Read Yimchungru Naga Thrün 43 Bible Online

Thrün 43 - Yimchungru Naga bible

Thrün 43

¹Kheakü lomi ching khümzung ju muthsukde alakheah.

²Tüsho küyimki arünü Ijip chingnü hande arükhi hi tsühkhamkhea, arü abuhnü arü ki tha, “Yülobah isa thsungkheak tsühyungbe anükhüh thuloang.”

³Tüshe Judanü api ki tha, “Nüsa lung nüsa niurü mübesho nüsanü I miro müngülo de mihtsürünü isa ki müküpde thado.

⁴Nünü isa lung isa niurü arüshihsho, isanü ayükibah tüsho nü khilim tsühyungbe thulobah.

⁵Tüshe nünü api isa lung marüshihsho, isa müyüki; tümüde mihtsürünü isa ki tha, ‘Nüsa lung nüsa niurü mübesho nüsanü I miro müngülo.’”

⁶Tüsho Israelnü tha, “Nüsanü mihtsürü ki ju nüsa niurü püpü she lah de athakhinü tümüde I küpkhukshihcho?”

⁷Tüshe arünü alo, “Mihtsürü junü isa ki khuhlangde isa le isa betsührü thsungkheak keokhi, ‘Nüsa abuh kheakü khiungde la shi? Nüsa keoniorü püpü la shi?’ Tüsho harü yubo yande isanü api ki thado. Apinü isa ki, ‘Nüsa niurü bede akiang,’ de athapü isanü mükheahlah düpü?”

⁸Judüki Judanü abuh Israel ki tha, “Isa lung azübuh arüshang, tüsho isa tsahmusude ayübah, junangde isa le nü tüsho isa khungarübo müshede alabah.

⁹Inü api thsungkheak thiyuchihchim thsübah; nünü api dünkheak I hahmülang thsüshang. Inü nü miki belode marüsho, lünnü ju mah inü hananü.

¹⁰Isanü mülakmakhülaa, dükde isa ha mahne kipü alode arüa labah.”

¹¹Tüsho arü abuh Israelnü arü ki tha, “Jude athsübeasho, hade thsang: Lomi chingnü akhiukkhi atsüdak sangaso khürü nüsa hahbo ching hanbah mihtsürübuh kilim thsambah thsüde yükiang — molike tüsho mukhuke anükhüh, rhümthüneabe tüsho jinjinlak, pista sangaso tüsho almondbo.

¹²Nüsa khah ching sho ju mahne kinü alü luang, tüsho nüsa shungliu-qiuqiu münbo ching jihlokhi sho nüsanü lulode yüang; khükia ju lakmih-a lapü kuklah.

¹³Nüsa niurü she beang, tüsho tsahmusubah mihtsürübuh kilim alode yüang.

¹⁴Tüsho Wuto Thrünpuhnü mihtsürübuh miki nüsa amüthsüm jihshang, junangde apinü nüsa niurü püpü le Benjamin büne dükhebah. I a tsührübo dükheakpü lasho, tümüyu lapü!”

¹⁵Jumonü mihtsürübonü thsambah tüsho arü khah ching sho mahne kinü alü thsüde lu tüsho Benjamin lungnü Ijip lim yüki; tüsho arü Josep miki zhip.

¹⁶Küyimki Josepnü arü lung Benjamin ngükhea, apinü ayam ching kimthsübuh ki tha, “Harü mihtsürübo I yam ching bede yüang tüsho shiwüh khülang laksahbah mozümodoang; tümüde harü mihtsürübo animuro I lung yimtsühbah.”

¹⁷Judüki mihtsürü junü Josepnü thiyukhüm jihkhi nangde rhimo tüsho mihtsürübo ju Josep yam ching bede yü.

¹⁸Kheakü mihtsürübo trede alakheah, tümütüsho arübo Josep yam ching bede yüzah; tüsho arünü tha, “Ha atan isa shungliu-qiuqiubo ching sho yuklojihkhi dünkheaknü isa ha ching beyuka lah, junangde apinü adükeak kheahbah isa yandobah isa yo donkibo lubah tüsho isa azhorü kamshihpü thsüchoh.”

¹⁹Küyimki arübo Josep yam kimthsübuh thüninde ayükheanü, arünü thüyam khimdopü kinü api ki asukachih,

²⁰tüsho tha, “O atobuh, isa atan kim ching tsühyungbe thulopü akido;

²¹tüshe küyimki isa binkheampung yükheanü, isanü isa shungliu-qiuqiubo khimshuh, tüsho mihtsürü aban shungliu-qiuqiu mün ching buh shosho asusu zah-a lakheah; jumonü isanü lulode arüdo.

²²Tüsho isanü tsühyungbe thulopü sho püpü lubah akikheah. Isa shungliu-qiuqiubo ching shenü isa sho yukjihkheanü isanü mümükheah.”

²³Tüshe apinü tha, “Nüsa tümü müthsü, dütre. Nüsa le nüsa abuh Thrünpuhnü nüsa shungliu-qiuqiubo ching nüsa kilim rahpung yukjihdo; nüsa sho a le inü ludo.” Jushu apinü arü kilim Simeon bede akhiuk.

²⁴Jumonü kimthsübuhnü mihtsürübo ju Josep yam ching beyuk tüsho arü kilim ke jihbah arü jing müsüh; tüsho apinü arü yo donkibo ke duh.

²⁵Judüki arünü animuro Josep arüpü thsungkheak thsambahbo thsakham, tümüde arü ju ching yimtsühbah de arünü so.

²⁶Küyimki Josep thüyam ching arükhea, arünü thüyam ching lude azahkhi thsambahbo api kilim jih, tüsho api miki alo kheak khukning.

²⁷Judüki apinü arü tsüde alakhi dünkheak keokhi, “Nüsanü athakhi ashinbuhrü, nüsa abuh tsüde la shi? Api kheakü khiungde la shi?”

²⁸Tüsho arünü alo, “Nü yamlarü isa abuh phü tsüde lah; api kheakü khiungde lah.” Arünü arü kubo mükhüm tüsho akin jih.

²⁹Jushu apinü amük züngkihbah abe tsührü aniurü Benjamin kheah, tüsho tha, “Ha nüsanü I ki thakhi nüsa niurü akheambuh a de?” Tüsho apinü tha, “I tsah-a, Thrünpuhnü nü müthsümshang.”

³⁰Kheakü aniurü thsungkheaknü api mulong thsümünim; jumonü Josepnü niokheamde yü tüsho atrippü dangpung khürü yim. Apinü anihbuh khiungshak ching yüzah tüsho trip.

³¹Jushu apinü amiro müsühbah akhiuk; apinü anihbuh danyuk, tüsho tha, “Tsühyungbe ahiuhakhipang.”

³²Arünü Josep dükhüm khülang kheak tüsho api keoniorübo püpü kheak shua zojih. Arü lung tsühyungkhi Ijiprübo büthsüde ahiuhakhip, tümütüsho Ijiprünü Ibrirü kinü müyimtsühkhuk, tümüde ju Ijiprü ki athraneanbe lakheah.

³³Tüsho arünü adüjibuhnü akheambuh khiungde zübekhi ayannü akhinashu thsüde api miki bin; tüsho arübonü arü akhinashunü abinkhi ngüchoki müyinsahde khülangnü khülang kheahachih.

³⁴Judüki Josep dükhüm kheaknü arü kilim ahiuhakhip, tüshe Benjamin kilim a arü kheaknü alü phüngü ki ahiuh. Junangde arünü api lung asühde tsühyung.