Read Yimchungru Naga Thrün 50 Bible Online

Thrün 50 - Yimchungru Naga bible

Thrün 50

¹Judüki Josepnü abuh miro kheak hüpkihbah trip tüsho api kheak müthsüp.

²Tüsho Josepnü api yamlarü moli-mükheahrübo ki abuh ju moli mujushihpü thiyukhüm jih. Jumonü moli-mükheahrübonü Israel kheak moli muju;

³moli mujua mushuhshihpü ju nimung yirü lakheah. Tüsho Ijiprübonü api thsungkheak nimung nerü tüzho.

⁴Küyimki atüzhopü nimung hokhea, Josepnü Pharao yamkhün ki tha, “I nü miki amuzho ngüa lasho, muzhobah Pharaonü sode I ki thaang,

⁵‘I buhnü I ki thiyuchihchimshihde tha, “Kheahang, I ashepü lah; Kanan lomi ching inü I thsungkheak kiukhi kiuyuk ching nünü I mi bahang.” Jumonü kheakü I wutushang tüsho I buh mi bahanü, tüsho I alode arübah.’”

⁶Tüsho Pharaonü alo, “Wutuang tüsho apinü nü ki thiyuchihchimshihkhi nangde nü buh mi bahang.”

⁷Jumonü Josepnü abuh mi bahpü wutu; tüsho api lung Pharao yamlarübo alala, api yam azothsürübo tüsho Ijip lomi azothsürübo alala wutu,

⁸Josep yamkhün she alala, api keoniorübo, tüsho abuh yamkhün. Arü tsührü aninibo, arü mihnubo tüsho moshibo lang arünü Goshen lo ching zojih.

⁹Tüsho ju ching api lung khoralolungbebo tüsho khoraberübo wutu, tüsho ju khide hihde mukhunga lakheah.

¹⁰Küyimki arübo Jordan hobah Atad rhimopung ching arükhea, arünü khide tode mulong rozhakde tüzho. Josepnü nimung thüne abuh tüzho.

¹¹Küyimki lomi ching larü, Kananrübonü Atad rhimopung ching tüzhokhi ngükhea, arünü tha, “Ha Ijiprü mulong rozhakde tüzhokhi ah.” Jumonü Jordan phüni ju dangpung ki Abel Mizraim de ji.

¹²Jumonü apinü arü ki thiyukhüm jihkhi nangde atsührübonü rhimo.

¹³Tümüde atsührübonü api Kanan lomi ching hande yü, tüsho Abrahamnü mibahpung thsüpü Hitrü Ephron ki thulu bede athulokhi, Mamre müngüh Makpela ching thulu lungkhün ching kiuyukabah.

¹⁴Tüsho apinü abuh mi bahshu, Josep tüsho api keoniorübo le api lung abuh mi bahpü wuturü alala Ijip lim alode arü.

¹⁵Arü abuh sheabah dunglim Josep keoniorübonü tha, “Khükia Josepnü isa thraneanbah, tüsho isanü api ki amütsü rhimokhi atsütsünü athrihlopü labah.”

¹⁶Jumonü arünü Josep kilim yunithsürübo yüshihde tha, “Nü buh müshechoki, apinü thiyukhüm jih:

¹⁷‘Nüsanü Josep ki ha thaang: “Inü nü ki mushuchoh, muzhobah nü keoniorübonü alakmihkhi tüsho arü neak bahjang; tümüde arünü nü ki amütsü rhimodo.” ’ Kheakü muzhobah nü buh Thrünpuh yamlarübonü alakmihkhibo neak bahjang.” Küyimki arü yusheak api ki arükheanü, Josepnü trip.

¹⁸Judüki api keoniorübonü she yü tüsho api miro ki mükhüm tüsho tha, “Kheahang, isa nü yamlarübo ah.”

¹⁹Josepnü arü ki tha, “Dütre, I a Thrünpuh ah düpü?

²⁰Nüsa thsungkheak a, nüsanü I azhihde amütsü thsükhi lah; tüshe Thrünpuhnü a khihni hanangde mihtsürü ahihdo rhangdung khümkhitpü atsü thsungkheak lah.

²¹Jumonü kheakü, dütre; inü nüsa le nüsa tsührübo thsungkheak jihchungbah.” Apinü arü mulong shukheam tüsho arü ki muzhode asuk.

²²Junangde Josep tüsho abuh yamkhün Ijip ching la. Tüsho Josep kam 110 lakheah.

²³Josepnü Ephraim tsührübo lün mahsam khiungde ngü.

²⁴Tüsho Josepnü api keoniorübo ki tha, “I shechoh; tüshe Thrünpuhnü tsükjide nüsa rhua kheahbah, tüsho ha lomi chingnü bekhitde apinü Abraham, Isak tüsho Jakob ki thiyuchihchimkhi lomi ching yübah.”

²⁵Judüki Josepnü Israel tsührübo ki thiyuchihchimshihde tha, “Thrünpuhnü tsükjide nüsa rhuakheahbah, tüsho nüsanü I robo ha chingnü lude awutubah.”

²⁶Junangde Josep kam 110 azorü thsübah Ijip chingnü sheabah; tüsho arünü api kheak moli muju, tüsho kung ching yuk.