Read Yimchungru Naga Thrün 47 Bible Online

Thrün 47 - Yimchungru Naga bible

Thrün 47

¹Judüki Josepnü yü tüsho Pharao ki tha, “I buh le I keoniorübo, arü mihnubo le moshibo tüsho arü lakhi alala Kanan lomi chingnü arüa lah; tüsho arübo Goshen lomi ching lah.”

²Tüsho apinü akeoniorü bolungnü mihtsürü 5 bea lubah Pharao ki yü.

³Judüki Pharaonü api keoniorübo ki tha, “Nüsa rhimo tümü a?” Tüsho arünü Pharao ki alo, “Nü yamlarübo isa jipü lungkinü namfimihnu neakrübo ah.”

⁴Arünü Pharao ki tha, “Isabo lomi ching lacholapü arükheah, tümütüsho nü yamlarübo mihnu boto thsungkheak rimlopung müla, tümüde khümzung ju Kanan lomi ching muthsukde lah. Kheakü jumonü, muzhobah nü yamlarübo Goshen lomi ching lashang.”

⁵Judüki Pharaonü Josep ki tha, “Nü buh le nü keoniorübo nü kilim arüdo.

⁶Ijip lomi nü müngüh lah. Nü buh le nü keoniorübo lomi atsübe ching lashang; arübo Goshen lomi ching lashang. Tüsho nünü mulonglamkhi mihtsürü arü bolung mükheahsho, I yo shiwüh kurungkheak aberü thsüshang.”

⁷Judüki Josepnü abuh Jakob bea lubah Pharao miki yü; tüsho Jakobnü Pharao müngühjih.

⁸Pharaonü Jakob ki tha, “ Nü kam küdükhüh a?”

⁹Jakobnü Pharao ki alo, “I rümde atsahkhi kambo 130 ah; I kambo ju nüklah tüsho küpkhuk lado, tüsho jurünü I buh pürü rümde atsahkhi kambo mukhiung.”

¹⁰Jumonü Jakobnü Pharao müngühjih, tüsho Pharao mikinü wukhiuk.

¹¹Tüsho Pharaonü thiyukhüm jihkhi nangde Josepnü abuh le akeoniorübo lashih, tüsho Ijip lomi ching, Rameses lomi atsüdakbe yamalobo arü kilim jih.

¹²Judüki Josepnü abuh, akeoniorübo tüsho abuh yamkhün alala kilim arü wühkhe ayannü tsühyungbe jih.

¹³Kheakü lomi alala ching tsühyungbe mülade alakheah; tümüde khümzung ju khide muthsukde la, junangde Ijip tüsho Kanan lomi alala khümzung hode yiuhyiuhde kam.

¹⁴Tüsho Josepnü Ijip tüsho Kanan lomi ching arünü hi thulokhi dün sho alala hanmukhung; tüsho Josepnü sho ju Pharao yam ching lude yü.

¹⁵Jumonü küyimki Ijip tüsho Kanan lomi ching sho bahkhamkhea, Ijiprü alalanü Josep ki arü tüsho tha, “Isa kilim tsühyungbe jihang, tümüde isa nü miki sheshihpü? Tümüde sho bahkhamdo.”

¹⁶Josepnü alo, “Sho bahkhama lasho, nüsa shiwühbo lubah arang, tüsho nüsa shiwühbo dün inü nüsa kilim tsühyungbe jihbah.”

¹⁷Jumonü arünü arü shiwühbo Josep kilim hande arü, tüsho Josepnü arü kilim khorabo, mihnubo, moshibo tüsho donkibo müthri tsühyungbe jih. Hanangde apinü arü shiwühbo müthri ju kam arübo tsühyungbe ahiuh-a jih.

¹⁸Küyimki ju kam kheamkhea, arünü ashikampü api kilim arü tüsho tha, “Isa sho bahkhamkhi isanü isa tungpuh ki müram; isa shiwühbo isa tungpuh yo ah. Isa tungpuh miki tümü she aninga müla tüshe isa pangbo tüsho isa lobo lang ah.

¹⁹Tümüde isa nü miki isa le isa lo chido dükheakpü? Tsühyungbe dün isa le isa lo thuloang, tüsho isa le isa lo Pharao yamlarü thsübah; isa müshede rhangdung lapü thsüde isa kilim müjih jihang, junangde alo mübahkhit.”

²⁰Jumonü Josepnü Ijip lo alala Pharao thsungkheak thulo; tümüde Ijiprü abannü nihbuh lu yin, tümütüsho arü kheak khümzung ju muthsukde alakheah. Junangde alo ju Pharao yo kamabah,

²¹tüsho Josepnü mihtsürübo ju Ijip akheam khülimnü thripkhüh khiungde arü azhorü kamshih.

²²Amükeamrübo lo lang apinü muthulo; tümüde amükeamrübo a Pharaonü arü kilim tsühyungbe shihcham thsüa jih, tüsho arünü ju tsüh; jumonü arünü arü lobo müyin.

²³Judüki Josepnü mihtsürübo ki tha, “Khihni inü nüsa le nüsa lo Pharao thsungkheak thulodo. Kheahang, ha ching nüsa thsungkheak müjih lah, tüsho alo ching yangzüyangdobah.

²⁴Tüsho nüsanü yimluchoki phüngü ching shihchamkhüh Pharao kilim jihbah. Shihcham phüyi ju thulu ching müjih thsüpü tüsho nüsa le nüsa yamkhünbo tüsho nüsa tsührü aninibo thsungkheak tsühyungbe labah.”

²⁵Arünü alo, “Nünü isa rhangdungbo khümkhitdo; isa tungpuh miki isa amuzho ngüshang, tüsho isa Pharao yamlarübo thsübah.”

²⁶Tüsho amükeamrübo lo Pharao yo mükamkhi kheak hode, Pharaonü phüngü ching shihchamkhüh lupü Ijip lomi ching khihni ha khiungde yakzan khülang thsü.

²⁷Jumonü Israelrü Ijip lomi, Goshen lo ching la; tüsho ju ching yamalobo lakheah tüsho khide wüh bu.

²⁸Tüsho Jakob ju Ijip lomi ching kam thürükheak thüne la. Jumonü Jakob kam 147 azorü lakheah.

²⁹Küyimki Israel ashepü kim khiungkheanü, apinü atsührü Josep ji tüsho api ki tha, “Kheakü I nü miki amuzho ngüa lasho, muzhobah I pho dükeak nü khah yukang, tüsho I ki muzhode thiyuronü rhimoang. Muzhobah Ijip ching I mi dübah,

³⁰tüshe küyimki I jipürü lung yapbanü, nünü Ijip chingnü I hankhitang, tüsho arü mibahpung kiuyuka bahang.” Tüsho Josepnü alo, “Nünü athakhi nangde isanü arhimobah.”

³¹Apinü tha, “I ki thiyuchihchimang.” Tüsho apinü anihbuh ki thiyuchihchim. Judüki Israelnü anihbuh yapkiu kumung lim mükhümabah.