Read Yimchungru Naga Thrün 30 Bible Online

Thrün 30 - Yimchungru Naga bible

Thrün 30

¹Küyimki Rachelnü Jakob kilim tsührü müzübejihkheanü anihbenü achi lungkhangde kam, tüsho Jakob ki tha, “I kilim tsührübo zübeshang, jude yungsho I ashebah!”

²Jakobnü Rachel azhihde bukakhiuk, tüsho tha, “Nü kheaknü nuyam sokeang tholobuh Thrünpuh müthri I ah düpü?”

³Judüki alibenü tha, “Ha ching I yamlabe Bilha lah, anihbe kheak müyamang, tüsho alibenü I thsung thsüde tsührü zübebah, junangde anihbe hode I tsührübo labah.”

⁴Jumonü alibenü ayamlabe api kilim aniube thsüpü jih, tüsho Jakobnü alibe kheak müyam.

⁵Bilha mübünkeangde kam tüsho Jakob kilim tsührü khülang zübejih.

⁶Judüki Rachelnü tha, “Thrünpuhnü I dünkheak mahkhapdo; tüsho apinü I düsheak she sodo tüsho I kilim tsührü khülang jihdo.” Jumonü alibenü api mung Dan de ji.

⁷Tüsho Rachel yamlabe Bilha kheaküshe mübünkeangde kam tüsho Jakob kilim tsührü mahnepü zübejih.

⁸Rachelnü tha, “Inü I chi kheak tode shochihdo, tüsho inü kukdo.” Jumonü alibenü api mung Naphtali de ji.

⁹Küyimki Leanü anihbe tsührü dapkhi ngükhea, anihbenü ayamlabe Zilpa ju Jakob kilim aniube thsüpü jih.

¹⁰Tüsho Lea yamlabe Zilpanü Jakob kilim tsührü khülang zübejih.

¹¹Leanü tha, “Kuhi atsü ah!” Jumonü alibenü api mung Gad de ji.

¹²Tüsho Lea yamlabenü Jakob kilim tsührü mahnepü zübejih.

¹³Leanü tha, “I asühchoh, tümüde aliberübonü I ki müngühmühi de ajibah.” Jumonü alibenü api mung Asher de ji.

¹⁴Wheat yimlupü kim ching Reuben thulu lim yü tüsho mandrak ngü, tüsho abe Lea kilim lude alung. Judüki Rachelnü Lea ki tha, “Muzhobah nü tsührü yo mandrak anükhüh I kilim jihang.”

¹⁵Leanü alo, “Nünü I niubuh bede atsokhinü musuhdah de? Nünü I tsührü yo mandrak she aluba de?” Rachelnü tha, “Jumonü nü tsührü yo mandrak dün apinü khihre nü lung müyambah.”

¹⁶Küyimki arelim Jakob thulu chingnü alungkhea, Leanü api shorupü wukhiuk tüsho tha, “Nünü I kheak müyambeah, tümüde I tsührü mandrak dün dükde inü nü mulodo.” Tüsho apinü ju re anihbe lung müyam.

¹⁷Thrünpuhnü Lea ki anijih, tüsho alibe mübünkeangde kambah Jakob kilim tsührü aphüngüpü zübejih.

¹⁸Leanü tha, “Thrünpuhnü inü amulokhi dün jihdo, tümütüsho inü I yamlabe I niubuh kilim jih.” Jumonü alibenü api mung Issakar de ji.

¹⁹Judüki Lea mübünkeangde kam tüsho Jakob kilim tsührü athurukpü zübejih.

²⁰Tüsho Leanü tha, “Thrünpuhnü I kilim atsüdak thsambah jihdo; kheakü I yamkhünbuhnü I lung labah, tümütüsho inü api kilim tsührü 6 zübejihdo.” Jumonü alibenü api mung Zebulun de ji.

²¹Ju dunglim alibenü tsührübe khülang zübe, tüsho anihbe mung Dina de ji.

²²Jushu Thrünpuhnü Rachel lümkhit, tüsho Thrünpuhnü anihbe ki anijihde nuyam khimshuhjih.

²³Alibe mübünkeangde kambah tsührü khülang zübe, tüsho tha, “Thrünpuhnü I mungchih lude tsodo.”

²⁴Jumonü alibenü api mung Josep de ji tüsho tha, “ATUNGPUHNÜ I kilim tsührü püpü khiolojihbah.”

²⁵Rachelnü Josep zübe dunglim, Jakobnü Laban ki tha, “I yüshang, junangde inü I lomi lim yülobah.

²⁶Inü nü tankihkhi dün I niubebo le I tsührübo I kilim jihang, tüsho I yüanü; tümüde inü nü tankihkhi nünü mükheahlah.”

²⁷Tüsho Labannü api ki tha, “I nü miki tsüde ngüa lasho, muzhobah binloang, tümüde nü thsülimnü ATUNGPUHNÜ I müngühjihdo de akin hode inü anikhitdo.”

²⁸Apinü tha, “I ki nü mihkhahbo thaang, tüsho inü ju jihanü.”

²⁹Tüsho Jakobnü api ki tha, “Künangde inü nü tankihkhea, tüsho nü yo akam-shiwühbo I lung lakhi nünü mükheahlah.

³⁰Tümüde I marüyichoki nü anikhüh lakheah, tüshe kheakü ahihkhüh kamdo; I arü shunü ATUNGPUHNÜ nü müngühjihdo. Tüsho kheakü, I yamkhün thsungkheak inü küyimki rhimoba?”

³¹Jumonü apinü keo, “Inü nü kilim tümü jihba?” Jakobnü alo, “Inü mihkhah dün tümü mulune. Nünü I thsungkheak ha rhimosho, inü kheaküshe nü mihnu boto yimkipde akümbah:

³²Khihni I nü mihnu boto alala hode, ju chingnü amütri tüsho amütsan kihkhi namfimihnubo, tüsho namfimihnunu bolungnü amüwa alala, tüsho mihnu bolungnü aneakjik kihkhi tüsho amütribo mokhitde yüshang; tüsho harü I mihkhahbo dün labah.

³³Junangde arübe kim ching nünü I mihkhah jihkhi kheahchoki I thiyuro-lungkinü amütsan jihbah: mihnu bolung mümütrikhi tüsho namfimihnunu bolung mümüwakhibo I lung laa lasho, ju ahühkhi khebah.”

³⁴Labannü alo, “O, nünü athakhi nangde thsang.”

³⁵Jumonü ju nimung apinü mihnu pungbo le drebo amütri tüsho aneakjik kihkhibo, amüye kihkhi aban, tüsho namfimihnunu bolung amüwabo alala mokhita api tsührübo khah ching jih.

³⁶Jushu apinü anihbuh le Jakob dükeak nimung mahsam hantsah yü, tüsho Jakobnü aningkhi Laban mihnu botobo küm.

³⁷Kheakü Jakobnü anihbuh thsungkheak poplar le almond tüsho Plane sangbo kheaknü akhahbo arhang ngamkhia lu tüsho aküp khuka bahbah amüye hingkhitde tsobo thsü.

³⁸Tüsho apinü aküp khuka bahkhi tsobo ju mihnubo arübah ke yungpung arü müngüh zojih, tümütüsho shiwühbo ke yungpü arüchoki amüdungachihde alakheah.

³⁹Junangde küyimki mihnubonü tsobo miki amüdungachihkheanü arünü panghingbo, amütribo tüsho aneakjik kihkhibo anu.

⁴⁰Judüki Jakobnü namfimihnunubo büthsüde zo, tüshe aningkhi ju Laban shiwüh panghing tüsho amüwabo lim abinshih. Hanangde apinü anihbuh thsungkheak mihnu boto büthsü tüsho arübo Laban shiwüh lung müdüsah.

⁴¹Küyimki ashih-kihkhi shiwühbo amüdungachihbanü, Jakobnü tso bolung amüdungachihshihpü thsüde arü miki zojih,

⁴²tüshe shiwühbo ju yiuhyiuh lasho, apinü ju ching muzojih. Junangde ayiuhyiuhbo Laban yo tüsho arhüngrhüngbo Jakob yo lakheah.

⁴³Hanangde Jakob ju khide lalim tsüde kam tüsho mihnu boto ato, athrürü tüsho aliberü yamlarübo, tüsho kemelbo le donkibo lakheah.