Read Yimchungru Naga Thrün 7 Bible Online

Thrün 7 - Yimchungru Naga bible

Thrün 7

¹ATUNGPUHNÜ Noa ki tha, “Nü tüsho nü yamkhün alala sangkung ching yüzahang, tümütüsho ha lün ching I miki nü lang thiyurolungki ah de inü ngüdo.

²Nünü amüsüh shiwüh mungji aban drepung thünene luang; tüsho mümüsühkhi shiwüh mungji aban drepung mahnene luang;

³kheaküshe wuhnu mungji aban drepung thünene alomi alala ching mungji aban lashihpü luang.

⁴Nimung thüne dunglim inü thrüna rhangdung lashihkhi alala alomi chingnü dükheakshihpü alomi kheak nimung yirü tüsho tsüngre yirü tsüng arüshihbah.”

⁵Tüsho ATUNGPUHNÜ api ki thiyukhüm jihkhi yande Noanü lüpdükhi rhimo.

⁶Alomi kheak keking arüchoki Noa kam 600 lakheah.

⁷Tüsho Noa le atsührübo tüsho aniube le atsührü niuberübo keking chingnü atsokhitpü sangkung ching yüzah.

⁸Amüsüh tüsho amümüsüh shiwüh, wuhnu tüsho alo kheak abüde atsahbe drepungbo,

⁹pung tüsho dre, Thrünpuhnü Noa ki thiyukhüm jihkhi nangde Noa kilim arü tüsho sangkung ching yüzah.

¹⁰Tüsho nimung thüne dunglim alomi kheak keking arü.

¹¹Noa kam 600 lachoki, khinu mahnepü, thürükheak thüne nipü kenü asükbo alala jukphuk tüsho thüning ayinripitbo khimshuh.

¹²Tüsho tsüng ju alomi kheak nimung yirü tüsho tsüngre yirü arü.

¹³Ju nimungnü Noa le atsührübo Shem, Ham, Japheth, tüsho Noa niube le atsührü mahsam niuberübo sangkung ching yüzah.

¹⁴Arü lung shiwüh mungji aban, akam-shiwüh tüsho mütüm shiwüh, ato tüsho anini, tüsho wuhnu mungji aban lakheah.

¹⁵Rhangdung sheak lakhi loriloko drepung alala Noa kilim arü tüsho sangkung ching yüzah.

¹⁶Shiwühbo yüzahde alakhi ju Thrünpuhnü Noa ki thiyukhüm jihkhi nangde rhangdung lakhi aban pung tüsho dre lakheah; tüsho ATUNGPUHNÜ api alunglim khimdoabah.

¹⁷Kheakü keking ju alomi kheak nimung yirü tüsho tsüngre yirü lakheah. Kebo alü kam tüsho sangkung ju alomi kumung changde phungkih.

¹⁸Ke ju yükih tüsho alomi kheak tode alü kam, tüsho sangkung ju kemi kheak phung.

¹⁹Ke ju hodakde alomi kheak yükih, tüsho thüning bukkhüp awung achangbo alala kingdoabah.

²⁰Ke yükih tüsho khahnap 15nü sükde awungbo kinghoa lakheah.

²¹Alomi ching rhangdung lakhi alala — wuhnubo, akam-shiwühbo, mütüm shiwühbo, alo kheak abübe loriloko alala sheabah.

²²Alo akung kheak nupung ching sheak thsübe lüpdükhi sheabah.

²³Junangde apinü alomi kheak rhangdung lakhi alala: mihtsürü tüsho shiwühbo, abüde atsahbe tüsho thüning wuhnu dükheakshih. Noa tüsho api lung sangkung ching larü lang aninga lakheah.

²⁴Tüsho ke ju alomi kheak nimung chikheak thünim kingde alakheah.