Read Yimchungru Naga 2 Sam 14 Bible Online

2 Sam 14 - Yimchungru Naga bible

2 Sam 14

¹Kheakü kiulongthsüpuh lümkhi Absalom kheak lah de Zuria tsührü Joabnü mükheah.

²Joabnü Tekoa lim yüshih tüsho ju chingnü lümlung larü aliberü khülang bebah arü. Apinü alibe ki tha, “Atüzhorü khülang ruk rük thsüang; atüzhokhi khimmihbo yukang, nü kheak müdangke dümuju, tüshe mihshekhi dünkheak nimung ashang tüzhokhi aliberü khülang nangde yakli huhang.

³Kiulongthsüpuh ki yüang tüsho api ki ha ruk asukang.” Tüsho tümü thabeanü Joabnü alibe ki thaa jih.

⁴Küyimki Tekoa liberü kiulongthsüpuh ki arükhea, alibenü alo kheak khukning tüsho akin jihde tha, “Rungang, O kiulongthsüpuh!”

⁵Kiulongthsüpuhnü alibe ki keokhi, “Nü küpkhukkhi ju tümü a?” Alibenü alo, “Ayokhe, I khimoberü khülang ah; I niubuh sheabahdo.

⁶Nü yamlaberü tsührü athrürü mahne lakheah, tüshe ane thulu chingnü keochih-a lah; ane mihrungrü she mülakheah, tüsho khülangnü khülang buh kheak king tüsho api laksah.

⁷Kheakü betsührü alalanü nü yamlaberü kheak azhihde wusudo. Arünü thachoh, ‘Nihbuh khiungmungrü laksahbuh mihtsürü ju jihang, junangde yamrüplurüp lupü isanü thsümünimnim she apinü alaksahkhi akhiung rhangdung dünkheaknü isanü api laksahbah.’ Hanangde arünü I mulonglamkhi akheam thsümünimjihbah tüsho alomi kheak I niubuh mung mülapü thsüde tsührü mülashihde akambah.”

⁸Judüki kiulongthsüpuhnü alibe ki tha, “Nü yam lim yüang, tüsho nü dünkheaknü inü nü kilim thiyuzüngbo jihbah.”

⁹Tekoa liberünü kiulongthsüpuh ki tha, “Mülimkhi I tüsho I buh yamkhün kheak lashang; I tungpuh kiulongthsüpuh. Kiulongthsüpuh tüsho api kiulongthsü-binkiu amülim mülakhi thsüang.”

¹⁰Kiulongthsüpuhnü tha, “ Khürünü nü ki tümükhüh thasho, api I kilim bebah arang, tüsho apinü küyimkishe nü kheak müqiulo.”

¹¹Jushu alibenü tha, “Muzhobah, kiulongthsüpuhnü ATUNGPUH nü Thrünpuh mulong ching zoang, junangde royimrübonü mülaksahlo, tüsho I tsührü müthsümünimde alabah.” Apinü tha, “ATUNGPUH lale, nü tsührü kuyü khülang she alo kheak mayokhi.”

¹²Judüki alibenü tha, “Muzhobah nü yamlaberünü I tungpuh kiulongthsüpuh ki thiyu khülang thashang.” Apinü tha, “Thaang.”

¹³Alibenü tha, “Dale tümü thsükhi Thrünpuh mihtsürü azhihde nünü hadürü lümkhi thsükhea? Kiulongthsüpuhnü ha thachoki, apinü nihbuh zangrü mübahyuk de, tümüde kiulongthsüpuhnü yankhita bahkhi nihbuh tsührü thüyam ching belode marü.

¹⁴Isa alala ashebah; ke alo kheak buka bahbah momukhunglopü mukukkhi nangde isa lah. Thrünpuhnü she asherü arhang mükamloshih; tüshe ramtso chingnü mihtsürü khülang belodarüpü kiulongthsüpuhnü limro khülang yimkhitbeah.

¹⁵Kheakü ha thapü I tungpuh kiulongthsüpuh ki I arükheah tümütüsho mihtsürübonü I trede kamshih; nü yamlaberünü lüm, ‘Inü kiulongthsüpuh ki thabah; api yamlaberünü amushukhi kiulongthsüpuhnü arhimopü labah.

¹⁶Tümüde kiulongthsüpuhnü anibah, tüsho I le I tsührü chido Thrünpuh yamrüplurüp chingnü akheamshihpü thsürü khah chingnü api yamlarü bekhitbah.’

¹⁷Nü yamlaberünü lümdo, ‘I tungpuh kiulongthsüpuh yu hode I sühakhimshihbah’; tümüde I tungpuh kiulongthsüpuh a Thrünpuh yunirü nangde lah, atsü tüsho amütsü kheahkhitchoh. ATUNGPUH nü Thrünpuh nü lung lashang!”

¹⁸Judüki kiulongthsüpuhnü alibe ki alo, “Inü nü ki keokhi tümü lang she I ki düram.” Alibenü tha, “I tungpuh kiulongthsüpuhnü thaang.”

¹⁹Kiulongthsüpuhnü tha, “Hadürü alala ching Joabnü athsunganahkhea shi?” Alibenü alojihde tha, “Nü lale, I tungpuh kiulongthsüpuh, shenü she I tungpuh kiulongthsüpuhnü athakhi chingnü tsülim yungsho huzulim manguhkhuk. Tümüde nü yamlarü Joabnü I ki thiyukhüm jihkheah; apinü harü yubo alala nü yamlaberü mün ching yukjihkheah.

²⁰Kheakü apungani müthripü thsungkheak nü yamlarü Joabnü ha rhimokheah. Tüshe alomi kheak lakhi alala mükheahpü thsüde Thrünpuh yunirü lümlung nangde I tungpuh a lümlung lah.”

²¹Judüki kiulongthsüpuhnü Joab ki tha, “ Khide tsülah, inü ha leangkhichoh; yüang, athrününgtsüngbuh Absalom belobah arang.”

²²Joabnü alo kheak khukningde akin jih, tüsho kiulongthsüpuh müngühjih, tüsho Joabnü tha, “I tungpuh kiulongthsüpuh miki I mihmuzho ngüdo de khihni nü yamlarünü mükheahchoh, tümütüsho api yamlarünü amushukhi kiulongthsüpuhnü leangkhijihdo.”

²³Jumonü Joabnü tsahmusubah Geshur lim yü, tüsho Absalom ju Jirusalem lim bebah arü.

²⁴Kiulongthsüpuhnü tha, “Api nihbuh yam ching yüshang; api I miki mazahbeah.” Jumonü Absalomnü nihbuh yam lim yü, tüsho kiulongthsüpuh miki müyüzah.

²⁵Kheakü Israel alala ching Absalom akheahakhamkhi nangde sheshe thude mülakheah; ajinglung chingnü athangphülang khiungde api kheak jakreak mükihde alakheah.

²⁶Küyimki apinü ku hütbanü (tümüde kam kheam abande apinü hütde la; küyimki kheahde akambanü, apinü hüt) akuyü ju kiulongthsüpuh yo adünbenü khahngak 2 kumung adünkhit.

²⁷Absalom kilim tsührü athrürü 3 zübejih, tüsho aliberü 1 amung Tamar lakheah; alibe ju akheahakhamkhi lakheah.

²⁸Jumonü Absalomnü kiulongthsüpuh miki müyüzahde kam mahne bankhitde Jirusalem ching la.

²⁹Judüki api kiulongthsüpuh kilim yüshihpü thsüde Absalomnü Joab kilim thiyu yüshih; tüshe Joabnü api kilim marü. Apinü mahne kipü yüloshih, tüshe Joabnü marü.

³⁰Jushu apinü ayamlarü ki tha, “ Kheahang, Joab lu ju, I arelah tüsho ju ching api yo barli lah; yüang tüsho mo thsahkihang.” Jumonü Absalom yamlarübonü thulu kheak mo thsahkih.

³¹Judüki Joabnü asürübah Absalom kilim ayam ching yü, tüsho api ki tha, “Tümüde nü yamlarübonü I lu kheak mo thsahkihkhea?”

³²Absalomnü Joab ki alo, “ Kheahang, inü nü kilim thiyu ha arüshihdo: Ha ching arang, junangde inü akeokhikhi ha mühahbah nü kiulongthsüpuh ki yüshihbah, ‘ Tümü thsüpü I Geshur chingnü arükhea? I ju ching lakhipünü atsübe thsüdo.’ Jumonü kheakü I kiulongthsüpuh miki yüzahanü; I kheak amülim lasho apinü I laksahshang!”

³³Judüki Joabnü yübah kiulongthsüpuh ki tha; tüsho apinü Absalom ji. Jumonü api kiulongthsüpuh ki arü tüsho kiulongthsüpuh miki alo ching khukningde akin jih; tüsho kiulongthsüpuhnü Absalom kheak müthsüp.