Read Yimchungru Naga 2 Sam 2 Bible Online

2 Sam 2 - Yimchungru Naga bible

2 Sam 2

¹Ju dunglim Davidnü ATUNGPUH ki keokhi, “I Juda kiuto khürü ching wutuba shi?” ATUNGPUHNÜ api ki alo, “Wutuang.” Davidnü tha, “I küpü ching wutuba?” Apinü tha, “Hebron lim.”

²Jumonü Davidnü ayamkhünrü mahne, Jezreelrü Ahinoam, tüsho Karmelrü Nabal niube Abigail lung ju ching wutu.

³Davidnü api lung lakhi mihtsürübo mihbüm abannü nihbuh yamkhün bebah wutu; tüsho arü Hebron kiutobo ching la.

⁴Judüki Juda mihtsürübo arü tüsho arünü Juda kurungkheak kiulongthsürü thsüshihpü David mujude-mokhit. Tüsho arünü David ki tha, “Jabesh-gilead mihtsürünü Saul kiuyuka bahkheah.”

⁵Davidnü yunithsürübo thiyia Jabesh-gilead mihtsürü kilim yüshih, tüsho tha, “ATUNGPUHNÜ nüsa müngühjang, tümütüsho nüsanü ha thiyuro amuzho nüsa tungpuh Saul ki huh, tüsho api kiuyuka bahdo!

⁶Kheakü ATUNGPUHNÜ amuzhodakkhi tüsho thiyuro nüsa ki huhshang! Tüsho inü she nüsa thsambah jihbah tümütüsho nüsanü ha rhimo.

⁷Jumonü nüsa khahbo müküpshang, tüsho thrungshang; tümüde nüsa tungpuh Saul shea lah, tüsho Judanü arü kurungkheak kiulongthsürü thsüshihpü I mujude-mokhitdo.”

⁸Tüshe Ner tsührü Abner, Saul bonungrü limthobuhnü Saul tsührü Ishboshet bea lubah Mahanaim lim arü.

⁹Anihbuhnü api Gilead, Asher, Jezreel, Ephraim, Benjamin, tüsho Israel alala kurungkheak kiulongthsürü kamshih.

¹⁰Saul tsührü Ishboshet küyimki api Israel kurungkheak yakzan shuhpü tankihkheanü kam 40 lakheah, tüsho apinü kam mahne kiulongthsü. Tüshe Juda trüknü a David yan.

¹¹Hebron ching Juda trük kurungkheak Davidnü kam thüne tüsho khinu thuruk kiulongthsü.

¹²Ner tsührü Abner tüsho Saul tsührü Ishboshet yamlarübo Mahanaim chingnü Gibeon lim wukhiuk.

¹³Zeruia tsührü Joab, tüsho David yamlarübo wukhiukbah arü Gibeon kekhip ching shoru. Khunung khülang kekhip thripkhüh bin, püpü khunung khülang thripkhüh bin.

¹⁴Abnernü Joab ki tha, “Athrününgtsüngbo mikhuh ching arübah isa miki azhihachihshang.” Joabnü tha, “Arübo mikhuh ching arüshang.”

¹⁵Jumonü arübo mikhuh ching arübah hoachihchoki azhihachih, Benjamin tüsho Saul tsührü Ishboshet thsungkheak 12, tüsho David yamlarübo thsungkheak 12.

¹⁶Mihbüm abannü nihbuh azhihrü ku kheak zam, tüsho nukshang düchipa yüshih; junangde arü rukhüh lunga yap. Jumonü ju dangpung ki Helkath-hazzurim de ji, ju Gibeon ching lah.

¹⁷Ju nimung keochihkhi ju khide müküpde alakheah; tüsho Abner le Israel mihtsürübo David yamlarübonü kuk.

¹⁸Zeruia tsührü mahsam ju, Joab, Abishai, tüsho Asahel. Kheakü Asahel ju shihmüchi nangde athride alakheah.

¹⁹Asahelnü Abner ju tsülim yungsho huzulim manguhde müshamde yan.

²⁰Judüki Abnernü rholoa kheah tüsho tha, “Nü Asahel a de?” Apinü alo, “Am.”

²¹Abnernü api ki tha, “Tsülim yungsho huzulim anguhang tüsho athrününgtsüng khürü tholobah api kukruk luang.” Tüshe Asahelnü api yankhi chingnü murholo.

²²Abnernü Asahel ki thalo, “I yankhi chingnü rholoang; tümü thsüpü inü nü alo ching kinga lungshihpü? Tüsho küde thsah nü khiung Joab ki I miro huhpü?”

²³Tüshe apinü rholobah atsopü thsunglo. Jumonü Abnernü abuk ching thsüh mulonü düchip, tüsho thsüh ju adunglim chinkhit. Api ju kheak shea yap. Tüsho shea yappung arürü alalanü zhipkheam.

²⁴Tüshe Joab le Abishainü Abner müsham. Ani yüzahchoki arü Gibeon sunglo limro lakhi Amma wung ching arü.

²⁵Benjaminrü khunung khülang thsübah Abner mükamde arü; arünü awung ching zhippung thsakhama lu.

²⁶Judüki Abnernü Joab ki ji, “Isa lünnü keochihde ayüba de? Akheam ching akhüh labah de nünü mümükheah de? Nü mihtsürü ki thiyukhüm jih-a nihbuh keoniorü müshamkhi chingnü atsoloshihpü külokhüh laba?”

²⁷Joabnü tha, “Thrünpuh mung chingnü thachoh, nüsanü müthaa lasho, mihtsürübonü arü keoniorü yapsu khiungde mutuklode ayanbah.”

²⁸Joabnü hulipungpung khung tüsho mihtsürü alala tuklo; arünü Israel mümüsham yungsho thiri müthsüdebah.

²⁹Abner tüsho amihtsürübo tsüngreroro Araba hode tsah; arünü Jordan ho, tüsho nimungroro tsahde Mahanaim ching arü.

³⁰Abner müshamkhi chingnü Joab alodarü; tüsho küyimki apinü mihtsürübo bemukhungkhea, Asahel bede David yamlarübo mihtsürü 19 müladebah.

³¹Tüshe David yamlarübonü Benjaminrü Abner mihtsürübo 360 laksah.

³²Arünü Asahel shuh-a lu tüsho Bethlehem ching lakhi abuh mibahpung ching kiuyukabah. Joab tüsho amihtsürübo tsüngreroro tsah, tüsho mükikde Hebron khiung.