Read Yimchungru Naga Thrün 46 Bible Online

Thrün 46 - Yimchungru Naga bible

Thrün 46

¹Jumonü Israelnü api lakhi alala lubah hantsahmusu, tüsho Beersheba ching arü, tüsho abuh Isak Thrünpuh kilim shuhmülanga kingaünkhibo jih.

²Judüki Thrünpuhnü azhing michih ching Israel ki tha, “Jakob, Jakob!” Tüsho apinü alo, “I ha ching lah.”

³Tüsho apinü tha, “I a Thrünpuh, nü buh Thrünpuh ah; Ijip lim yükipü dütre, tümüde inü nü ju ching trükshih ato khülang kamshihbah.

⁴I nü lung Ijip lim yükibah, tüsho inü tsükjide nü belode atubah; tüsho Josep khahnü nü mük müyitdojihbah.”

⁵Judüki Jakobnü Beersheba chingnü tsahmusu; tüsho Israel tsührübonü arü abuh Jakob, arü tsührübo, tüsho arü niuberübo, Pharaonü api hanpü mühahkhi khora-lolungbebo chingnü han.

⁶Jumonü arünü Kanan lomi chingnü angükhi arü shiwühbo tüsho kukrukbo lubah, Jakob tüsho api lung anihbuh tsühsoniusobo alala Ijip lim yü.

⁷Api tsührübo tüsho api tsührü tsührübo, api tsührübebo tüsho api tsührü tsührübebo, tüsho api tsühsoniusobo alala anihbuh lung apinü Ijip lim bede yü.

⁸Kheakü Jakob tüsho api tsührübo Ijip lim yürü mung harü lakheah: Jakob tsührü adüjibuh Reuben lakheah.

⁹Reuben tsührübo Hanok, Pallu, Hezron, tüsho Karmi.

¹⁰Simeon tsührübo Jemuel, Jamin, Ohad, Jakin, Zohar, tüsho Kananberü tsührü Shual.

¹¹Levi tsührübo Gershon, Kohath, tüsho Merari.

¹²Juda tsührübo Er, Onan, Shela, Perez, tüsho Zera (tüshe Er le Onan ane Kanan lomi ching sheabah). Perez tsührübo Hezron tüsho Hamul.

¹³Issakar tsührübo Tola, Puva, Job, tüsho Shimron.

¹⁴Zebulun tsührübo Sered, Elon, tüsho Jaleel.

¹⁵Harübo Paddan-aram ching Leanü Jakob kilim api tsührübe Dina bede zübejihkhi tsührübo ah. Api tsührübo tüsho tsührübebo alalanü 33 lakheah.

¹⁶Gad tsührübo Ziphion, Haggi, Shuni, Ezbon, Eri, Arodi, tüsho Areli.

¹⁷Asher tsührübo Imna, Ishva, Ishvi, Beria, tüsho arü niurü alibe Sera. Tüsho Beria tsührübo Heber le Malkiel.

¹⁸Harübo Labannü atsührübe Lea kilim jihkhi Zilpa tsührübo lakheah; tüsho alibenü harü mihtsürü 16 Jakob kilim zübejih.

¹⁹Jakob niube Rachel tsührübo Josep tüsho Benjamin.

²⁰Tüsho Ijip lomi ching On amükeamrü Potiphera tsührübe Asenathnü Jakob kilim Manase tüsho Ephraim zübejih.

²¹Benjamin tsührübo Bela, Beker, Ashbel, Gera, Naaman, Ehi, Rosh, Muppim, Huppim, tüsho Ard.

²²Harübo Jakob tsühsoniusobo 14 ju Rachel kheak yo ah.

²³Dan tsührü Hushim lakheah.

²⁴Naphtali tsührübo Jaziel, Guni, Jezer, tüsho Shillem.

²⁵Harübo Labannü atsührübe Rachel kilim jihkhi Bilha tsührübo lakheah, tüsho alibenü Jakob kilim mihtsürü 7 zübejih.

²⁶Jakob lung yükhi mihtsürü alala, apang ching yo, Jakob tsührübo niuberübo thsürubah alalanü 66.

²⁷Tüsho Ijip ching Josep kilim zübejihkhi tsührü 2 lakheah. Jakob yamkhün Ijip lim yükhi mihtsürü alalanü 70.

²⁸Judüki apinü Josep ki thaa Goshen ching mihleang arüshihpü api müngüh Juda yüshih. Tüsho arübo Goshen lomi ching arü.

²⁹Jumonü Josepnü api khoralolungbe thsakham tüsho abuh Israel shorupü Goshen lim wutu; Josepnü api miki yü akede akhahnü abuh kap tüsho ruhde trip.

³⁰Tüsho Israelnü Josep ki tha, “Kheaküa I sheanü, tümütüsho inü nü miro ngüdo, tüsho nü kheakü khiungde lah.”

³¹Judüki Josepnü akeoniorübo le abuh yamkhün ki tha, “I wutubah tüsho Pharao ki thabah, ‘Kanan lomi ching lakhi I keoniorübo tüsho I buh yamkhün I kilim arüdo.

³²Tüsho mihtsürübo ju namfimihnu neakrübo ah, tümüde arü rhimobo ju shiwüh kümpü lakheah; tüsho arünü arü mihnubo le moshibo tüsho arü lakhi alala lude arüa lah.’

³³Jumonü küyimki Pharaonü nüsa jibah athaba, ‘Nüsa rhimo tümü a?’

³⁴Nüsanü alobah, ‘Isa le isa abuh chido isa athunuchokinü isa rhimo ju shiwüh kümde arükheah,’ junangde nüsa Goshen lomi ching labah; tümüde namfimihnu neakrübo ju Ijiprü ki athraneanbe lah.”