Read Yimchungru Naga Thrün 40 Bible Online

Thrün 40 - Yimchungru Naga bible

Thrün 40

¹Kim anükhüh dunglim, Ijip kiulongthsüpuh pung-jihrü tüsho yikhap-takrü anenü arü putungrü azhihde rhimo.

²Tüsho Pharaonü api yo atorü hane, pung-jihrü azopü tüsho yikhap-takrü azopü kheak bukakhiuk.

³Jumonü apinü ane ju aheangrü wühkenobuh yam, Josep lakhi rihyam ching ramyuka zo.

⁴Tüsho aheangrü wühkenobuhnü arü kheahshihpü Josep thiyi, tüsho apinü arü ahiuhakhip; junangde rihyam ching arü anükhühkheak lakheah.

⁵Judüki rihyam ching lakhi Ijip kiulongthsüpuh pung-jihbuh tüsho yikhap-takbuh ane chidonü tsüngrekhüh chingnü milim mi, tüsho amütsan buh lungkiki lakheah.

⁶Tüsho Josepnü yapsu ane kilim arübah ane kheak kheah, tüsho ane ju mulong tukthsüde ngü.

⁷Jumonü api putungrü yam, rihyam ching api lung lakhi Pharao torübo ki apinü keokhi, “Tümü thsükhi nüke khihni a mi mitingla le?”

⁸Anenü api ki alo, “Ike chidonü milim mido, tüsho ju athanakrü she müla.” Tüsho Josepnü ane ki tha, “Athanakkhi ju Thrünpuh yo yung de? Nüke milimbo I ki thaang.”

⁹Judüki pung-jihrü azopünü Josep ki api milim tha, “Kheahang, I milim ching I miki kurungasoliu khülang lakheah,

¹⁰tüsho kurungasoliu ching adübeak mahsam lakheah; ju duduhde arübah abün pung, tüsho kurungaso akeangthrünbo thsübah mün.

¹¹Judüki Pharao pung I khah ching lakheah; tüsho inü kurungasobo ju lubah Pharao pung ching thsünyuk, tüsho pung ju Pharao khah ching yukjih.”

¹²Josepnü api ki tha, “Ju thanakkhi ha lah: Adübeak mahsam ju nimung mahsam ah.

¹³Nimung mahsam dükeak chingnü Pharaonü nü dükhebah tüsho akhuhlim nünü api pung-jihrü thsükhi nangde nünü api khah ching pung jihbah.

¹⁴Tüshe nü tsüde alachoki I lümkhitang, tüsho I ki amuzho huhang; I dünkheak Pharao ki thaang, tüsho ha yam chingnü I bekhitang.

¹⁵Tümüde I Ibrirü lomi chingnü ahüh-a lude tso; tüsho ha ching she inü rihyam ching binpü thülünde tümü mürhimode arünü I yuka zolah.”

¹⁶Küyimki athanakkhi ju yikhaptakrü azopünü tsüde angükhea, apinü Josep ki tha, “Inü she milim khülang mido: I ku kheak yikhap muluk mahsam lakheah.

¹⁷Muluk achangbe ching Pharao tsühyungbe dümkhi mungji alala lakheah, tüsho wuhnubonü I ku kheak mulukbo chingnü tsüh.”

¹⁸Jumonü Josepnü tha, “Ju thanakkhi ha lah: Muluk mahsam ju nimung mahsam ah.

¹⁹Nimung mahsam dükeak chingnü Pharaonü nü bekhitbah tüsho nü sangdung khülang kheak zhinbah; tüsho wuhnubonü nü shih tsühbah.”

²⁰Kheakü nimung mahsampü ching, Pharao zübe nimung apinü anihbuh yamlarü alala thsungkheak thünio thsakham; tüsho apinü pung-jihrü azopü le yikhap-takrü azopü büne api yamlarübo miki bedarü.

²¹Judüki apinü pung-jihrü ju anihbuh rhimo ching yüloshih, tüsho apinü Pharao khah ching pung jih.

²²Tüshe Josepnü ane ki thanakkhi nangde, apinü yikhap-takrü azopü a wuka zhin.

²³Tütüshe pungjihrü azopünü Josep mülümkhit, tüshe api mihabah.