Read Yimchungru Naga Thrün 42 Bible Online

Thrün 42 - Yimchungru Naga bible

Thrün 42

¹Küyimki Jakobnü Ijip ching hi lakhi mükheahkhea, apinü atsührübo ki tha, “Tümüde nüsa khülangnü khülang ki kheahachihcho?”

²Apinü tha, “Ijip ching hi lakhi inü sodo; ju ching yükiang tüsho isa thsungkheak hi thuloang, junangde isa müshede alabah.”

³Jumonü Josep keoniorübo 10 ju Ijip ching hi thulopü yüki.

⁴Tüshe Jakobnü Josep niurü Benjamin akhiung pürü lung müyüshih, tümüde apinü thsümütsü khürü anihbuh kheak dünjipü tre.

⁵Tüsho Israel tsührübonü hantsahrü bolungnü hi thulopü yü, tümüde Kanan lomi ching khümzung lakheah.

⁶Kheakü Josep ju alomi kurungkheak kovünor lakheah; tüsho lomi mihtsürü alala kilim apinü yinjih. Tüsho Josep keoniorübonü arübah alo lim arü miro thsübah api miki khukning.

⁷Josepnü api keoniorübo ngü tüsho mütsan, tüshe apinü arü ki jaksorü nangde khümkhümde tha. Apinü arü ki tha, “Nüsa küchingnü arücho?” Tüsho arünü alo, “Tsühyungbe thulopü Kanan lomi chingnü arükheah.”

⁸Junangde Josepnü api keoniorübo mütsan, tüshe arünü api mümütsan.

⁹Judüki Josepnü arü dünkheak apinü milimbo mikhi lümkhit, tüsho arü ki tha, “Nüsa rükramrübo ah! Isa lomi mükümdokhi kheahpü nüsa arüa lah!”

¹⁰Tüsho arünü api ki alo, “Yung, isa tungpuh, nü yamlarübo tsühyungbe thulopü arükheah.

¹¹Isa alala mihtsürü khülang tsührübo ah; isa thiyuro mihtsürü ah; nü yamlarübo a rükramrübo yung.”

¹²Tüshe apinü arü ki tha, “Yung, nüsa a le lomi mükümdokhi kheahpü arüa lah.”

¹³Tüsho arünü tha, “Nü yamlarübo Kanan lomi ching mihtsürü khülang tsührübo 12 ah; akheambuh a isa abuh ki lah, tüsho khülang a müladebahdo.”

¹⁴Tüshe Josepnü arü ki tha, “Inü nüsa ki thakhi nangde, nüsa a le rükramrübo ah!

¹⁵Hanangde nüsa rükakheahbah: Pharao lale, nüsa niurü akheambuh ha ching marüyikia nüsa ha dangpung chingnü makhin.

¹⁶Nüsa bolung khülang yüshang, tüsho apinü nüsa niurü bebah arüshang; tüsho nüsabo rihyam ching zobah, junangde nüsa kheak thiyuro la shi mülanü nüsa yubo rükakheahbah; jude yungsho, Pharao lale, nüsa tsükjide rükramrübo ah!”

¹⁷Jumonü apinü arü alala nimung mahsam rihyam ching zo.

¹⁸Judüki Josepnü mahsam nipü arü ki tha, “Ha rhimoang tüsho nüsa rhangdung labah, tümüde inü Thrünpuh trelah:

¹⁹Nüsa thiyuro mihtsürübo a sho, nüsa keoniorübo lung khülang rihyam ching lashang; tüshe nüsa yüang tüsho nüsa betsührübo khümzung thsungkheak hi hanbah yüang.

²⁰Tüsho nüsa niurü akheambuh I kilim bede arang; junangde nüsa yubo mütsanmükhibah, tüsho nüsa müshe.” Tüsho arünü jude thsü.

²¹Judüki arü khülangnü khülang ki thaachih, “Tsükjide isa niurü dünkheaknü isa mülimkhi lah, tümüde apinü isa ki mushuchoki anihbuh me thsünükhi isanü ngüdo, tüshe isanü manijih; jumonü ha küpkhuk isa kheak arüdo.”

²²Tüsho Reubennü arü ki tha, “Azübuh azhihde neak düyihbeak de inü nüsa ki mütha de? Tüshe nüsanü mani! Jumonü kheahang, api thiyihnü isa kheangchoh.”

²³Tüshe Josepnü arü ki anikhitlah de arünü mümükheah, tümüde apinü ayihphülaprü hode arü ki asuk.

²⁴Tüsho apinü arü kheaknü anguhde yübah trip. Jushu apinü arü kilim alode arü, tüsho arü kheak asukachih. Apinü arü bolungnü Simeon thokhita arü mük kinü api rhük.

²⁵Judüki arü shungliu-qiuqiubo ching hi yukshihpü, mihtsürü aban sho arü nihbuh shungliu-qiuqiu ching yukloshihpü, tüsho hantsah thsungkheak arü kilim tsühyungbe jihshihpü thiyukhüm jih. Hanangde apinü arü thsungkheak rhimo.

²⁶Jumonü arünü arü yo donkibo hinü hah thsü tüsho ju chingnü chamachih.

²⁷Tüshe arü bolung khülangnü binkheampung ching anihbuh donki yimkippü shungliuqiuqiu khimshuhchoki hi mi kheak anihbuh sho ngü;

²⁸jumonü apinü akeoniorübo ki tha, “I sho jihloa lah tüsho ju I shungliu-qiuqiu ching zah-a lah!” Judüki arü mulong müyinkhi tüsho trede kam, tüsho khülangnü khülang ki thaachih, “Thrünpuhnü isa ki ha rhimokhi tümü a?”

²⁹Judüki arünü Kanan lomi ching arü abuh Jakob kilim yü tüsho arü kheak dünjikhi alala api ki tha:

³⁰“Ijip kovünornü isa ki khümkhümde tha, tüsho isa ju lomi rükramrübo ah de müdamdo.

³¹Tüshe isanü api ki tha, ‘Isa thiyuro mihtsürübo ah; isa rükramrübo yung.

³²Isa abuh tsührü isa 12 ah; khülang a müladebahdo, tüsho akheambuh ju isa abuh ki khihni khiungde Kanan lomi ching lah.’

³³Judüki mihtsürü junü alo, ‘Ha hode nüsa thiyuro mihtsürü ah de inü amükheahbah: Nüsa keoniorü bolung khülang ha ching I lung zojihbah nüsa betsührübo khümkhi thsungkheak tsühyungbe lubah yüang.

³⁴Tüsho nüsa niurü akheambuh I kilim bede arang; jude thsüsho lang nüsa rükramrübo yung tüshe thiyuro mihtsürübo ah de inü amükheahbah. Inü nüsa niurü nüsa kilim jihlobah tüsho nüsa ha ching shothsümolode alapü kuklah.’ ”

³⁵Arü shungliu-qiuqiubo yeahkeang she arü nihbuh shungliuqiuqiu aban ching sho düm ngü; tüsho arü le arü abuhnü sho dümbo ngüchoki arü trede kam.

³⁶Arü abuh Jakobnü arü ki tha, “Nüsanü I tsührübo dükheakshihdo: Josep le Simeon müladebahdo, tüsho nüsanü Benjamin bede tsonelah. Harü alala I azhihkhi lah.”

³⁷Judüki Reubennü abuh ki tha, “Inü api nü kilim belode marüsho I tsührü 2 ju laksahang; api I khah ching yukjang, tüsho inü api nü kilim belode arübah.”

³⁸Tüshe apinü tha, “I tsührü nü lung müyüki, tümüde akhiung sheabahdo, tüsho api lang aninga lah. Nüsa yükhi ching api kheak thsümütsü yükihsho, nünü I ku buyiukkhi mulong rozhakde shekhün ching yüzahshihbah.”