Read Yimchungru Naga 2 Sam 23 Bible Online

2 Sam 23 - Yimchungru Naga bible

2 Sam 23

¹Kheakü harübo David akheam yubo ah: Jesse tsührü Davidnü müchitkhi yu, Thrünpuhnü ashuhkihbuh mihtsürünü müchitkhi yu, Jakob Thrünpuhnü mujude-mokhitbuh, Israel ching khün thsürü khülang:

²ATUNGPUH menü I hode asukchoh, api yu I mulo kheak kihlah.

³Israel Thrünpuhnü asukdo, Israel Lungtonü I ki thado: Shepünü mihtsürü kurungkheak thiyuronü yakzan shuhchonü, Thrünpuh wüntrekhi chingnü yakzan shuhchonü,

⁴ju yapsu ayin nangde, amo mülakhi yapsu ani akhiukkhi tsüng arü dunglim alo ching lakhi rimkiu kheak ayin tahkihkhi nangde lah.

⁵I yam Thrünpuh lung müla de? Tümüde apinü I kheak lün yo tangzüngdo, lüpdükhi akhinashu thsüde tüsho kümdoa zojih. Apinü I yihnüpü tüsho inü akünkhi akuk müngüshihba de?

⁶Tüshe amütsü mihtsürübo a ayangbo nangde bahchoh; tümüde arübo ju khahnü thrüa mulukhuk;

⁷arü qiupü khürünü yinchi tso yungsho thsühbeak shuhchoh. Tüsho arübo shahde ju kheak monü muliuabahchoh.

⁸Harü ha David yo mungthu bonungrübo mung: Takemonrü Josheb-basshebeth; api mahsam yo aku lakheah; apinü mihtsürü 800 thsüh shuhkihbah khülang kinü laksah.

⁹Api khinbuh thirithsürü mahsam bolung ju Ahohrü Dodo tsührü Eleazar. Api ju keochihpü Filistiarü mukhungbah arünü amüneahchoki David lung lakheah. Israelrünü tuklo,

¹⁰tüshe api a düngde zhip. Api akhah keah-a nukshang muchungkhukyi khiungde apinü Filistiarü kiua lungshih. Ju nimung ATUNGPUHNÜ akuk ngükhi ato handarüjih; tüshe mihtsürübo a api dunglim ashemi kheaknü kukruk lupü lang arü.

¹¹Api khinpü ju Hararrü Agee tsührü Shamma lakheah. Filistiarübo hühdo lakhi lopung Lehi ching mukhung; tüsho bonungrübo Filistiarü kheaknü alihde tso.

¹²Tüshe apinü a ju dangpung phulung ching zhipbah tsunglo, tüsho Filistiarü laksah; tüsho ATUNGPUHNÜ akuk ngükhi ato handarüjih.

¹³Yimlupü müngüh kheak akuthsürü samrü kumung mahsam ju, Filistiarü boto Rephaim jindükhün ching binkheamchoki Adullam lungkhün lim David kilim yüki.

¹⁴Judüki David a chipi ching lakheah; tüsho Filistiarü boto Bethlehem ching lakheah.

¹⁵Davidnü ke yungnede tha, “O khürünü Bethlehem ching ripit ki lakhi ke yungpü jihkhülaa!”

¹⁶Ju dunglim athrungrü mahsamnü Filistiarü binpung ramashungbah Bethlehem ching ripit ki ke khipa David kilim lubah arüjih. Tüshe apinü ju muyung; apinü ATUNGPUH kilim dunga bahjih,

¹⁷tümüde apinü tha, “Inü ha rhimopü thsüde I Thrünpuhnü danjang. Nihbuh rhangdung shuhmülanga jihde ayürü mihtsürü thiyih inü ayungkhukbea de?” Jumonü apinü muyung. Athrungrü mahsamnü harü rhimo.

¹⁸Kheakü Joab akhiung Zeruia tsührü Abishai ju samrü kumung aku lakheah. Api thsühnü mihtsürü 300 bede keochih tüsho arübo laksah tüsho mahsam khin kheak mungthu kam.

¹⁹Api ju samrü bolung khide mungthu lakheah, tüsho arübo limthorü kam; tüshe api a mahsam ju mukhiung.

²⁰Kabzeelrü Jehoiada tsührü Benaia athrungrü thirithsürü, ato rhimorü lakheah; apinü Moabrü Ariel tsührü 2 kiua lungshih. Kheaküshe apinü phürüm shu nimung yükibah kekhüzü khülang alokhün chingnü laksah.

²¹Tüsho apinü Ijiprü mihtsürü trungdung atsü khülang laksah. Ijipbuh ju akhah ching thsüh shuhkheah; tüshe Benaianü api azhihde yübah tso khülangnü Ijipbuh khah chingnü thsüh ju lakkhia bahjih, tüsho anihbuh thsühnü api ju laksah.

²²Hanangde Jehoiada tsührü Benaianü rhimo, tüsho api she athrungrü mahsam bolung mungthu ngü.

²³Api samrü bolung mungthu lakheah, tüshe apinü mahsam ju mukhiung. Tüsho Davidnü api ju nihbuh aheangpü ching aberü jih.

²⁴Arü samrü bolung ju Joab akhiung Asahel; Bethlehemrü Dodo tsührü Elhanan;

²⁵Harodrü Shamma; Harodrü Elika;

²⁶Paltirü Helez; Tekoarü Ikkesh tsührü Ira;

²⁷Anathothrü Abiezer; Hushathrü Mebunnai;

²⁸Ahohrü Zalmon; Netopharü Maharai;

²⁹Netopharü Baana tsührü Heleb; Benjaminrü Gibea ching lakhi Ribai tsührü Ittai;

³⁰Pirathonrü Benaia; Gaash düchiru ching larü Hiddai;

³¹Arbathrü Abialbon; Bahurimrü Azmaveth;

³²Shaalbonrü Eliaba; Jashen tsührübo: Jonathan;

³³Hararrü Shamma; Hararrü Sharar tsührü Ahiam;

³⁴Maakathrü Ahasbai tsührü Eliphelet; Gilonrü Ahithophel tsührü Eliam;

³⁵Karmelrü Hezro; Arbrü Paarai;

³⁶Zobarü Nathan tsührü Igal; Gadrü Bani;

³⁷Amonrü Zelek; Beerothrü Naharai ( Zeruia tsührü Joab thsühnuk hanbuh);

³⁸Ithrü Ira; Ithrü Gareb;

³⁹Hitrü Uria — alalanü 37.