Read Yimchungru Naga 2 Sam 22 Bible Online

2 Sam 22 - Yimchungru Naga bible

2 Sam 22

¹Davidnü ha khün ha ATUNGPUHNÜ api riribo, tüsho Saul khah chingnü bekhitkhi nimung ATUNGPUH ki thsü.

²Apinü thsü: ATUNGPUH ju I lungto, I chipi tüsho I bekhitrü,

³I Thrünpuh, I lungto, shepü kheak inü jikcho, I tsung tüsho I akhümkhit juh, I tsungdorü tüsho I tsoyukpung, I khümkhitbuh; nünü I thiyih bukpü chingnü khümkhit.

⁴Inü ATUNGPUH ki jichoh, shepü mungshi jihpü athülün la, tüsho I riribo kheaknü I khümkhita lah.

⁵Tümüde ashe ke abükkhinü I mükamdo, athsümünimbe düchi I kheak zünde akih;

⁶Ashe-lomi liunü I hingdo, ashebe qimüripbo I ki thsüa zojih.

⁷I lümthsünükhi chingnü inü ATUNGPUH ki ji; I Thrünpuh ki inü ji. Api arüngyam chingnü apinü I düsheak so, tüsho inü azhikhi api nükhünbo ching arü.

⁸Judüki alomi ajan tüsho niuk; thüningbo khimtan ajan tüsho niuk, tümütüsho api bukakhiuk.

⁹Api nupung chingnü mokhüh wutu, tüsho api mün chingnü muliuabahbe mo wutu; api kheaknü mokhih takde akhiuk.

¹⁰Apinü thüningbo azüshih, tüsho aki; amo amiting api müphü khüp lakheah.

¹¹Api cherub kheak bin, tüsho phin; api apung ghidükeangbo kheak ngü.

¹²Apinü api mükamde amitingnü muhiudo — thüning ching tsüng amo amiting.

¹³Api miki ayinatrüm chingnü tsüngyuk mo trude akhiuk.

¹⁴ATUNGPUHNÜ thüning chingnü tsüngmukshih; Khide Achangbuh düsheak so.

¹⁵Apinü hühzobo kipa yüshih, tüsho thiriribo hiumüzütshih; chinchobe phürapde arü alihde tsoshih.

¹⁶Judüki keto rubo ngüde kam, ATUNGPUH bukakhiukkhinü, api nupung sheak akhiukkhinü, alomiküp khimtan aleangkheak kam.

¹⁷Apinü achang kheaknü I tholoa lu, apinü I ke asükbo chingnü thokhit.

¹⁸I riri amüküp I thraneanrü kheaknü apinü I bekhit; tümüde arübo ju I thsungkheaknü khide sühmüh lakheah.

¹⁹I thsümütsü nimung arübo I kheak arü, tüshe ATUNGPUH ju I angükihpung lakheah.

²⁰Apinü I amülih dangpung ching bedakhiuk; apinü I bekhit, tümütüsho apinü I kheak asüh.

²¹I thiyuro-lungki yande ATUNGPUHNÜ I kilim thsambah jih; I khah müsühkhi yande apinü I müngühjih.

²²Tümüde inü ATUNGPUH yakzanbo ani, tüsho mihbukmuyuk rhimode I Thrünpuh kheaknü müchamachih.

²³Tümüde api yuzüngbo alala I miki lakheah, tüsho api yakzanbo chingnü inü manguh.

²⁴I api miki amülim mülade alakheah, tüsho amülimbo chingnü inü danyuk.

²⁵Jumonü I thiyuro-lungki, api miki I müsühkhi yande ATUNGPUHNÜ I kilim thsambah jih.

²⁶Thiyuro lakhi kheak nünü thiyuro lakhi huhchoh, amülim mülakhi kheak nünü amülim mülakhi huhchoh;

²⁷Amüsühkhitkhi kheak nünü amüsühkhitkhi huhchoh, tüsho akhürang kheak nünü nihnihde huhchoh.

²⁸Nünü azhihayih mihtsürü khümkhitchoh, tüshe akükheangrübo thokhipü arü kheak nü mük lah.

²⁹Dükde, nü I tsünpung, O ATUNGPUH , ATUNGPUHNÜ I yo amitingnü ayin kamshihchoh.

³⁰Nü hode inü I riribo alihho, tüsho I Thrünpuh hode inü chipi jukhokhuk.

³¹Ha Thrünpuh — api limro athülünkhi lah; ATUNGPUHNÜ alokhikhinü thiyuro huhchoh; api kheak tsoyukrü alala thsungkheaknü api tsung khülang lah.

³²Tümüde ATUNGPUH hobah shepü Thrünpuh a? Tüsho isa Thrünpuh hobah shepü lungto a?

³³Thrünpuhnü zülu rümkihjihde reangzahloshih tüsho I limro küngküngde khimshuhjih.

³⁴Apinü I jing shihmüchi jing nangde kamshih, tüsho I awung achangbo kheak jikshih.

³⁵Apinü I khahbo thirithsüpü thsükhitshih, junangde I binbonü müwayinchi sanglüh hünkhuk.

³⁶Nünü I kilim nü akhümkhit tsung jih tüsho nü arung hode I ato kamshih.

³⁷Nünü I jingdükü zuzu kamshih tüsho I jing mülih;

³⁸Inü I riribo yande müsham tüsho arü thsümünim, tüsho arübo müdükheakyi khiungde malodarü.

³⁹Inü arü muyuabah; inü arü kingmülün, junangde arü masürü; arübo I jing khüp keam.

⁴⁰Tümütüsho thirithsüpü thsungkheaknü nünü I reangzahde rümkihjih; nünü I azhihrü I jing ki mükhümshih.

⁴¹Nünü I thraneankhi I riribo düthsün I kilim anguhshih, tüsho inü arü thsümünimjih.

⁴²Arübonü abina kheah, tüshe arü khümkhitpü she mülade alakheah; arünü ATUNGPUH ki zhi, tüshe apinü arü ki malojih.

⁴³Inü arü kheak alo asungthulung atsü nangde king, inü arü züthünak tüsho kiudunglimrobo ching akhimniuhniuh nangde arübo jungnak.

⁴⁴Nünü I mihtsürübonü ayankhi chingnü I bekhit; nünü I trükshihbo kurungkheak akuthsüpü zojih; inü mümükheahkhi mihtsürübonü I tankih.

⁴⁵Khiungkerübonü zhide I kilim arü; arünü I soakede I ki mihyuani.

⁴⁶Khiungkerübo mulong dükheakabah, tüsho arü chipibo chingnü ajande akhiuk.

⁴⁷ATUNGPUH rhangdung lah! I Lungto shiang, tüsho I Thrünpuh shuhkihshang, I khümkhitpü Lungto,

⁴⁸Thrünpuhnü I kilim royimpü jih tüsho mihtsürübo I bukkhüp thokhijih,

⁴⁹shepünü I riri kheaknü I bekhit; nünü I azhihrü kurungkheak I shuhkihjih, nünü I thiyih bukpü chingnü bekhit.

⁵⁰Ha thsungkheaknü inü nü trükshih bolung shijihbah, O ATUNGPUH , tüsho nü mung ching mungshikhün thsübah.

⁵¹Thrünpuhnü api kiulongthsüpuh kheak akuk ngükhi ato jihchoh, tüsho apinü mujude-mokhitkhi kheak lünnü David tüsho api tsühsoniusobo kilim mihmuzho huhchoh.