Read Yimchungru Naga Thrün 9 Bible Online

Thrün 9 - Yimchungru Naga bible

Thrün 9

¹Jumonü Thrünpuhnü Noa tüsho atsührübo müngühjih, tüsho arü ki tha: “Aso asode wüh buang, tüsho alomi mide kamang.

²Tüsho alomi shiwüh, thüning wuhnu, alo kheak abübe tüsho keto ngüh alala kheak nüsa trekhi labah. Arübo nüsa khah ching jihdo.

³Aphapde rhangdung lakhi lüpdükhi nüsa thsungkheak tsühyungbe labah. Sangrung phüyakbo alala inü nüsa kilim jihdo.

⁴Tüshe nüsanü rhangdung-thiyih bede shih mütsühbeah.

⁵Tüsho nüsa rhangdung-thiyih thsungkheaknü tsükjide inü ju dün kheangbah. Shiwüh tüsho mihtsürü aban kheaknü akheangbah. Mihtsürü aban kheaknü nihbuh keoniorü rhangdung dün kheangbah.

⁶Shepünü mihtsürü thiyih bukbanü, mihtsürünü api thiyih bukshihbah; tümüde Thrünpuh kiphahkhi ching mihtsürü ju thrün.

⁷Tüsho nüsa thsungkheaknü, tsührü laang tüsho wüh buang; alomi ching hihde kamshang tüsho bushang.”

⁸Judüki Thrünpuhnü Noa tüsho atsührübo ki tha:

⁹“Kheakü inü nü tüsho nü dunglim nü tsühsoniusobo kheak I tangzüng thsüchoh,

¹⁰tüsho nü lung lakhi loriloko aban kheak: wuhnubo, akam-shiwüh tüsho nü lung sangkung chingnü wukhiukkhi alomi shiwüh alala.

¹¹Hanangde nüsa kheak I tangzüng thsüchoh: kheaküa küyimkishe rhangdung alala kekingnü müdükheakshih; alomi dükheakshihpü kheaküa keking mülalo.”

¹²Tüsho Thrünpuhnü tha, “Ha I le nü, tüsho nü lung lakhi loriloko alala dükeak inü tangzüng thsükhi amütsan, arübe lünbo alala thsungkheak lah:

¹³Inü I yo mürechin amobo ching zolah, tüsho ha I le alomi dükeak tangzüng amütsan labah.

¹⁴Küyimki inü alomi kumung amobo hande arübah ju ching mürechin akhiukbanü,

¹⁵inü I le nü tüsho rhangdung labe loriloko mungji alala dükeak I tangzüng lümkhitbah. Rhangdung alala dükheakshihpü küyimkishe keking malodarü.

¹⁶Küyimki amobo ching mürechin akhiukbanü, inü ju kheahbah tüsho Thrünpuh le alomi kheak rhangdung lakhi loriloko mungji alala dükeak akheam müla I tangzüng lümkhitbah.”

¹⁷Jumonü Thrünpuhnü Noa ki tha, “Ha I tüsho alomi kheak rhangdung alala dükeak inü athsükhi tangzüng amütsan ah.”

¹⁸Sangkung chingnü awukhiukkhi Noa tsührübo ju Shem, Ham, tüsho Japheth. Tüsho Ham ju Kanan abuh lakheah.

¹⁹Harü mahsam ha Noa tsührübo lakheah, tüsho harü kheaknü alomi alala bude yü.

²⁰Noa thulu thsürü thsüpü tankih, tüsho apinü kurungasolu thsü.

²¹Judüki api yukhu yungbah müshang, tüsho anihbuh khimyam ching bünkeang lakheah.

²²Tüsho Kanan abuh Hamnü abuh bünkeang lakhi ngübah wungdo ching api keoniorü mahne ki tha.

²³Tüshe Shem le Japheth bünenü ane ngam kheak khim züngkih-a lubah dunglimnü ashitde yünü arü abuh bünkeang lakhi phudojih. Ane miro anguhabah tüsho anenü arü abuh bünkeang lakhi müngü.

²⁴Küyimki Noa amüshangkhi chingnü asürükhea, atsührü akheambuhnü api kheak tümü rhimokheanü mükheahde kam.

²⁵Apinü tha, “Kanan muthrumünean thsang; api keoniorübo ki akheamkhibe azhorü thsübah.”

²⁶Kheaküshe apinü tha, “Shem Thrünpuh, ATUNGPUH shiang! Kanan a Shem azhorü thsüshang.

²⁷Thrünpuhnü Japheth lomi mükahde kamshang; Japheth a Shem khimyambo ching lashang, tüsho Kanan ju api yo azhorü thsüshang.”

²⁸Keking dunglim Noa kam 350 la.

²⁹Noa kam alalanü 950 lakheah, tüsho api sheabah.