Read Yimchungru Naga Thrün 39 Bible Online

Thrün 39 - Yimchungru Naga bible

Thrün 39

¹Kheakü Josep ju Ijip lim bede yüki. Tüsho ju ching bede yükirü Ishmaelrü kheaknü Pharao torü, aheangrü wühkenobuh, Ijiprü Potipharnü thulo.

²Josep lung ATUNGPUH lakheah, tüsho api akuk ngürü mihtsürü lakheah; tüsho api ju anihbuh putungrü Ijiprü yam ching lakheah.

³Api lung ATUNGPUH lakhi anihbuh putungrünü ngü tüsho api khah rhimo alala ATUNGPUHNÜ akuk ngüshih.

⁴Junangde api miki Josep amuzho ngü, tüsho api tankih. Apinü anihbuh ju api yam kheahrü kamshih, tüsho api lakhi alala akhah ching jih.

⁵Jumonü apinü api yam tüsho api lakhi alala kheahrü kamshihkhi kim chingnü Josep thsülimnü ATUNGPUHNÜ Ijipbuh yamkhün müngühjih; tüsho ATUNGPUH müngühmühi ju api yam ching alala tüsho thulu ching lakheah.

⁶Junangde api lakhi alala Josep khah ching jih, tüsho anihbuhnü tsühyungkhi kheak hode apinü tümü mümükheahde alakheah. Tüsho Josep ju trungdung tüsho akheahpü atsü lakheah.

⁷Kheakü anükhüh dunglim api putungrü niubenü Josep mürüh, tüsho tha, “I lung müyamang.”

⁸Tüshe apinü reanglo tüsho api putungrü niube ki tha, “Kheahang, thüyam ching I lung lakhi I putungrünü mümükheah, tüsho anihbuhnü api lakhi alala I khah ching jihdo.

⁹Ha yam ching I hobah sheshe ato müla; yungsho I kheaknü tümü she tukloa muzo tüshe nü lang ah, tümütüsho nü api niube ah. Dale küde thsah inü ha amütsü ato rhimopü, tüsho Thrünpuh azhihde neak yihbeakpü?”

¹⁰Junangde alibenü nimung aban Josep ki thatha she, apinü anihbe lung müyampü alibe ki mani.

¹¹Nimung khülang Josep anihbuh rhimo thsüpü thüyam ching yüzah, tüsho thüyam ching yamlarü she mülade alakheah,

¹²junangde alibenü api khimmih kheaknü tholobah tha, “I lung müyamang.” Tüshe apinü anihbuh khimmih akhah ching bahjihbah alihde wungdo wukhiuk.

¹³Tüsho küyimki api khimmih anihbe khah ching bahjihbah wungdo alihde awukhiukkhi alibenü angükhea,

¹⁴alibenü anihbe yam ching yamlarübo ji tüsho arü ki tha, “Kheahang, apinü isa mükhemürangshihpü Ibrirü isa kilim bede arüa lah. Apinü I kheak amütsü thsüpü arü, tüsho inü düsheak achangnü zhikhit.

¹⁵Tüsho küyimki I düsheak achangnü azhikhi apinü asokheanü api khimmih I ki zobah alihde wungdo wukhiuk.”

¹⁶Jumonü api putungrü thüyam lim marüyi khiungde alibenü khimmih ju anihbe ki zo.

¹⁷Judüki alibenü api ki thiyu ha ruk tha, “Nünü isa kilim Ibrirü yamlarü bede arükhinü I ki mükhemürangpü arüdo;

¹⁸junangde inü I düsheak achangnü azhichoki api khimmih I ki bahbah alihde wungdo wukhiuk.”

¹⁹Küyimki aniubenü, “Nü yamlabuhnü I ki hadürü yakli rhimodo,” de athakhi api putungrünü asokhea, api bukakhiukde kam.

²⁰Judüki Josep putungrünü api bea lubah kiulongthsürü yo aramrü zopung rihyam ching api yuk. Tüsho api rihyam ching lakheah.

²¹Tüshe Josep lung ATUNGPUH lakheah tüsho api ki amüthsüm huh, tüsho rihyam aheangrü miki api amuzho ngüshih.

²²Tüsho rihyam aheangrünü rihyam ching lakhi aramrü alala Josep khah ching jih; tümüpürü arünü ju ching rhimokheanü, ju api rhimo lakheah.

²³Rihyam aheangrünü Josep khah ching lakhi tümü she mükheahlüng, tümütüsho Thrünpuh api lung lakheah; tüsho tümüpürü apinü arhimokheanü, ATUNGPUHNÜ ju akuk ngüshih.