Read Yimchungru Naga Thrün 27 Bible Online

Thrün 27 - Yimchungru Naga bible

Thrün 27

¹Küyimki Isak ashinbuhrü kamkheanü, api mükbo thrimthrimde müngükhukde, apinü atsührü azopü Esau ji, “I tsah-a.” Tüsho apinü alo, “I ha ching lah.”

²Tüsho apinü tha, “Kheaküa I shina lah tüsho I ashepü nimung inü mümükheah.

³Jumonü kheakü muzhobah nü thsühnukbo, hühzopung tüsho sanglüh luang, tüsho mükeak ching I khilim shih yanang.

⁴Tüsho I khilim tsühyungpü akebe, inü akünkhi mozümodobah lude arang, junangde inü atsühbah tüsho I müsheyide inü nü müngühjihbah.”

⁵Kheakü Isaknü atsührü Esau ki thachoki Rebekanü anide alakheah. Tüsho Esaunü shih laksah-a lubah arüpü mükeak ching yü.

⁶Jumonü Rebekanü atsührü Jakob ki tha, “Nü buhnü nü khiung Esau ki thakhi inü sodo,

⁷‘I kilim shih laksah-a lude arang tüsho tsühyungpü akebe mozümodoang, junangde inü tsühbah I müsheyide ATUNGPUH miki nü müngühjihbah.’

⁸Jumonü I tsah-a, inü nü ki thiyukhüm jihkhi yande nünü mihyuaniang.

⁹Kheakü mihnu boto lung yübah amokhitkhi anunu 2 I kilim lubah arang, tüsho apinü akünkhi nangde inü jurünü nü buh khilim tsühyungpü akebe mozümodobah.

¹⁰Jushu nünü ju nü buh kilim lude yübah apinü atsühbah, tüsho api müsheyide nü müngühjihbah.”

¹¹Tüsho Jakobnü abe Rebeka ki tha, “Kheahang, I khiung Esau a nam kihkhi mihtsürü ah, tüsho I a küp-shahshahkhi mihtsürü ah.

¹²Khükia I buhnü I qiubah, tüsho I ju api mülapyukrü nangde alabah; tüsho inü müngühmühi yungde muthrumünean I kheak hande arübah.”

¹³Tüshe abenü api ki tha, “Nü muthrumünean I kheak lashang, I tsah-a; I yu lang aniang, tüsho yübah jurü I kilim lude arang.”

¹⁴Apinü yü tüsho jurü yima lubah abe kilim arü, tüsho abuhnü akünkhi nangde abenü tsühyungpü akebe mozümodo.

¹⁵Jushu Rebekanü atsührü azopü Esau khimmih amokhitkhi thüyam ching anihbe ki lakhi lu, tüsho jurü atsührü akheambuh Jakob kheak khümjih.

¹⁶Tüsho alibenü mihnu nunu küpbo akhahbo le ahung shahshahbo kheak yihkihjih.

¹⁷Jushu anihbenü mozümodokhi tsühyungpü akebe tüsho yikhap atsührü Jakob khah ching yukjih.

¹⁸Jumonü apinü abuh kilim yü tüsho tha, “Abuh”; tüsho apinü alo, “I ha ching lah. Nü shepü a, I tsah-a?”

¹⁹Jakobnü abuh ki tha, “I nü tsührü adüjibuh Esau ah; nünü I ki thakhi nangde inü rhimodo; muzhobah asürübah binang tüsho inü alaksahkhi tsühang, junangde nünü I müngühjang.”

²⁰Tüshe Isaknü atsührü ki tha, “Küde thsah nünü ha nahnahde angükhea, I tsah-a?” Apinü alo, “Tümütüsho ATUNGPUH nü Thrünpuhnü ha I kilim lude arü.”

²¹Judüki Isaknü Jakob ki tha, “Muzhobah I thüninde arang, I tsah-a, junangde nü atsütsü I tsührü Esau a shi yungnü nü muzhua kheahanü.”

²²Jumonü Jakobnü abuh Isak thüninde yü, tüsho apinü anihbuh muzhubah tha, “Düsheak a Jakob düsheak ah, tüshe khahbo a Esau khahbo ah.”

²³Apinü anihbuh mümütsankhit, tümütüsho akhahbo ju akhiung Esau khahbo nangde nambo lakheah; jumonü apinü anihbuh müngühjih.

²⁴Judüki apinü tha, “Atsütsü nü I tsührü Esau a de?” Tüsho apinü alo, “I ah.”

²⁵Isaknü tha, “I kilim thüninde lubah arang, tüsho I tsührünü alaksahkhi inü tsühanü, junangde inü nü müngühjihbah.” Jumonü apinü anihbuh thüninde lude arü, tüsho apinü tsüh; apinü anihbuh kilim yukhu handarü, tüsho apinü yung.

²⁶Judüki abuh Isaknü api ki tha, “Kheakü I thüninde arang tüsho I müthsüpang, I tsah-a.”

²⁷Apinü thüninde arü tüsho api müthsüp; Isaknü api khimmih münimakheah, tüsho api müngühjihde tha: “Tsükjide I tsührü rhüm a ATUNGPUHNÜ müngühjihkhi mütüm rhüm ruk ah.

²⁸Jumonü Thrünpuhnü nü kilim thüning ayinke, alo müdang, tüsho suhdahkhi hi tüsho yukhu jihshang.

²⁹Mihtsürübonü nü tankihshang, tüsho trükshihbonü nü ki mükhümshang. Nü keoniorü alala kurungkheak aputungrü thsang, tüsho nü be tsührübonü nü ki mükhümshang. Nü athrurü muthrumüneanshang, tüsho nü müngühjihrü müngühshang!”

³⁰Isaknü api müngühjihkhambah dunglim Jakob abuh mikinü atso akede Esau shihyankhi chingnü alung.

³¹Apinü she tsühyungpü akebe mozümodobah abuh kilim lude arü, tüsho abuh ki tha, “Abuh asürang tüsho nü tsührünü alaksahkhi tsühang, junangde nünü I müngühjang.”

³²Tüsho abuh Isaknü api ki keo, “Nü shepü a?” Apinü alo, “I nü tsührü adüjibuh Esau ah.”

³³Judüki Isaknü khide ajan tüsho tha, “Shih laksah-a I kilim lude arübuh thsü she a? Nü marüyide inü ju tsühdo tüsho inü api müngühjihdo — tüsho api müngühmühibah.”

³⁴Küyimki Esaunü abuh yubo sokheanü, apinü khide achangnü tripde abuh ki tha, “I she müngühjang, O abuh!”

³⁵Tüshe apinü tha, “Nü niurünü rük thsüde arübah nü müngühmühi lubah tsoabahdo.”

³⁶Tüsho Esaunü tha, “Api mung Jakob de lungkide jia lah yung de? Apinü I ha mahne ki mülapyukchoh: Apinü I zübekhi-alim ludo, tüsho kheakü apinü I müngühmühi ludo!” Apinü keo, “Nünü I thsungkheak müngühmühi khürü aninga muzojih de?”

³⁷Isaknü Esau ki alo, “Inü api ki nü kurungkheak aputungrü kamshihdo, tüsho api keoniorü alala api yamlarü kamshihdo. Inü api kilim hi tüsho yukhu jihdo. Kheakü inü nü thsungkheak tümü müthsükhuk, I tsah-a!”

³⁸Esaunü abuh ki tha, “Abuh, nü müngühmühi khülang lang lade? Abuh I she müngühjang!” Tüsho Esaunü adüsheak achangnü trip.

³⁹Judüki abuh Isaknü alo tüsho api ki tha: “Kheahang, nü lapung ju alo müdang kheaknü, thüning ayinke kheaknü akhinbah alabah.

⁴⁰Nukshang hode nü labah tüsho nünü nü niurü tankihbah, tüshe küyimki nünü azhihde wusubanü api sangkap nü hung kheaknü ayihshakbah.”

⁴¹Jumonü abuhnü api müngühjihkhi dünkheak Esaunü Jakob lungkhangde kam, tüsho Esaunü amulong ching tha, “I buh dünkheak tüzhopü nimungbo thüninde lah; jushu inü I niurü Jakob laksahbah.”

⁴²Tüsho atsührü azopü Esau yubo Rebeka ki thaa lakheah. Jumonü alibenü thiyia yüshihbah atsührü akheambuh Jakob jidarü tüsho api ki tha, “Tsükjide nü khiung Esaunü nü laksahpü lümde anihbuh mulong shukheamlochoh.

⁴³Jumonü I tsaha, kheakü I yu aniang: Tsahmusubah Haran ching I khiung Laban kilim yüang,

⁴⁴tüsho nü khiung bukakhiukkhi mükeamyi khiungde api lung nimung anükhüh,

⁴⁵nü khiung bukakhiukkhi nü kheaknü mutsoyi khiungde, tüsho nünü api ki rhimokhi apinü mümihyi khiungde laang; jushu inü thiyia arüshihbah tüsho nü ju chingnü bedarübah. Tümüde nimung khülang ching nüke chido dükheakshihpü?”

⁴⁶Judüki Rebekanü Isak ki tha, “Esau khiungkerü niuberü dünkheaknü I kipathsükdü lang lah. Jakobnü she harü Hit liberü lukhülaa, I ashekhi atsübe labah.”