Read Yimchungru Naga Thrün 35 Bible Online

Thrün 35 - Yimchungru Naga bible

Thrün 35

¹Judüki Thrünpuhnü Jakob ki tha, “Asürang, Bethel lim wutuang tüsho ju ching laang; tüsho nü khiung Esau kheaknü nü tsochoki nü ki akhiukbuh Thrünpuh kilim kingaün sadam khülang thsang.”

²Jakobnü api yamkhün tüsho api lung larü alala ki tha, “Nüsa bolung lakhi khiungkerü thrünpuhbo bahbah nüsa tsangkhitang, tüsho nüsa khimmihbo müthriang.

³Jushu isanü tsahmusuanü tüsho Bethel lim wutuanü; tüsho inü ju ching I lümthsünü nimung I ki alojihbuh tüsho I yükhi limro ching I lung lakhi Thrünpuh kilim kingaün sadam khülang thsübah.”

⁴Jumonü arünü arü khah ching lakhi khiungkerü thrünpuhbo alala tüsho arü nuku ching lakhi nüpübo alala Jakob kilim jih; tüsho Jakobnü jurü Shekem ching thülamdung khüp ramabah.

⁵Judüki arünü tsahmusu, tüsho arü miki kiutobo alala kheak Thrünpuh mihtrebe lakheah, tüsho arünü Jakob tsührübo yande mümüsham.

⁶Jumonü Jakob tüsho api lung mihtsürü alala Kanan lomi ching lakhi Luz (ju Bethel) ching arü.

⁷Apinü ju ching kingaün sadam khülang thsü tüsho ju dangpung ki El Bethel de ji, tümütüsho api akhiung kheaknü atsochoki ju ching Thrünpuh api ki akhiuk.

⁸Kheakü Rebeka mütrübe Debora sheabah, tüsho Bethel bukkhüp thülamdung khüp kiuyukabah. Jumonü ju mung Allon Bakuth de ji.

⁹Kheakü api Paddan-aram chingnü arüchoki Thrünpuhnü Jakob ki akhiuk tüsho api müngühjih.

¹⁰Tüsho Thrünpuhnü tha, “Nü mung Jakob ah; kheaküa nü mung Jakob de müji, tüshe nü mung Israel labah.” Jumonü apinü anihbuh mung Israel de ji.

¹¹Kheaküshe Thrünpuhnü api ki tha: “I Wuto Thrünpuh. Aso asoang tüsho wüh buang; trükshihbo nü kheaknü akhiukbah tüsho nü pang chingnü kiulongthsürübo arübah.

¹²Inü Abraham tüsho Isak jihkhi lo nü kilim jihchoh; tüsho nü dunglim nü tsühsoniusobo kilim inü ha lo jihchoh.”

¹³Judüki apinü anihbuh ki asukachihkhi dangpung chingnü Thrünpuh ju yükihabah.

¹⁴Jumonü apinü anihbuh ki asukachihkhi dangpung ching Jakobnü mümihlung khülang khima zo; tüsho apinü ju kheak ayungbe kingaün le müdangke bukkih.

¹⁵Tüsho Jakobnü api ki Thrünpuhnü asukachihkhi dangpung mung ju Bethel de ji.

¹⁶Judüki arünü Bethel chingnü hantsahmusu. Tüsho arübo Ephra khiungpü adükeak anükhüh lachoki Rachel khungarü zübepü khiung tüsho thsünü ato ching lakheah.

¹⁷Küyimki alibe thsünü ato ching lakheanü, zübe-mütrürünü anihbe ki tha, “Dütre; nü tsührü kheaküshe lah.”

¹⁸Tüsho anihbe me chamachihde alachoki (tümüde alibe sheabah), alibenü api mung Ben-oni de ji; tüshe abuhnü api ki Benjamin de ji.

¹⁹Junangde Rachel sheabah tüsho Ephra (ju Bethlehem) limro kheak kiuyukabah.

²⁰Tüsho Jakobnü anihbe kiuyuk kheak mümih-lung khima zo; ju khihni khiungde Rachel kiuyuk mümih-lung lah.

²¹Jushu Israelnü hantsahmusu tüsho Eder rünchang hobah api khimyam thsü.

²²Tüsho küyimki ju lomi ching Israel lakheanü, Reubennü abuh hanniube Bilha kilim yü tüsho müyam; tüsho ju dünkheak Israelnü so. Jakob tsührü 12 lakheah:

²³Lea tsührübo Reuben (Jakob tsührü adüjibuh), Simeon, Levi, Juda, Issakar, tüsho Zebulun;

²⁴Rachel tsührübo Josep tüsho Benjamin;

²⁵Rachel yamlabe Bilha tsührübo Dan tüsho Naphtali;

²⁶tüsho Lea yamlabe Zilpa tsührübo Gad tüsho Asher. Harü ha Paddan-aram ching Jakob kilim zübejihkhi tsührübo lakheah.

²⁷Judüki Jakob ju Abram tüsho Isak lacholapung Mamre yungsho Kiriath-arba (ju Hebron) ching abuh Isak kilim arü.

²⁸Kheakü Isak kam 180 lakheah.

²⁹Junangde shinde tüsho nimung khiungde labah she tüsho api mihtsürü kilim yü; tüsho api tsührübo Esau le Jakob bünenü api kiuyukabah.