Read Yimchungru Naga 2 Sam 11 Bible Online

2 Sam 11 - Yimchungru Naga bible

2 Sam 11

¹Mükheankim ching, kiulongthsüpuhnü thirithsü yüchoki, Davidnü Joab lung atorübo tüsho Israel alala bebah yüshih; arünü Amonrü kuk tüsho Rabba kiuto yanabah. Tüshe David a Jirusalem ching bin.

²Ha dünji, arelim küyimki David ayapkiu kheaknü asürübah kiulongthsürü yam kumung tsahde alakhea, apinü aliberü khülang kemüyihde thüyam kheaknü ngü; alibe ju khide akheahpü atsü lakheah.

³Alibe dünkheak keokhikeorashihpü Davidnü khürü yüshih, tüsho hanangde thalo, “Ha Eliam tsührü Hitrü Uria niube ah.”

⁴Jumonü anihbe lupü thsungkheaknü yunithsürü yüshih, alibe ju api kilim arü, tüsho apinü alibe lung yap. ( Kheakü alibe khinu shihcham yü dunglim tsangkhitde alakheah.) Jushu alibenü ayam lim alode yü.

⁵Alibe mübünkeangde kam; tüsho alibenü David kilim thaa yüshih, “I mübünkeangde lah.”

⁶Jumonü Davidnü Joab kilim thiyusheak yüshih, “Hitrü Uria I kilim arüshang.” Tüsho Joabnü Uria ju David kilim yüshih.

⁷Küyimki Uria api kilim arükhea, Davidnü Joab tüsho mihtsürübo tsüde la shi müla, tüsho thirithsükhi kürukanü keokhi.

⁸Judüki Davidnü Uria ki tha, “Nü yam lim yükiang, tüsho nü jing müsühang.” Urianü kiulongthsüpuh yam chingnü wukhiuk, tüsho ju yanalünde kiulongthsüpuhnü api kilim thsambah khülang jih.

⁹Tüshe Urianü kiulongthsüpuh yam ripit ki kiulongthsüpuh aheangrü bolung yap, tüsho api yam lim müyüki.

¹⁰Küyimki arünü, Uria ayam lim müyüki de David ki thakhea, Davidnü Uria ki tha, “Nü kheakü hantsahkhi chingnü arüdo. Tümü thsükhi nü yam lim müyüki le?”

¹¹Urianü David ki tha, “Sangdan tüsho Israel le Juda khimyam ching lah; tüsho I tungpuh Joab tüsho I tungpuh yamlarübo mükeak ching binkheamchoh; dale tüsho tsühyungpü tüsho I niube lung yappü I thüyam lim yüba shi? Nü rhangdung lakhi khiungde, inü hadürü mürhimo.”

¹²Judüki Davidnü Uria ki tha, “Khihni she ha ching mungang, tüsho inü nü thiyia yüloshihbah.” Jumonü Urianü ju nimung tüsho ashidopü Jirusalem ching mung.

¹³Davidnü api ju tsühyungpü api miki jiyuk tüsho api müshangshih; tüsho arelim api tungpuh yamlarü lung binkiu kheak yappü wukhiuk, tüshe apinü ayam lim müyüki.

¹⁴Yapsu Davidnü Joab kilim kihüm thrüt, tüsho Uria khah chingnü mühah.

¹⁵Kihüm ching apinü ha ruk thrüt, “Keochihkhi amuthsuk mikhuh limpeang, Uria yüshang, tüsho api kheaknü zuhloang, junangde api laksahshihbah.”

¹⁶Joabnü kiuto yanchoki, apinü amükheahkhi athrungrü lapung ching Uria yüshih.

¹⁷Kiuto ching larü mihtsürübo akhiukbah Joab bede keochih; tüsho David yamlarü mihtsürü bolung khürü lungabah. Hitbuh Uria she laksah.

¹⁸Judüki Joabnü David kilim keochihkhi yusheak alala yüshih;

¹⁹tüsho apinü yunithsürü ki thathünak, “Küyimki nünü keochihkhi yusheak alala kiulongthsüpuh ki thakhambanü,

²⁰tüsho kiulongthsüpuhnü abukakhiuksho tüsho apinü nü ki thasho, ‘ Tümüde nüsa kiuto khide phünide keochihpü yükhea? Arünü chipi chingnü hühzo kipbah de nüsanü mümükheahkhea de?

²¹Jerubbaal tsührü Abimelek shepünü alaksahkhea? Aliberü khülangnü achanglim hizübe-lung shuh-a chipi chingnü api kheak kingbah anihbuh Thebez ching shekhi yung de? Tümüde nüsa khide chipi phünide ayükhea?’ judüki nünü athabah, ‘Nü yamlarü Uria, Hitbuh thsü she shedo.’ ”

²²Jumonü yunithsürünü yü tüsho Joabnü api kheak thaa mühahkhi alala David ki tha.

²³Yunithsürünü David ki tha, “Thiriribo isa kheaknü amürangbe thsüdo, tüsho isa azhihde mükeak ching akhiukdo; tüshe isanü arü ripit limro khiungde yanlode yüdo.

²⁴Judüki sanglüh shuhrünü chipi chingnü nü yamlarübo kheak hühzonü kip; kiulongthsüpuh yamlarü khürü a shedo; tüsho nü yamlarü Hitbuh Uria she sheabahdo.”

²⁵Davidnü yunithsürü ki tha, “Nünü ha Joab ki thaang, ‘ Hadürünü nü düniuknimshih, tümüde kheakü nukshangnü khülang she tüsho püpü she muyuabahchoh; kiuto yanpü müküpang, tüsho ju yanabahang.’ Tüsho api mulong thurumusuang.”

²⁶Uria niubenü küyimki aniubuh shekhi sokhea, anihbenü api mitrip.

²⁷Küyimki yapsu hokhea, Davidnü yüshihbah alibe ayam ching bebah arü, tüsho anihbe api niube kam, tüsho api kilim tsührü athrürü khülang zübejih. Tüshe Davidnü arhimokhinü ATUNGPUH masühde kam.