Read Yimchungru Naga Thrün 29 Bible Online

Thrün 29 - Yimchungru Naga bible

Thrün 29

¹Jumonü Jakobnü hantsahde yü tüsho aniakhiuklim mihtsürü lomi ching arü.

²Apinü kheah, tüsho thulu ching kekhip khülang ngü; tüsho ju mükamde namfimihnu boto mahsam yapa lakheah; tümüde ju ke chingnü arünü namfimihnu boto ke duhde alakheah. Kekhip mün kheak lung ato khülang lakheah.

³Küyimki namfimihnu boto alala ju ching rukhüh mukhungbanü, namfimihnu neakrünü lung ju kekhip mün kheaknü thülah-a tsoshih tüsho namfimihnubo ke duh. Jushu arünü lung ju kekhip mün kheak hanlode arünü zo.

⁴Jakobnü namfimihnu neakrübo ki keokhi, “I keoniorübo, nüsa küchingnü a?” Arünü alo, “Isa Haran chingnü ah.”

⁵Apinü arü ki tha, “Nüsanü Nahor tsührü Laban mükheahnah?” Arünü alo, “Am, isanü api mükheahlah.”

⁶Jakobnü arü ki keo, “Api tsüde lashi?” Arünü alo, “Am, api tsüde lah,” tüsho arünü tha, “Ha ching atsührübe Rachel namfimihnubo lung arüchoh.”

⁷Apinü tha, “Kheahang, kheaküshe ani achang kihlah; ha namfimihnu boto bemukhungpü kim yung. Namfimihnubo ke duhang tüsho arübo rimlopung ching belode yüang.”

⁸Arünü alo, “Namfimihnu boto alala kitmukhungbah kekhip mün kheaknü lung thülah-a mübahyi khiungde isanü müthsükhuk. Jushu lang isanü namfimihnubo ke duhbah.”

⁹Apinü arü ki thade alachoki, Rachel ju abuh namfimihnubo bebah arü; tümüde alibe namfimihnu neakrü lakheah.

¹⁰Küyimki Jakobnü Laban tsührübe Rachel, tüsho abe akhiung Laban namfimihnubo ngükhea, apinü yü tüsho lung ju kekhip mün kheaknü lah-a bah tüsho akü namfimihnubo ke duh.

¹¹Jushu Jakobnü Rachel müthsüp tüsho achangnü trip.

¹²Apinü anihbuh ju alibe abuh betsührü tüsho Rebeka tsührü ah de Rachel ki tha, jumonü alibenü yübah abuh ki tha.

¹³Labannü aniurü tsührü Jakob dünkheak thiyusheak soakede apinü anihbuh shorupü niokheamde yü. Apinü api kap tüsho müthsüp tüsho api yam ching bede arü, tüsho alala dünjikhi Jakobnü api ki thaa huh.

¹⁴Judüki Labannü api ki tha, “Nü I shih tüsho thiyih ah.” Tüsho apinü anihbuh lung khinu khülang bin.

¹⁵Judüki Labannü Jakob ki tha, “Nü isa betsührü thsümonü nünü akeangnü I tankihba shi? I ki thaang, nü mihkhah dün tümü laba?”

¹⁶Kheakü Laban tsührübe 2 lakheah: adüjibe mung Lea, tüsho akheambe mung Rachel.

¹⁷Lea mük atsü, tüshe Rachel trungdung atsü tüsho akheahakham lakheah.

¹⁸Kheakü Jakobnü Rachel muzho; tüsho apinü tha, “Inü nü tsührü akheambe Rachel dünkheak nü kam thüne tankihbah.”

¹⁹Tüsho Labannü tha, “Alibe ju athrürü püpürü jihpü düna inü anihbe nü jihkhi atsübe ah. I lung laang.”

²⁰Jumonü Jakobnü Rachel dünkheak kam thüne tankih, tüshe apinü alibe muzhokhinü jurü nimung anükhüh nangde alakheah.

²¹Judüki Jakobnü Laban ki tha, “I kilim I niube jihang, tümüde I nimungbo khiungdo, junangde inü alibe lung müyamanü.”

²²Labannü ju dangpung lakhi mihtsürü alala bemukhung tüsho thünio la.

²³Tüshe arelim, apinü atsührübe Lea bea lu tüsho Jakob kilim bedarü jih; tüsho apinü alibe lung müyam.

²⁴Tüsho Labannü ayamlabe Zilpa atsührübe Lea yamlaberü thsüpü jih.

²⁵Küyimki ayinkhikheanü, ju Lea lakheah! Tüsho apinü Laban ki tha, “Nünü I ki rhimokhi ha tümü a? Rachel dünkheak inü nü tankihkhi yung de? Dale tümüde nünü I mülapyukkhea?”

²⁶Labannü alo, “Isa lomi ching adüjirü müngühnü akheamrü rhangshihpü yakzan müla.

²⁷Arhangrü beyukkhi thünio bankhitshang; tüsho nünü kheaküshe kam thüne I tankihpü thsüsho akheambe she ajihbah.”

²⁸Jakobnü jude thsü tüsho anihbe thünio bankhit. Jumonü apinü anihbuh kilim atsührübe Rachel aniube thsüpü jih.

²⁹Tüsho Labannü api yamlabe Bilha atsührübe Rachel yamlaberü thsüpü jih.

³⁰Jakobnü Rachel kheak she müyam, tüsho apinü Lea kheaknü Rachel alü muzho. Tüsho apinü kam thüne Laban tankihlo.

³¹Küyimki Lea mümuzhokhi ATUNGPUHNÜ angükhea, apinü anihbe nuyam khimshuhjih; tüshe Rachel a bünkeangberü lakheah.

³²Jumonü Lea mübünkeangde kambah tsührü khülang zübe, tüsho anihbenü api mung Reuben de ji; tümüde alibenü tha, “ATUNGPUHNÜ tsükjide I küpkhuk ngüdo. Jumonü kheakü I niubuhnü I muzhobah.”

³³Jushu she alibe mübünkeangde kambah tsührü khülang zübe, tüsho tha, “Tümütüsho I mümuzhokhi ATUNGPUHNÜ sodo, apinü I kilim tsührü ha she jihdo.” Tüsho anihbenü api mung Simeon de ji.

³⁴Kheaküshe alibe mübünkeangde kambah tsührü khülang zübe, tüsho tha, “Kheakü ha kim ching I niubuhnü I kheak dakkihbah, tümütüsho inü api kilim tsührü 3 zübejihdo.” Jumonü api mung Levi de ji.

³⁵Tüsho kheaküshe alibe mübünkeangde kambah tsührü khülang zübejih, tüsho tha, “Kheakü inü ATUNGPUH shibah.” Jumonü alibenü api mung Juda de ji. Jushu a anihbe tsührü dapabah.