Read Yimchungru Naga Thrün 20 Bible Online

Thrün 20 - Yimchungru Naga bible

Thrün 20

¹Kheakü Abraham ju chingnü hantsahde Negeb lomi lim yü, tüsho Kadesh le Shur dükeak la; tüsho Gerar ching lacholade alakheah.

²Abrahamnü aniube Sara dünkheak tha, “Alibe I niurü ah.” Tüsho Gerar kiulongthsüpuh Abimeleknü thiyia yüshihbah Sara bea lu.

³Tüshe azhing milim ching Thrünpuh Abimelek kilim arü, tüsho tha, “Nü ashebah, tümütüsho nünü ha liberü ludo; anihbe arhangkhi liberü ah.”

⁴Tüshe Abimeleknü alibe müthünin; tüsho apinü tha, “ATUNGPUH , nünü amülim mülakhi trükshih she adükheakshihba de?

⁵Apinü, ‘I niurü ah’ de athakhi yung de? Tüsho alibenü she aküdah thsüde tha, ‘Api I khiung ah.’ Ha inü I lümkhi müsühde tüsho I khah müsühde arhimokheah.”

⁶Thrünpuhnü milim ching api ki tha, “Am, nü lümkhi müsühde arhimokheah de inü amükheahmonü, I azhihde inü nü neak müyihbeakshih. Jumonü inü nünü alibe müqiushih.

⁷Kheakü jumonü mihtsürü niube jihloang; tümüde api wukihrü ah, tüsho apinü nü thsungkheak tamkhüntamnüjihbah tüsho nü alabah. Tüshe nünü anihbe müjihlosho, tsükjide nü le nü mihtsürü alala shebah de mükheahang.”

⁸Jumonü Abimeleknü yapsu mükikde asürübah api yamlarübo alala ji tüsho arünü sode harü alala tha; tüsho mihtsürübo khide tre.

⁹Abimeleknü Abraham ji tüsho api ki tha, “Nünü isa ki tümü rhimokhea? Inü nü ki tümü amülim rhimokhi nünü I tüsho I kiulongthsü kheak neak ato hande arükhea? Nünü I ki amürhimobe rhimodo.”

¹⁰Abimeleknü Abraham ki tha, “Amütsan tümü labah nünü ha rhimokhea?”

¹¹Tüsho Abrahamnü alo, “Tümütüsho atsütsünü ha dangpung ching Thrünpuh trekhi müla, tüsho arünü I niube dünkheaknü I laksahbah de inü lüm.

¹²Tüshe atsütsü anihbe I niurü ah. Alibe I buh tsührü ah, tüshe I be tsührü yung; tüsho anihbe I niube kamkheah.

¹³Tüsho küyimki I buh yam chingnü I Thrünpuhnü I tsahkhitshihkhea, inü alibe ki tha, ‘Nünü ha I ki amuzho huhang: isa yükhi dangpung aban ching, “Api I khiung ah” de thaang.’”

¹⁴Judüki Abimeleknü namfimihnu, moshipungbo, tüsho athrürü le aliberü yamlarübo Abraham kilim jih; tüsho apinü aniube Sara anihbuh kilim jihlo.

¹⁵Tüsho Abimeleknü tha, “Kheahang, I lo nü müngüh lah; nünü akünkhi ching laang.”

¹⁶Jushu Sara ki apinü tha, “Kheahang, nü lung lakhi alala miki nü amülim müla de mütsanpü inü nü khiung kilim shotoyinchi 1000 jihchoh; nünü amülim tümü mürhimo de alalanü amükheahbah.”

¹⁷Abrahamnü Thrünpuh ki tamkhüntamnü, tüsho Thrünpuhnü Abimelek, aniube le azhorü liberübo thsüngu, junangde arübo tsührü lalokhuk,

¹⁸tümüde ATUNGPUHNÜ Abraham niube Sara dünkheaknü Abimelek yamkhün ching nuyam aban yihdojih-a lakheah.