü mübetsühkhi I tsührübe mahne lah; inü ane nüsa kilim bede akhiukanü tüsho nüsanü ane kheak nüsa künkhi rhimoang; harü mihtsürü kheak tümü düthsü, tümütüsho arü I yamme khüp azahdo.”

⁹Tüsho arünü tha, “Isa limro chingnü akhinang.” Arünü tha, “Habuh tsotsahde arü, tüsho apinü mahkhaprü thsüchoh; kheakü isanü arü kheaknü api ki amütsübe rhimobah.” Jumonü arünü Lot kheak müküpde nimkih, tüsho khimdopü thsümünimpü thüninde arü.

¹⁰Tüshe mihtsürübonü arü khah chunga yüshih tüsho arü kilim Lot thoa lu, tüsho khimdopü rih.

¹¹Tüsho arünü thüyam ripit limro kheak larü anini tüsho ato chido mük tukshihpünü shik, junangde arünü khimdopü müyimkhit.

¹²Judüki mihtsürübonü Lot ki tha, “Nü lung ha ching khürü la shi? Tsühmeakrü, nü tsührübo, nü tsührübebo, yungsho ha kiuto ching betsührü khürü lasho, arübo ha dangpung chingnü bekhitang!

¹³Tümüde isanü ha dangpung dükheakshihbah, tümütüsho arü azhihde azhikhi ATUNGPUH miki tode kamdo, tüsho ATUNGPUHNÜ ju dükheakshihpü ike arüshihkheah.”

¹⁴Jumonü Lotnü wukhiuk tüsho atsührübebo lurü api tsühmeakrübo ki tha, “Asürang, ha dangpung chingnü wukhiukang; tümüde ATUNGPUHNÜ ha kiuto dükheakshihbah!” Tüshe apinü keangrüchoh de atsühmeakbonü lüm.

¹⁵Küyimki ayinkhikheanü, yunirübonü Lot ki niokheampü tha, “Asürang, nü niube le nü tsührübe mahne ha ching lakhi bea lung, jude yungsho kiuto thsümüchikhi ching nüsa aniuabahbah.”

¹⁶Api nihnihde alachoki, mihtsürünenü api khah, aniube khah, tüsho atsührübe mahne khahbo kheak, ATUNGPUHNÜ api ki amüthsüm lade tholo, tüsho anenü api bekhit tüsho kiuto aleanglim zojih.

¹⁷Anenü arü bekhit akede, khülangnü api ki tha, “Nü rhangdung thsungkheak tsokhiang! Nü dunglim rholoa dükheah yungsho adükhün küching she dütuklo. Awungbo ching tsokhide yüang, jude yungsho nü dükheakbah.”

¹⁸Lotnü ane ki tha, “Muzhobah düh, I tungrübo!

¹⁹Kheakü nüsa yamlarü nüsa miki amuzho ngüdo, tüsho I rhangdung khümkhitkhi huhde nüsanü amüthsüm alü kamshihdo; inü awungbo ching tsokhide müyükhuk; ha thsümütsünü I yanphuhbah tüsho I ashebah.

²⁰Kheahang, ha kiuto tsokhide ayüpü phünide lah tüsho ju aninikhüh ah; muzhobah I ju ching tsokhide yüanü (ju aninikhüh yung de?) tüsho I rhangdung labah.”

²¹Tüsho apinü anihbuh ki tha, “Khide tsülah, inü ha she amülüjihbah; nünü athakhi kiuto inü müdükheakshih.

²²Niokheamang, ju ching tsokhide yüang. Tümüde nü ju mukhiungyikia inü tümü she müthsükhuk.” Jumonü kiuto ki ju Zoar de ajikheah.

²³Lot Zoar khiungchoki alomi kheak ani akhiuka lakheah.

²⁴Judüki ATUNGPUHNÜ molung tüsho mo thüning chingnü Sodom tüsho Gomorra kheak akishih.

²⁵Hanangde apinü kiutobo, adükhün alala, kiuto ching larü alala, tüsho alo kheak mukhuhkhi yüngthrüm.

²⁶Tüshe Lot niubenü dunglim rholoa kheah, tüsho alibe thimi dungto kamabah.

²⁷Yapsu mükikde Abraham asürü tüsho ATUNGPUH miki zhipkhi dangpung api yülo.

²⁸Apinü Sodom tüsho Gomorra adükhün lomi alala lim abina kheah, tüsho morimoto chingnü mokhüh akhiukkhi nangde alomi chingnü mokhüh alükde ayükihkhi ngü.

²⁹Junangde küyimki Thrünpuhnü adükhün kiutobo alala thsümünimkheanü, apinü Abraham, tüsho kiutobo yüngthrümkhi chingnü abekhitkhi Lot lümkhit.

³⁰Lot tüsho atsührübe mahne Zoar bahbah tso, tüsho awungbo ching la, tümüde apinü Zoar ching lapü tre. Api le atsührübe mahne lungkhün ching la.

³¹Nimung khülang atsührü adüjibenü akheambe ki tha, “Ike abuh shina lah, tüsho alomi alala ching yakli lakhi nangde ike kheak müyambah tsührü lapü thsüde athrürü she müla.

³²Arang, ikenü ike abuh yukhu yungshihanü tüsho api ki yapanü, junangde api mung jimulopü tsührü labah.”

³³Jumonü anenü ane abuh ju re yukhu duh. Tüsho adüjibenü yübah abuh lung yap, tüsho alibe küyimki yapkhea tüsho küyimki wusukheanü apinü mümükheah.

³⁴Ashidopü adüjibenü akheambe ki tha, “Yishih I buh lung I yapkheah; ikenü khihre she api yukhu yungshihanü, tüsho nü yübah api lung yapang, junangde ikenü ike abuh mung jimulopü lashihbah.”

³⁵Jumonü anenü ju re she ane abuh yukhu duh, tüsho akheambe yübah api lung yap, tüsho alibe küyimki yapkhea tüsho küyimki wusukheanü apinü mümükheah.

³⁶Junangde Lot tsührübe ane chido ane abuh hode khungarü lakheah.

³⁷Adüjibenü athrürü zübe tüsho api mung Moab de ji; khihni khiungde api ju Moabrü abuh ah.

³⁸Akheambenü she athrürü zübe tüsho api mung Ben-ammi de ji; khihni khiungde api ju Amon mihtsürü abuh ah.