Read Yimchungru Naga Thrün 33 Bible Online

Thrün 33 - Yimchungru Naga bible

Thrün 33

¹Jakobnü abinkih-a kheah tüsho Esau arüde alakhi ngü, tüsho api lung mihtsürü 400 lakheah. Jumonü apinü azürübo ju Lea, Rachel, tüsho yamlaberü mahne bolung chammüzütjih.

²Apinü yamlaberübo le arü tsührübo mikhuh, Lea tüsho anihbe tsührübo ju khin yüshih, tüsho Rachel le Josep ashushih.

³Apinü arü alala hode yü tüsho akhiung api thüninde marüyi khiungde alo kheak thüne ki khukning.

⁴Tüshe Esaunü api shorupü alihde yübah kap, tüsho ahung kheak kapbah api müthsüp, tüsho arünü trip.

⁵Apinü abinkih-a kheahbah aliberübo le tsührübo ngü, tüsho tha, “Nü lung harü ha sherü a?” Apinü alo, “Thrünpuhnü nü yamlarü kilim muzhode ajihkhi tsührübo ah.”

⁶Judüki yamlarübo le arü tsührübo thüninde arü tüsho khukning.

⁷Lea she anihbe lung tsührübo bebah arü tüsho arünü khukning. Jushu Josep le Rachel thüninde arü, tüsho arünü khukning.

⁸Judüki Esaunü tha, “Inü ashorukhi boto alala ha amütsan tümü a?” Tüsho apinü alo, “Harü ha I tungpuh miki amuzho yimpü lah.”

⁹Tüshe Esaunü tha, “I suhdahde lah, I niurü, nü tümü lanü nü thsungkheak zoang.”

¹⁰Tüsho Jakobnü tha, “Yung, muzhobah, I nü miki amuzho ngüa lasho, I khah chingnü I thsambah leangkhiang; nü miro ngükhi inü Thrünpuh miro ngükhi nangde lah, tüsho nünü I ki asühdo.

¹¹Muzhobah, nü kilim hande arükhi I müngühmühi luang, tümütüsho Thrünpuhnü I ki muzhode rhimodo, tüsho I suhdahde lah.” Apinü anihbuh ki thsungkih tüsho apinü ju lu.

¹²Judüki Esaunü tha, “Isanü tsahmusuanü; isa yüanü, tüsho I nüsa müngüh yübah.”

¹³Tüshe Jakobnü api ki alo, “Azürübo sühmüh müdüküng, tüsho mihnu le moshi boto anunu bede I lung belah de I tungpuhnü mükheahlah. Tüsho mihtsürübonü arübo nimung khülangnü müküpde besho, shiwüh alala ashebah.

¹⁴Muzhobah I tungpuh a nü yamlarü müngühnü yüang. Inü Seir ching I tungpuh ki marüyi khiungde, I müngüh shiwüh boto tüsho azürübo arünnü kitde arübah.”

¹⁵Tüsho Esaunü tha, “Kheakü I lung bekhi mihtsürü khürü nü lung zojihanü.” Tüshe apinü alo, “Tümü yihnüpü lale? Inü I tungpuh miki amuzho lang ngüshang.”

¹⁶Jumonü Esaunü ju nimung nihbuh limro ching Seir lim yülo.

¹⁷Tüsho Jakobnü hantsahde Sukkoth lim yübah api thsungkheak thüyam khülang tüsho shiwühbo thsungkheak yünshimbo thsü. Jumonü ju dangpung ki Sukkoth de jichoh.

¹⁸Tüsho Jakobnü api limro Paddan-aram chingnü Kanan lomi ching lakhi Shekem kiuto ching tsüde arü; tüsho apinü kiuto müngüh bin.

¹⁹Anihbuhnü khimyam thsüpung alo ju Shekem abuh Hamor tsührübo kheaknü apinü shotoyinchi nak 100nü thulo.

²⁰Ju ching apinü kingaün sadam khülang thsü tüsho El Elohe Israel de ji.