Read Yimchungru Naga Thrün 21 Bible Online

Thrün 21 - Yimchungru Naga bible

Thrün 21

¹Apinü athakhi nangde ATUNGPUHNÜ Sara rhua kheah, tüsho apinü alokhikhi nangde ATUNGPUHNÜ Sara thsungkheak rhimo.

²Tümüde Thrünpuhnü api ki akhukhi kim ching Sara mübünkeangde kam, tüsho Abraham anihbuh ashinbuhrü lachoki tsührü khülang zübejih.

³Tüsho Saranü api kilim zübejihkhi atsührü mung Abrahamnü Isak de ji.

⁴Judüki Thrünpuhnü api ki thiyukhüm jihkhi nangde atsührü Isak nimung tizheah bankhitchoki Abrahamnü tsütabah.

⁵Isak zübechoki Abraham kam 100 azorü lakheah.

⁶Tüsho Saranü tha, “Thrünpuhnü I kilim amünepü hande arüjih, tüsho ha dünkheak sorü abannü I ki münejihbah.”

⁷Alibenü tha, “Saranü tsührü khülang mütrübah de Abraham ki shepünü thaa laba? Tütüshe inü anihbuh ashinbuhrü kamchoki api kilim tsührü khülang zübejihdo.”

⁸Khungarü ju zode arü tüsho niuh cham, tüsho Isak niuh cham nimung Abrahamnü thünio ato khülang thsakham.

⁹Tüsho Ijiprü Hagarnü Abraham kilim zübejihkhi azürü ju apheanaleangde Saranü ngü.

¹⁰Jumonü alibenü Abraham ki tha, “Ha azhorü liberü tüsho anihbe tsührü yankhita bahang; tümüde ha azhorü tsührünü I tsührü Isak lung yamrüplurüp mulushih.”

¹¹Tüsho atsührü dünkheaknü Abraham khide masühde alakheah.

¹²Tüshe Thrünpuhnü Abraham ki tha, “Azürü tüsho nü yo azhorü liberü dünkheaknü nü masühde düla. Saranü tümüpürü nü ki thadünü, anihbe yu aniang; tümütüsho Isak hode inü alokhikhi nü tsühsoniusobo labah.

¹³Tütüshe inü azhorü liberü tsührü she trükshih khülang kamshihbah, tümütüsho api nü müjih ah.”

¹⁴Jumonü Abrahamnü yapsu mükikde asürü, tüsho yikhap le shihküp-keluh lubah Hagar dubuh kheak yihkihjih tüsho azübuh ju bebah thiyia tsoshih. Alibenü chamachih tüsho Beersheba sunglo ching rümde tsah.

¹⁵Küyimki shihküp-keluh ching yo ke bankhea, alibenü azübuh ju sangrung khülang khüp zojih.

¹⁶Tüsho alibenü limthrip 100 bande yübah bin, tümüde anihbenü lüm, “Inü azübuh shekhi mükheahkhuk.” Alibe ju ching binchoki atrippü tankih.

¹⁷Tüsho Thrünpuhnü azübuh tripkhi so. Judüki Thrünpuh yunirünü yinmi chingnü ji tüsho tha, “Hagar, nü tümü thsüa la? Dütre, tümüde azübuh kükheak lanü Thrünpuhnü api düsheak sodo.

¹⁸Asürübah azübuh shuhmusuang tüsho nü khahnü shuhang, tümüde inü api trükshih ato khülang kamshihbah.”

¹⁹Thrünpuhnü alibe mükbo khimshuhjih, tüsho kekhip khülang ngü. Alibenü yübah shihküp-keluh ching ju ke yuk, tüsho azübuh ju yungshih.

²⁰Junangde azübuh lung Thrünpuh lakheah; api zode asürü tüsho sunglo ching lade sanglüh-kiprü khülang kam.

²¹Api Paran sunglo ching la; tüsho abenü Ijip lomi chingnü aniube lujih.

²²Ju kim ching Abimelek tüsho api bonungrü limthobuh Phikol anenü Abraham ki tha, “Nünü arhimokhi lüpdükhi ching Thrünpuh nü lung lah.

²³Jumonü kheakü, I le I tsührü yungsho I tsühsoniusobo kheak mülimde mürhimopü I ki thiyuchihchimang. Nü hanrü thsüde alakhi lo ching inü nü ki huhkhi nangde I tüsho alomi ki amuzho huhang.”

²⁴Abrahamnü tha, “Inü thiyuchihchimbah.”

²⁵Judüki Abimelek yamlarübonü kekhip khülang jangkhikhi dünkheaknü Abrahamnü Abimelek ki atsang.

²⁶Tüsho Abimeleknü tha, “Ha shenü arhimokheanü inü mümükheah; nünü I ki mütha, yungsho khihni khiungde inü ju muso.”

²⁷Jumonü Abrahamnü namfimihnu tüsho moshipungbo lubah Abimelek kilim jih, tüsho anenü thiyuchihchim thsü.

²⁸Abrahamnü mihnu boto chingnü namfimihnunu dre 7 büthsüde zo.

²⁹Abimeleknü Abraham ki keokhi, “Namfimihnunu 7 nünü büthsüde azokhi ha amütsan tümü a?”

³⁰Tüsho apinü alo, “Nünü harü namfimihnunu 7 I khah chingnü alubah, junangde ha kekhip inü akiukheah de jurünü thiyumütsan thsübah.”

³¹Jumonü apinü ju dangpung ki Beersheba de ji, tümütüsho anenü ju ching thiyuchihchim thsü.

³²Hanangde anenü Beersheba ching thiyuchihchim thsü dunglim Abimelek tüsho api bonungrü limthobuh Phikol ane Filistia lomi lim alode yü.

³³Abrahamnü Beersheba ching tamarisk sang khülang khim tüsho ju ching apinü akheam müla Thrünpuh, ATUNGPUH mung ji.

³⁴Tüsho Abrahamnü Filistia lomi ching kim ashang tsotsahde la.