Read Yimchungru Naga Thrün 49 Bible Online

Thrün 49 - Yimchungru Naga bible

Thrün 49

¹Judüki Jakobnü atsührübo ji, tüsho tha, “Nüsa rukhüh mukhungang, junangde arübe nimungbo ching nüsa kheak tümü dünjipü lanü inü nüsa ki thaanü:

²Mukhungang tüsho soang, O Jakob tsührübo, tüsho nüsa abuh Israel ki aniang.

³Reuben, nü I tsührü adüjibuh, I sühmüh, tüsho I sühmüh akhuh sangaso, wüntre ching hodaklah, wu ching hodaklah.

⁴Nü a düchi nangde lah, tüshe khide adungto mükam, tümüde nünü I hanniube lung müyam tüsho nü buh yapkiu wüntre müjih. @SPACE =

⁵Simeon tüsho Levi keonione ah; athsümünimpü thsühnukbo ju ane nukshangbo ah.

⁶O I me, arü aramyu asukachihkhi ching düyüzah; O I me, arü bolung dübe; tümüde arü bukakhiukkhi ching arünü mihtsürü laksahchoh; tüsho arü künkhi ching moshipungbo jing lipshakchoh.

⁷Arü bukakhiukkhi muthrumünean thsang, tümüde ju amüshak ah; tüsho arü mulong zhipzhip kheak, tümüde ju bukmüke ah! Inü arü Israel lomi ching hiumüzütshihbah, tüsho mihtsürü bolung müzütshihbah. @SPACE =

⁸Juda, nü keoniorübonü nü shijihbah; nü khah ju nü riribo hung kheak labah; nü buh tsührübonü nü miki khukningbah.

⁹Juda a kekhüzü nunu nangde lah; I tsah-a, nü shih limnü alode arüdo. Kekhüzü nangde apinü züngzhichoh tüsho yapchoh, kekhüzü dreto nangde — shepünü api yihmusukhukba?

¹⁰Judanü kiulongthsü tso zhimbah, tüsho api tsühsoniusobonü kamruhroro yakzan shuhbah. Trükshihbonü api kilim ruk hande arübah tüsho api miki wüntre jihde khukningbah.

¹¹Apinü anihbuh yo donki nunu kurungasolu atsüdakbe kheak chingchoh, api khimmihbo yukhu chingnü,api shulünkhimbo kurungasoke-mürüm chingnü amüsühbah.

¹²Api mükjibo yukhunü mürümlah, tüsho niuhkenü ahü müyelah. @SPACE =

¹³Zebulun a keto yean labah; ju sangkungbo zopung thsübah tüsho api aredung ju Sidon kheak labah. @SPACE =

¹⁴Issakar a sühmüh lakhi donki ah, hah mahne dükeak yaplah;

¹⁵Tüshe apinü sühakhim dangpung ju tsüde tüsho alo ju asühpü thsüde ngü. Jumonü apinü hah hanpü adüthsün mükhümchoh tüsho azhorü nangde reangkih-a rhimochoh. @SPACE =

¹⁶Dannü Israel trükshihbo lung khülang thsüde api mihtsürü mahkhapbah.

¹⁷Dan ju limro yean phuruto, limtsahpung yean müzüm phuruto thsübah, junangde khora lahzhibo mukiubah ju kheak binrü dunglim ayokhibah. @SPACE =

¹⁸Inü nü akhümkhit aleanglah, O ATUNGPUH . @SPACE =

¹⁹Ayanrünü Gad zündobah, tüshe apinü rholobah arü yande amüshambah. @SPACE =

²⁰Asher ching latsühlayungbah, apinü kiulongthsürü tsühyungpü thülünkhi jihbah. @SPACE =

²¹Naphtali a ayangngu shihmüchi nangde, anunubo akheahakham anujihkhi lah!

²²Josep a kenü ching mütüm donki, awung yean mütüm khora pung nunu nangde lah.

²³Api riribonü müzhakde api zündo tüsho arü sanglühbo le hühzobo shuhbah api yande müsham.

²⁴Tüshe Jakob Thrünpuh Wuto wu, namfimihnu neakrü, Israel kümdorü hode api sanglüh tsüde la, tüsho api khah düküngde kamshih,

²⁵tümütüsho nü buh Thrünpuhnü nü rungchoh, tümütüsho Wutonü achanglimnü tsüng tüsho alo alunglimnü kebo, shiwühbo tüsho tsührübo ahihdo jihde müngühjih.

²⁶Nü buh pürü müngühmühi ju jipü müzüngbo, adüso wungbo hihdakkhi kheaknü atobe ah; jurübo Josep ku kheak, api keoniorübo kheaknü achamkhikhi kingkang kheak lashang.

²⁷Benjamin a arhüngrhüng rimre ah, yapsu shih tsühchoh, tüsho arelim ayankhikhibo chamchoh.

²⁸Harü ha Israel trük 12 ah, tüsho hanangde nihbuh aban ayekhi müngühmühi apinü arü kilim müngühjihchoki arü abuhnü arü ki thakheah.

²⁹Judüki apinü arü ki thsangdande tha: “I a I mihtsürü lung yüpü lah; Hitrü Ephron lu ching lakhi lungkhün ching I buh pürü lung I mi bahang,

³⁰Kanan lomi ching, Mamre müngüh Makpela ching ah. Abrahamnü ha lungkhün tüsho thulu ju mibahpung thsüpü Hitrü Ephron ki thulokheah.

³¹Ju ching arünü Abraham tüsho aniube Sara kiuyukabah; ju ching arünü Isak tüsho aniube Rebeka kiuyukabah, tüsho ju ching inü Lea kiuyukabah.

³²Ju ching thulu tüsho lungkhün ju Hitrü ki thulokheah.”

³³Küyimki Jakobnü api tsührübo thsangdankhi bankhea, api jingbo yapkiu kheak chunga yüshih tüsho sheak kheamabah, tüsho anihbuh mihtsürü lung yü.