Read Yimchungru Naga 2 Sam 15 Bible Online

2 Sam 15 - Yimchungru Naga bible

2 Sam 15

¹Ju dunglim Absalomnü lolungbe khülang, khorabo, tüsho api müngüh alihpü mihtsürü 50 lu.

²Absalomnü yapsu mükikde asürübah ripit limpeang limro yean zhipde la; tüsho küyimki khürünü kiulongthsüpuh miki mahkhappü thsüde atsangkhi hanbah arübanü, Absalomnü jibah tha, “Nü kiuto küpü chingnü a?” Küyimki mihtsürünü athaba, “Nü yamlarü a ha ruk ah tüsho Israel ching ju trük ah.”

³Absalomnü tha, “Kheahang, nünü atsangkhibo tsülah tüsho alungki ah; tüshe nü ki anipü thsüde kiulongthsüpuhnü she ki rhimo müjih.”

⁴Kheaküshe Absalomnü tha, “Lomi ching I ha mahkhaprü thsükhülaa! Judüki atsangpü larü alala yungsho tümükhüh lakhi I kilim arübah, tüsho inü arü kilim mahkhapjihbah.”

⁵Küyimki mihtsürü khürünü akin jihpü thüninde arübanü, apinü akhah chungkhitbah api kheak tholo, tüsho müthsüp.

⁶Hanangde kiulongthsüpuh kilim mahkhaprü arürü Israel abande Absalomnü rhimo; jumonü Absalomnü Israel mihtsürü mulong ahüh.

⁷Kam phüyi kheam dunglim Absalomnü kiulongthsüpuh ki tha, “Muzhobah I Hebron lim yüshang tüsho inü ATUNGPUH ki thiyuchihchimkhi jihanü.

⁸Tümüde Siria lomi Geshur ching lachoki nü yamlarünü thiyuchihchim khülang thsüdo: ATUNGPUHNÜ I Jirusalem lim belodarüsho, inü Hebron ching ATUNGPUH kingaünbah.”

⁹Kiulongthsüpuhnü api ki tha, “Mungtsü chingnü yüang.” Jumonü api asürü, tüsho Hebron lim yü.

¹⁰Tüshe Absalomnü Israel trük alala ching aram-yunithsürü yüshihde tha, “Nüsanü hulipungpung khungkhi soakede, ahoang: Hebron ching Absalom kiulongthsürü kamdo!”

¹¹Jirusalem chingnü mihtsürü 200 Absalom lung yü; arünü amütsan tümü mümükheahdü lang hanrü nangde tümü mülümde yü.

¹²Küyimki Absalomnü laksah-a kingaünkhibo jihkhea, apinü David lümthiyan-jihrü Gilonrü Ahithophel anihbuh kiuto Gilo chingnü arüpü yüshih. Aram-yusheak düküngde kam, tüsho Absalom lung mihtsürübo jade kam.

¹³Yunithsürü khülang David kilim arübah tha, “Israelrü mulong Absalom kilim yüabahdo.”

¹⁴Judüki Davidnü Jirusalem ching api lung lakhi atorübo ki tha, “Asürang! Isa tsoanü, jude yungsho Absalom kheaknü isa tsokhipung mülade akambah. Nahdang, yungsho apinü isa alihhobah isa kheak thsümütsü handarübah, tüsho nukshang shuhbah kiuto yanbah.”

¹⁵Kiulongthsüpuh torübonü api ki alo, “Isa tungpuh kiulongthsüpuhnü tümüpürü akhuchonü nü yamlarübonü arhimopü thsakhamlah.”

¹⁶Jumonü hanniuberü 10 lang thüyam neakshihpü aninga zojihbah kiulongthsüpuh, api yamkhün alala tsoabah.

¹⁷Kiulongthsüpuh yande mihtsürü alala tso tüsho arübo chipi yean tuklo.

¹⁸Api yo atorü alala api hode yü; tüsho Kerethrü le Pelethrü alala tüsho Gitrü 600 alala Gath chingnü api lung yürübo kiulongthsüpuh müngühlim yü.

¹⁹Judüki kiulongthsüpuhnü Gitrü Ittai ki tha, “Tümüde nü she isa lung arücho? Alode yüang, tüsho kiulongthsüpuh ki laang; tümüde nü a khiungkerü ah, tüsho kheaküshe nü yam chingnü tsoabahrü ah.

²⁰Nü yini lang arükheah, tüsho kürü ching yübeanü inü mümükheah, khihni nü I lung rümde atsahshihba de? Alode yüang, tüsho nü keoniorübo nü lung bea lung; tüsho ATUNGPUHNÜ nü kheak amuzhodakkhi tüsho thiyuro huhshang.”

²¹Tüshe Ittainü kiulongthsüpuh ki alo, “ATUNGPUH tüsho I tungpuh lale, I tungpuh kiulongthsüpuh küching küching yüyüshe, ashepü thsüthsü yungsho arhang lapü thsüthsü, ju ching she nü yamlarü labah.”

²²Davidnü Ittai ki tha, “Dale tüsho yang, tsahang.” Jumonü Gitbuh Ittainü api lung lakhi mihtsürü alala tüsho azürü aninibo bebah tsah.

²³Mihtsürü alala hode ayüchoki lomi athrünkhinü achangnü trip; kiulongthsüpuhnü Kidron ayung ho, tüsho mihtsürü alala sunglo lim yü.

²⁴Abiathar she wutu, tüsho Zadok she Levirü lung Thrünpuh tangzüng sangdan shuhbah yü. Mihtsürü alala kiuto chingnü müdütreakkhitkhamyi khiungde arünü Thrünpuh sangdan shuhkhia zo.

²⁵Judüki kiulongthsüpuhnü Zadok ki tha, “Thrünpuh sangdan hanlobah kiuto ching yüzahang. ATUNGPUH miki I mihmuzho ngüsho, apinü I belode arübah tüsho ju le azopung dangpung ane chido ngüloshihbah.

²⁶Tüshe apinü I kheak masüh-a lasho, I ha ching lah, apinü atsükhi I kheak rhimoshang.”

²⁷Kheaküshe kiulongthsüpuhnü amükeambuh Zadok ki tha, “Nü angürü yung de? Nü le Abiathar, nü tsührü Ahimaaz, tüsho Abiathar tsührü Jonathan mungtsü chingnü kiuto ching alode yüang.

²⁸Kheahang, nüsa yusheak I kilim marüyi khiungde I sunglo ching ayung ki aleangbah.”

²⁹Jumonü Zadok tüsho Abiatharnü Thrünpuh sangdan Jirusalem lim shuhlobah yü tüsho arü ju ching la.

³⁰Tüshe Davidnü aku dukiubah jing keangkeangnü tsahde oliv wungbo lim tripde wutu; tüsho api lung mihtsürü alalanü nihbuh ku dukiubah tripde wutu.

³¹Ahithophel she aram-asukachihkhi lung belah de David ki tha. Tüsho Davidnü tha, “O ATUNGPUH , inü nü ki tamkhüntamnüchoh, Ahithophel athsunganahkhi ju makhashang.”

³²Küyimki David awung mujuk kheak, Thrünpuh kingaünpung arükhea, Arkrü Hushainü apangkhümpü rukrüp tüsho aku kheak alo yihkihbah api shorupü arü.

³³Davidnü api ki tha, “Nü I lung yüsho, nünü I kheak hahmülang jihbah.

³⁴Tüshe nünü kiuto lim alode yübah Absalom ki, ‘O kiulongthsüpuh I nü yamlarü thsübah; ahokhi kim ching I nü buh yamlarü thsükhi nangde, kheakü I nü yamlarü thsübah’ de thasho, judüki I thsungkheak nünü Ahithophel athsunganahkhi kukbah.

³⁵Amükeamrübo Zadok tüsho Abiathar nü lung ju ching labah. Jumonü tümüpürü kiulongthsüpuh yam chingnü asobanü, ju amükeamrübo Zadok tüsho Abiathar ki thaang.

³⁶Arü tsührü athrürü 2, Zadok tsührü Ahimaaz tüsho Abiathar tsührü Jonathan she ane lung ju ching lah; tüsho arü kheaknü nünü asokhi lüpdükhi I ki thiyusheak jihang.”

³⁷Jumonü Absalom kiuto ching yüzahchoki David müyambuh Hushai Jirusalem khiungde arü.