Read Yimchungru Naga Thrün 2 Bible Online

Thrün 2 - Yimchungru Naga bible

Thrün 2

¹Hanangde thüningbo le alomi tüsho ju ching lakhi alala akhik thsü.

²Thrünpuhnü rhimode arükhi nimung thüne nipü arün thsü, tüsho api rhimo alala chingnü thüne nipü sühakhim.

³Jumonü Thrünpuhnü nimung thünepü ju müngühjih tüsho tsangkhit, tümütüsho Thrünpuhnü thründe arükhi rhimo alala chingnü ha nimung apinü sühakhim.

⁴Ha ATUNGPUH Thrünpuhnü alomi tüsho thüningbo thrün nimung thrünkhi thüning tüsho alomi yukhean,

⁵ju alomi ching thulu sangrung tüsho thulu ching rim tümü mümukhuhyi. Tümüde ATUNGPUH Thrünpuhnü alomi kheak tsüng marüshih, tüsho alo wochakpü mihtsürü mülade alakheah;

⁶tüshe alomi chingnü shumuliu wutu tüsho alo alala pangshih.

⁷Tüsho ATUNGPUH Thrünpuhnü alo asungthulungnü mihtsürü kamshih, tüsho api nupung ching rhangdung sheak mütyukjih, tüsho mihtsürü ju rhangdung lakhi khülang kam.

⁸ATUNGPUH Thrünpuhnü Eden ching aniakhiuklim peang shahwün khülang thsü, tüsho ju ching apinü akamshihkhi mihtsürü lashih.

⁹Tüsho ATUNGPUH Thrünpuhnü alo chingnü tsühyungbe jaktsükhi sangdungbo mukhuhshih. Shahwün phulung ching rhangdung sangdung tüsho atsü amütsü mükheahbe sangdung she alakheah.

¹⁰Shahwün ching ke duhshihpü ayung khülang Eden chingnü bukkhitshih; tüsho ju kheaknü chamnakde ayung phüyi kamshih.

¹¹Akhuhbe mung ju Pishon, hanü suna lakhi Havila lomi alala mükamde bukchoh.

¹²Suna müthsün, arhümthüneabe tüsho shotolungbo ha lomi ching lah.

¹³Mahnepü ju Gihon, hanü Kush lomi alala mükamde bukchoh.

¹⁴Mahsampü ju Tigri, ha Asiria aniakhiuklim bukchoh, tüsho aphüyipü mung ju Euphra.

¹⁵ATUNGPUH Thrünpuhnü mihtsürü ju bedarübah Eden shahwün ching wochakshihpü tüsho aneakpü zojih.

¹⁶ATUNGPUH Thrünpuhnü mihtsürü ki thiyukhüm jihde tha, “Shahwün ching sangdung aban kheaknü nünü atsühpü kuklah;

¹⁷tüshe atsü le amütsü mükheahbe sangdung kheaknü nünü mütsühbeah; tümüde küpü nimung nünü ju tsühbanü dükde nü ashebah.”

¹⁸ATUNGPUH Thrünpuhnü tha, “Mihtsürü ju zangrü lapü mütsü; inü api thsungkheak athülün arungrü khülang thrünjahnü.”

¹⁹Jumonü ATUNGPUH Thrünpuhnü shiwüh le wuhnubo alala alonü kamshih, tüsho arü mung jishihpü Adam kilim bedarü; tüsho Adamnü rhangdung lakhi loriloko aban tümü jikheanü ju arü mungbo kam.

²⁰Jumonü Adamnü shiwüh tüsho wuhnubo alala mung jijih, tüshe Adam thsungkheak athülün arungrü müngüde alakheah.

²¹Judüki ATUNGPUH Thrünpuhnü Adam ju yapshede yüshih; api kheaknü rheangro khülang yihkhit tüsho ju shihtsünü müjimdojih.

²²ATUNGPUH Thrünpuhnü mihtsürü kheaknü ayihkhitkhi rheangronü aliberü khülang thrün tüsho alibe ju mihtsürü kilim bedarü.

²³Judüki Adamnü tha, “Kheakü ha I ro chingnü ro, tüsho I shih chingnü shih; anihbe ki aliberü de ajibah, tümütüsho anihbe ju athrürü kheaknü yihkhit.”

²⁴Jumonü athrürünü nihbuh abuh tüsho abe zojihbah niuberü lung thsürua labah, tüsho ane shihphü khülang kambah.

²⁵Tüsho mihtsürü le aniube büne machihachihde bünkeang lakheah.