Read Yimchungru Naga Thrün 34 Bible Online

Thrün 34 - Yimchungru Naga bible

Thrün 34

¹Kheakü Leanü Jakob kilim zübejihkhi tsührübe Dinanü lomi liberübo kheahpü yü.

²Tüsho küyimki lomi yakzanshuhbuh Hivrü Hamor tsührü Shekemnü alibe ngükhea, apinü anihbe bea lubah amütsü thsü tüsho alibe thsümünim.

³Api menü Jakob tsührübe Dina khide mürüh, apinü anünübe muzho tüsho anihbe ki muzhode asuk.

⁴Jumonü Shekemnü abuh Hamor ki tha, “Ha anünübe I niube thsüpü lujang.”

⁵Tüsho apinü atsührü Dina thsümünimkhi Jakobnü mükheah. Kheakü api tsührübo akam-shiwühbo lung thulu ching lakheah; jumonü arü malungyikia Jakobnü tümü müthsü.

⁶Judüki Shekem abuh Hamornü Jakob kilim wukhiuk tüsho api ki asukachih.

⁷Tüsho Jakob tsührübonü ju sobah thulu chingnü alung; tüsho mihtsürübo khide mulong mütsüde la tüsho khide bukakhiuk, tümütüsho apinü Israel ching amürhimobe Jakob tsührübe thsümünimkhi hode mungchih rhimo.

⁸Tüshe Hamornü arü ki tha, “I tsührü Shekem menü nü tsührübe mürühlah. Muzhobah alibe ju api niube thsüpü jihang.

⁹Tüsho isa ki yamkhün kamang; nü tsührübebo isa kilim jihang, tüsho isa tsührübebo nüsa luang.

¹⁰Junangde nüsa ju isa lung labah, tüsho alo ju nüsa müngüh labah. Laang tüsho ju ching shothsümoloang, tüsho ju ching nüsa lakhit ngüa luang.”

¹¹Judüki Shekemnü alibe abuh le keoniorübo ki tha, “I nüsa miki amuzho ngüanü, tüsho nüsanü I ki tümüpürü thabanü inü ajihbah.

¹²I ki adün tüsho thsambah hihde kheangang, tüsho nüsanü I ki thakhi yande inü nüsa kilim jihbah; tüshe anünübe I niube thsüpü jihang.”

¹³Tüshe Jakob tsührübonü Shekem le abuh Hamor ki alo, tüsho rüklimnü asuk, tümütüsho arünü arü niurü Dina thsümünim.

¹⁴Tüsho arünü arü ki tha, “Isanü isa niurü tsütamübahrü kilim müjihkhuk, tümüde ju isa kilim mungchih labah.

¹⁵Tüshe ha yakli hode isanü nüsa ki mülübah: nüsa ju isa nangde kamde, nüsa athrürü aban tsütabahsho,

¹⁶isanü isa tsührübebo nüsa kilim jihbah, tüsho isanü nüsa tsührübebo lubah; isanü nüsa lung labah, tüsho isabo mihtsürü khülang kambah.

¹⁷Tüshe nüsanü tsütabahpü malokhisho, isa niurü bebah isa atsobah.”

¹⁸Tüsho arü yubonü Hamor tüsho api tsührü Shekem asühshih.

¹⁹Jumonü athrününgtsüngbuhnü ju rhimopü mashu, tümütüsho apinü Jakob tsührübe kheak asüh. Api ju abuh yamkhün alala kheaknü wüntre jihkhi lakheah.

²⁰Hamor le api tsührü Shekem anenü kiuto chipiripit ki arü, tüsho arü kiuto mihtsürübo ki tha:

²¹“Harü mihtsürübo isa lung mungtsü chingnü lah. Arübo lomi ching lashang tüsho ju ching shothsümoloshang. Tümüde arü thsungkheaknü alo tode lah. Isanü arü tsührübebo isa niuberü thsüpü luanü, tüsho isanü arü kilim isa tsührübebo jihanü.

²²Tüshe arübo nangde isa athrürübo tsütabahsho lang mihtsürübo isa lung mihtsürü khülang thsüde alapü mulongbah.

²³Arü akam-shiwühbo, arü lakhit, tüsho arü shiwüh lüpdükhi isa yo thsüpü yung de? Isanü lang arü ki anianü, tüsho arünü isa lung labah.”

²⁴Tüsho kiuto chipiripit hode awukhiukrü alalanü Hamor tüsho api tsührü Shekem büne ki ani; kiuto chipiripit hode awukhiukrü athrürü aban tsütabah.

²⁵Kheakü mahsam nipü, arü thsünü ching lachoki, Jakob tsührü mahne, Dina akhiung Simeon le Levi anenü abande nukshang lubah mulong tode kiuto ching arü tüsho athrürü alala laksah.

²⁶Arünü Hamor le api tsührü Shekem nukshangnü laksah, tüsho Shekem yam chingnü Dina bea lubah wukhiuk.

²⁷Jakob tsührübonü alaksahpung ching arü, tüsho kiuto yankhia lu, tümütüsho arü niurü thsümünima lakheah.

²⁸Arünü arü kiuto tüsho thulu ching lakhi namfimihnubo, arü moshipungbo lu.

²⁹Arünü arü lakhi tüsho aliberübo le azürübo, arü yambo ching lakhi lüpdükhi yankhia lu.

³⁰Judüki Jakobnü Simeon le Levi ki tha, “Nükenü lomi ching larü Kananrü le Perizrü bolung I athraneanbe kamshihde I kheak küpkhuk hande arüdo; tümütüsho I wühkhe nüklah, arünü rukhüh mukhungbah I azhihbah tüsho I laksahbah.”

³¹Tüshe anenü alo, “Apinü isa niurü müzammüramrü nangde arhimobea de?”