Read Yimchungru Naga 2 Sam 19 Bible Online

2 Sam 19 - Yimchungru Naga bible

2 Sam 19

¹Joab ki tha, “Kiulongthsüpuh a Absalom thsungkheak mitripchoh tüsho tüzhochoh.”

²Jumonü ju nimung akuk ngükhi ju bonungrü alala thsungkheaknü atüzhopü ching müthriabah; tümüde ju nimung bonungrübonü so, “Kiulongthsüpuh api tsührü thsungkheak mulong rozhakchoh.”

³Ju nimung bonungrü keochihkhi chingnü tsobah achihkhi nangde thirithsürübonü jikshe müthsüde kiuto ching yüzah.

⁴Kiulongthsüpuhnü amiro yihdo, tüsho düsheak achangnü trip, “O I tsah-a Absalom, O Absalom, I tsah-a, I tsah-a!”

⁵Judüki Joabnü kiulongthsüpuh yam ching yüzahbah tha, “Khihni nünü nü rhangdung tüsho nü tsührü athrürü tüsho aliberübo, tüsho nü yamkhünrü le hanniubebo rhangdung khümkhitrü nü bukkhüp atorübo alala achih ngüshihdo,

⁶tümüde nü thraneanrü ki nünü muzhochoh tüsho nü muzhorü ki nünü thraneanchoh. Limthorübo tüsho atorübo nü miki tümü she yung de khihni nünü mütsanjihdo; tümüde khihni isa alala shebah Absalom rhangdung lakhülaa nü asühbah de inü ngükhitdo.

⁷Jumonü khülang ki wukhiukang tüsho nü yamlarübo ki muzhobah thiyu thaang; tümüde nü muwukhiuksho khihre nü lung mihtsürü khülang she müla de ATUNGPUH mung chingnü thiyuchihchimchoh; tüsho ju nü athunu kim chingnü kheakü khiungde küpkhukkhi bolung amütsübe labah.”

⁸Judüki kiulongthsüpuhnü asürü tüsho api binkiu ripit ching lubah yü. Bonungrü alala ki tha, “Kheahang, kiulongthsüpuh ripit ching binlah”; tüsho bonungrü alala kiulongthsüpuh miki arü. Judüki Israelrü alala nihbuh yam lim tsoabah.

⁹Israel trük alala ching mihtsürübonü alanajide tha, “Kiulongthsüpuhnü isa riri khah chingnü isa bekhit, tüsho Filistiarü khah chingnü isa khümkhit; tüsho kheakü Absalom dünkheaknü api lomi chingnü tsodo.

¹⁰Tüshe isa kurungkheak isanü mujude-mokhitkhi Absalom, thirithsü ching shea lah. Kheakü jumonü kiulongthsüpuh belodarüpü dünkheak tümü thsükhi nüsanü tümü she mütha le?”

¹¹Kiulongthsüpuh Davidnü ha yusheak amükeamrübo Zadok tüsho Abiathar kilim yüshih, “Juda azothsürübo ki thaang, ‘ Tümüde kiulongthsüpuh nihbuh yam ching belodarüpü nüsa ashube thsüba le? Israel alalanü athakhi kiulongthsüpuh ki arüdo.

¹²Nüsa I keoniorü, nüsa I shih tüsho I thiyih; dale küde thsah kiulongthsüpuh belodarüpü nüsa ashube thsüba le?’

¹³Tüsho Amasa ki thaang, ‘Nü I shih tüsho I thiyih yung de? Jumonü kheakünü rünbah Joab müthri nü I yo bonungrü kurungkheak limthorü müthsüshihsho Thrünpuhnü I kheak alübe she rhimoshang.’ ”

¹⁴Amasanü arü khülang kamde Juda mihtsürü alala mulong kukabah, tüsho arünü kiulongthsüpuh kilim thiyu yüshih, “Nü tüsho nü yamlarü alala alodarang.”

¹⁵Jumonü kiulongthsüpuhnü Jordan ching alodarü; tüsho Judarünü kiulongthsüpuh shorupü tüsho api Jordan behopü Gilgal ching arü.

¹⁶Benjaminrü Gera tsührü Shimei, Bahurim chingnü, kiulongthsüpuh David shorupü Juda mihtsürü lung niokheamde aki;

¹⁷api lung Benjamin ching mihtsürü 1000 lakheah. Tüsho Saul yamkhün ching yamlarü Ziba lung atsührü 15 tüsho yamlarü 20 bebah kiulongthsüpuh müngüh Jordan lim nanachihde yüki.

¹⁸Arünü kiulongthsüpuh yamkhün behopü tüsho apinü alunekhi rhimopü ayung ju ho. Kiulongthsüpuh Jordan hopü thsüchoki, Gera tsührü Shimeinü api miki khukning,

¹⁹tüsho kiulongthsüpuh ki tha, “I tungpuh kiulongthsüpuh Jirusalem chingnü atsochoki nü yamlarünü amülim rhimokhi amülim dükamshih yungsho dülümkhitjih; kiulongthsüpuhnü ju mulong ching dühan.

²⁰Tümüde inü neak yihbeakdo de nü yamlarünü mükheahlah; jumonü, kheahang, I tungpuh kiulongthsüpuh shorupü Josep yamkhün alala kheaknü akhuhbe thsüde I khihni akikheah.”

²¹Zeruia tsührü Abishainü alo, “ATUNGPUHNÜ mujude-mokhitkhi kheak athrukhi dünkheak Shimei müsheshihba de?”

²²Tüshe Davidnü tha, “Khihni nüsa I kheak azhihlorü kamkhi dünkheak nüsa Zeruia tsührübo kheak inü tümü thsüpü? Khihni Israel ching khürü sheshihba de? Tümüde khihni I Israel kurungkheak kiulongthsüpuh ah de inü mümükheah de?”

²³Kiulongthsüpuhnü Shimei ki tha, “Nü müshe.” Tüsho kiulongthsüpuhnü api ki thiyuchihchim jih.

²⁴Saul tsührü-tsührü Mephiboshet kiulongthsüpuh shorupü aki; kiulongthsüpuh Jirusalem chingnü atsokhi nimungnü tsüde alodarü khiungde apinü ajing muniuh, yungsho mükhühnam mümüwah, yungsho akhimmih mümüsühde alakheah.

²⁵Küyimki apinü kiulongthsüpuh shorupü Jirusalem chingnü arükhea, kiulongthsüpuhnü api ki tha, “Mephiboshet, tümüde nü I lung müyükhea?”

²⁶Apinü alo, “I tungpuh, O kiulongthsüpuh, I yamlabuhnü I mulomülapdo; tümüde nü yamlarünü api ki tha, ‘I thsungkheaknü donki khülang kheak binkiu yihkihang, junangde I ju kheak binbah kiulongthsüpuh lung yüanü.’ Tümüde nü yamlarü a jingkikrü ah.

²⁷Apinü I tungpuh kiulongthsüpuh ki nü yamlarü mulomülapjihdo. Tüshe I tungpuh kiulongthsüpuh a Thrünpuh yunirü ruk ah; jumonü tümü nü tsükhi lanü rhimoang.

²⁸Tümüde I pü buhtsührübo kiulongthsüpuh miki thülünde sheshih; tüshe nü yamlarü a nü dükhüm kheak yimtsührü lung nünü zojih. Kheaküshe kiulongthsüpuh ki mushupü I alim tümü la?”

²⁹Kiulongthsüpuhnü api ki tha, “Nü yihnüpü tümüde alü thacho? Inü pungkhido: nü tüsho Zeba thulubo chambah.”

³⁰Mephiboshetnü kiulongthsüpuh ki tha, “Alala api lushang, tümüde I tungpuh kiulongthsüpuh thüyam lim tsüde alodarüdo.”

³¹Kheakü Gileadrü Barzillai Rogelim chingnü aki; apinü kiulongthsüpuh Jordan behopü api lung yü.

³²Barzillai ju khide ashinbuhrü, kam 80 azorü lakheah. Api Mahanaim ching lachoki apinü kiulongthsüpuh kilim tsühyungbe jih, tümüde api khide alarü mihtsürü lakheah.

³³Kiulongthsüpuhnü Barzillai ki tha, “I lung arang tüsho Jirusalem ching I ki laang, tüsho inü nü thsungkheak jihchungbah.”

³⁴Tüshe Barzillainü kiulongthsüpuh ki tha, “I külokhüh rhangdung lapü, inü kiulongthsüpuh lung Jirusalem lim yüpü?

³⁵Khihni I kam 80 azorü ah; atsü tüsho amütsü dükeak inü kheahkhitkhukla de? Nü yamlarünü atsühkhi yungsho ayungkhibo mütsanla de? Athrürü tüsho aliberübonü khünbo thsükhi düsheak inü sokhukla de? Dale tümü thsüpü nü yamlarü ju I tungpuh kiulongthsüpuh kheak hahmülang alü kamshihpü?

³⁶Nü yamlarü a Jordan hode limro akhihkhüh kiulongthsüpuh lung yübah. Tümü thsüpü kiulongthsüpuhnü I kilim hadürü thsambah jihpü?

³⁷Muzhobah nü yamlarü alode yüshang, junangde I nihbuh kiuto, I buh tüsho I be mibahpung phünide ashebah. Tüshe ha ching nü yamlarü Kimham lah; api I tungpuh kiulongthsüpuh lung yüshang; tüsho nü tsükhi tümüpürüanü apinü rhimoshang.”

³⁸Kiulongthsüpuhnü alo, “Kimham I lung yübah, tüsho tümüpürü nü ki atsüanü inü api thsungkheak rhimobah; tüsho nünü amushukhi alala inü api thsungkheak rhimojihbah.”

³⁹Judüki mihtsürü alala Jordan ho, tüsho kiulongthsüpuh she ho; kiulongthsüpuhnü Barzillai kheak müthsüp tüsho api müngühjih, tüsho api nihbuh yam lim alode yü.

⁴⁰Küyimki kiulongthsüpuh Gilgal lim yükhea, Kimham api lung yü; Juda mihtsürü alala tüsho Israel mihtsürü chamkhühnü kiulongthsüpuh ju anihbuh limro ching bebah arü.

⁴¹Judüki Israel mihtsürü alala kiulongthsüpuh ki arübah tha, “Tümüde isa keoniorü Juda mihtsürübonü kiulongthsüpuh tüsho api yamkhün tüsho api lung David mihtsürü alala ahüh-a bea lubah Jordan hoshihkhea?”

⁴²Juda mihtsürü alalanü Israel mihtsürübo ki alo, “Tümütüsho kiulongthsüpuh ju isa keoniorü ah. Dale tümüde ha dünkheak nüsa bukakhiukcho? Isanü kiulongthsüpuh jimpung tsüh-a la de? Yungsho apinü isa kilim thsambah khürü jih-a la de?”

⁴³Tüshe Israel mihtsürübonü Juda mihtsürübo ki alo, “Kiulongthsüpuh kheak isa shihcham thürü lah, tüsho David kheak she nüsa kheaknü isa alübe lah. Dale tümüde nüsanü isa mükhemürangcho? Isa kiulongthsüpuh belodarüpü akhuh thakhi ju isa yung de?” Tüshe Juda mihtsürübo yu ju Israel mihtsürübo yu kheaknü amüzhakbe lakheah.