Read Yimchungru Naga Thrün 45 Bible Online

Thrün 45 - Yimchungru Naga bible

Thrün 45

¹Judüki Josepnü api ki zhiprü alala miki marümkhukde kam, tüsho apinü zhikhit, “Alala I kinü wukhiukshang!” Jumonü Josepnü api keoniorübo ki anihbuh mükheahshihchoki api lung she müzhip.

²Apinü achangnü trip, tüsho Ijiprü le Pharao yamkhünnü ju so.

³Judüki Josepnü api keoniorübo ki tha, “I Josep ah; I buh kheakü khiungde la shi?” Tüshe api keoniorübonü api ki malokhuk, tümüde Josep miki arübo müyinnim.

⁴Tüsho Josepnü api keoniorübo ki tha, “Muzhobah I phünide arang.” Tüsho arünü phünide arü. Tüsho apinü tha: “I nüsanü Ijip ching yinkhi nüsa niurü Josep ah.

⁵Tüshe kheakü, nüsanü I ha ching yinkhi dünkheaknü nüsa mulong dütukthsü yungsho nüsa nihbuh kheak bukdakhiuk; tümüde Thrünpuhnü rhangdung küma lashihpü nüsa müngühnü I thiyido.

⁶Tümüde ha kam mahne lomi ching khümzung lado, tüsho kheaküshe kam phüngü wochakpü yungsho yimlupü mülade alabah.

⁷Tüshe Thrünpuhnü nüsa alomi ching aninga lashihpü tüsho abekhitkhi atonü nüsa rhangdungbo khümkhitpü I nüsa müngühnü yüshihdo.

⁸Jumonü I ha ching arüshihkhi ju nüsanü yung, tüshe Thrünpuhnü ah; tüsho apinü I Pharao yo achangbe atorü, api yam alala putungrü, tüsho Ijip lomi alala yakzanshuhrü kamshih.

⁹Niokheamde I buh kilim wutuang, tüsho api ki thaang, ‘Nü tsührü Josepnü ha thachoh: “Thrünpuhnü I Ijip lomi alala atungrü kamshihdo; dülakmade I kilim akiang.

¹⁰Nü Goshen lomi ching labah, tüsho nü le nü tsührübo, nü mihnubo le nü moshibo, tüsho nü lakhi alala I phünide alabah.

¹¹Ju ching inü nüsa thsungkheak jihbah, jude yungsho nü le nü yamkhün tüsho nü lakhi alala mükheakmürakde akambah; tümüde kheaküshe kam phüngü khümzung labah.”’

¹²Tüsho kheahang, I münnü nüsa ki thachoh de nüsa le nüsa niurü Benjamin mükbonü ngülah.

¹³Junangde nüsanü Ijip ching I müretahde alakhi alala I buh ki thaang; tüsho nüsanü niokheamde I buh ha ching bede akiang.”

¹⁴Jushu apinü aniurü Benjamin kheak kap tüsho trip, tüsho Benjaminnü tripde api kap.

¹⁵Tüsho apinü akeoniorü alala müthsüp tüsho trip, tüsho ju dunglim akeoniorübonü api ki asukachih.

¹⁶Kheakü ha yusheak Pharao yam chingnü so, “Josep keoniorübo arüa lah,” junangde hanü Pharao tüsho api yamlarübo tsüde asühshih.

¹⁷Tüsho Pharaonü Josep ki tha, “Nü keoniorübo ki thaang, ‘Ha rhimoang: nüsa shiwühbo hah thsüa luang tüsho Kanan lomi lim yüloang,

¹⁸tüsho nüsa abuh le nüsa yamkhün bebah arang; inü nüsa kilim Ijip lomi yo atsübe jihbah, tüsho nüsanü lomi müdang tsühbah.

¹⁹Kheakü ha rhimopü arü ki thiyukhüm jihang: Nüsa tsührübo tüsho nüsa niuberübo thsungkheak Ijip lomi chingnü khora-lolungbebo luang; nüsa abuh bebah arang.

²⁰Nüsa kukrukbo thsungkheak mulong ashide düla, tümüde Ijip lomi yo atsüdakbe alala nüsa yo ah.’ ”

²¹Judüki Israel tsührübonü jude thsü; tüsho Pharao yukhüm yande Josepnü arü kilim khora-lolungbebo jih, tüsho apinü arü kilim hantsah thsungkheak tsühyungbebo jih.

²²Apinü arü alala kilim abande amüthribe khimmihbo jih; tüshe apinü Benjamin kilim shotoyinchi nak 300 tüsho amüthribe khimmih mihbüm 5 jih.

²³Tüsho apinü abuh kilim kukruk harü mühah: Ijip kukruknü hah thsükhi donki 10, tüsho hi, yikhap, tüsho hantsah ching abuh khilim tsühyungbenü hah thsükhi donki dre 10.

²⁴Jumonü apinü akeoniorübo thiyia yüshih, tüsho arünü chamachih; tüsho apinü arü ki tha, “Limro ching dürukachih.”

²⁵Judüki arünü Ijip chingnü wukhiuk tüsho Kanan lomi ching arü abuh kilim arü.

²⁶Tüsho arünü api ki tha, “Josep kheakü khiungde lah, tüsho api Ijip lomi alala kurungkheak kovünor ah.” Tüsho Jakob lümshangmang, tümütüsho apinü arü kheak akin müla.

²⁷Tüshe küyimki arünü Josepnü arü ki thakhi yubo alala api ki thakhea, küyimki apinü anihbuh hanpü Josepnü khora-lolungbebo mühahkhi ngükhea, arü abuh Jakob me reangzahlode arü.

²⁸Judüki Israelnü tha, “Ha suhdo. I tsührü Josep kheakü khiungde lah. I ayübah tüsho I müsheyichokinü inü api kheahbah.”