Read Yimchungru Naga Thrün 23 Bible Online

Thrün 23 - Yimchungru Naga bible

Thrün 23

¹Sara rhangdung lakhi kam 127 lakheah.

²Sara Kanan lomi Kiriath-arba (ju Hebron) ching sheabah, tüsho Abrahamnü Sara thsungkheak tüzhopü tüsho mitrippü yü.

³Judüki Abrahamnü aniube shea lakhi rheang kinü wusu tüsho Hitrü ki tha,

⁴“I khiungkerü ah tüsho nüsa bolung tsotsahrü ah. I kilim alo khürü yinjang, junangde inü I niube kiuyuka bahanü.”

⁵Hitrünü Abraham ki alo,

⁶“Isa ki aniang, atungrü: nü isa bolung sühmüh lakhi limberü khülang ah; isa mibahpung amokhitkhi ching nü yo ashemi kiuyuka bahang. Nü yo ashemi kiuyuka bahpü thsüde isa shepü shepünü she nü kilim mibahpung asühde ajihbah.”

⁷Judüki Abrahamnü zhip tüsho lomi mihtsürü, Hitrü miki mükhüm,

⁸tüsho tha, “Nüsanü I yo ashemi kiuyuka bahshihpü mulonglasho, I thsungkheaknü nüsanü Zohar tsührü Ephron ki keojang,

⁹junangde apinü anihbuh lu akheam kheak lakhi Makpela lungkhün I ki yinjihbah. Nüsa bolung mibahpung thsüpü thsüde I ki adün khiukde ayinjihpü keojang.”

¹⁰Mihtsürü bolung Hitrü Ephron bina lakheah tüsho anihbuh kiuto chipiripit ki arüa lakhi Hitrü alalanü sode apinü Abraham ki alo,

¹¹“Yung, I tungpuh, I ki aniang; inü thulu tüsho ju ching lungkhün nü kilim jihchoh, inü ju I mihtsürübo mikinü nü kilim jihchoh. Nü yo ashemi kiuyuka bahang.”

¹²Kheaküshe Abrahamnü lomi mihtsürü miki mükhüm,

¹³tüsho arünü sode Ephron ki tha, “Nünü ajihpü lasho, muzhobah I ki aniang. Inü thulu thsungkheak nü kilim sho jihbah; I kilimnü ju luang tüsho inü I yo ashemi ju ching kiuyuka bahbah.”

¹⁴Tüsho Ephronnü Abraham ki alojihde tha,

¹⁵“I tungpuh, I ki aniang; alo ju shotoyinchi nak 400 dün ah, ike dükeak tümü la? Jumonü nü yo ashemi kiuyuka bahang.”

¹⁶Abrahamnü Ephron ki ani; tüsho Hitrünü sode anihbuhnü athakhi nangde Abrahamnü shothsümolorü amünchi adünbe ayannü shotoyinchi nak 400 adüna Ephron kilim jih.

¹⁷Jumonü Mamre phüni Makpela ching Ephron lu, thulu tüsho lungkhün chido, tüsho thulu ching sangdung alala alungkinü adüngakhi thsüa,

¹⁸kiuto chipiripit ki arükhi Hitrü alala mikinü Abraham kukruk thsüpü jih.

¹⁹Ju dunglim Abrahamnü aniube Sara Kanan lomi ching Mamre müngüh (ju Hebron) Makpela ching lakhi lungkhün ching kiuyukabah.

²⁰Junangde thulu tüsho ju ching lungkhün ju Hitrünü adüngakhi thsüa mibahpung thsüpü Abraham kilim jih.