Read Yimchungru Naga 2 Sam 1 Bible Online

2 Sam 1 - Yimchungru Naga bible

2 Sam 1

¹Saul she dunglim, küyimki David Amalekrü kukbah alodarükhea, api Ziklag ching nimung mahne mung.

²Nimung asampü ching mihtsürü khülang khim thorüpa tüsho aku kheak alo yihkihbah Saul binkheampung chingnü arü. Küyimki api David ki arükhea, apinü akin jihde alo kheak mükhüm.

³Davidnü api ki tha, “Nü küchingnü arükhea?” Apinü alo, “I Israel binkheampung chingnü tsokhide arükheah.”

⁴Davidnü api ki tha, “Künangde adünjikhea? I ki thaang!” Apinü alo, “Bonungrü keochihpung chingnü alihde tsodo, tüshe bonungrü ahihdo keamdo tüsho shedo; tüsho Saul le atsührü Jonathan she shedo.”

⁵Judüki Davidnü api ki thiyusheak jihrü athrününgtsüngbuh ki keokhi, “Saul tüsho api tsührü Jonathan shekhi nünü küde thsah mükheahla?”

⁶Athrününgtsüngbuhnü api ki thiyusheak jihde tha, “I Gilboa wung kheak lakheah; tüsho küyimki lolungbe le khoraberü api thüninkheanü Saulnü athsüh kheak keamkih.

⁷Küyimki apinü I rholoa kheahkhea, apinü I ngü, tüsho I ji. Inü alo, ‘I ha ching lah.’

⁸Tüsho apinü I ki tha, ‘Nü shepü a?’ Inü api ki alo, ‘I Amalekrü ah.’

⁹Apinü I ki tha, ‘ Arang, I kheak zhipang tüsho I laksahang; tümüde I yuria lah, tüshe I müsheyi.’

¹⁰Jumonü inü api kheak zhip tüsho api laksah, tümüde api lungabahshu rhangdung mülakhuk de inü mükheah. Inü aku kheak kihkhi kuthran tüsho abin kheak yo bingkhüm lubah ha ching I tungpuh ki lubah arükheah.”

¹¹Judüki Davidnü akhim kheak tholobah rukrüp; tüsho api lung larü mihtsürü alalanü ju ruk thsü.

¹²Arünü tüzhode mitrip, tüsho Saul le atsührü Jonathan, tüsho ATUNGPUH bonungrü tüsho Israelrü thsungkheaknü arelim khiungde khümkeak thsü, tümütüsho arübo nukshangnü keamshih.

¹³Davidnü api ki thiyusheak jihrü athrününgtsüngbuh ki tha, “Nü küchingnü arükhea?” Apinü alo, “I khiungkerü tsührü Amalekrü ah.”

¹⁴Davidnü api ki tha, “ATUNGPUH mihtsürü mujude-mokhitkhi laksahpü thsüde nü khah shuhkihpü nünü mütrekhea de?”

¹⁵Judüki Davidnü athrününgtsüng khülang ji tüsho tha, “Ha kheak arang tüsho api kinga lungshang.” Jumonü apinü kinga lungshih tüsho sheabah.

¹⁶Davidnü api ki tha, “Nü ku kheak nü thiyih kihbah; tümüde nü münnü nü azhihde thiyumütsan jihde tha, ‘Inü ATUNGPUH mihtsürü mujudemokhitkhi laksahdo.’ ”

¹⁷Davidnü Saul tüsho atsührü Jonathan tüzhode khün thsüpü tankih.

¹⁸( Sanglüh khün thsüpü Juda mihtsürübo ki huhang de apinü thiyukhüm jih; ha Jasher Hüm ching thrüta lah):

¹⁹O Israel, nü müretahkhi nü wung achangbo kheak laksah-a yaplah! Küdükhüh wuto keamde!

²⁰Gad ching dütha, Ashkelon kiudunglimrobo ching düzhi; jude yungsho Filistiarü tsührübonü asühachihbah, tsütamübahkhi tsührübonü asühachihbah.

²¹O Gilboa wungbo, nü kheak ayinke yungsho tsüng dakishih, ju lubo ching hi dakhiukshih! Tümüde ju ching wulakhi tsung thsümünimabah, oliv müdangkenü mujukhi Saul tsung kheaküa müla.

²²Alaksahkhi thiyih chingnü, wuto müdang chingnü, Jonathan sanglüh murholo, yungsho Saul nukshang akeangkeang malodarü.

²³Saul tüsho Jonathan, amuzhodakkhi tüsho atsüdak! Rhangdung lachoki tüsho ashechoki ane mazü; ane müleangtopü kheaknü athribe lakheah, ane kekhüzübo kheaknü sühmüh lakheah.

²⁴O Israel tsührübo, Saul mitripang, shepünü nüsa kheak shoto mürümbo phuyujihkhea, shepünü nüsa khim kheak suna zütbo yihkihjihkhea.

²⁵Küdükhüh wuto keochihpung lungkhea! Jonathan awung achangbo kheak shea yaplah.

²⁶I nü thsungkheak mulong rozhaklah, I keonio Jonathan; nünü I kheak khide muzhodakde alakheah; nünü I muzhokhi amüyinsahbe, aliberü muzhokhi kheaknü alü lakheah.

²⁷Küdükhüh wuto lung de, tüsho thirithsü thsühnukbo dükheak de!