Read Yimchungru Naga 2 Sam 24 Bible Online

2 Sam 24 - Yimchungru Naga bible

2 Sam 24

¹Kheaküshe Israel kheak ATUNGPUHNÜ bukakhiuk, tüsho apinü arü azhihde David ki ajuhde tha, “Yüang, Israel tüsho Juda mihtsürü kheang.”

²Jumonü kiulongthsüpuhnü Joab tüsho api lung lakhi bonungrü limthorübo ki tha, “Dan chingnü Beersheba khiungde Israel trük alala ching yüang, tüsho mihtsürübo wühkhe luang, junangde küdükhüh lanü inü amükheahbah.”

³Tüshe Joabnü kiulongthsüpuh ki alo, “I tungpuh kiulongthsüpuh müknü angükhukpü thsüde mihtsürü wühkhe ju ATUNGPUHNÜ chinü alü kamshang! Tüshe I tungpuh kiulongthsüpuhnü tümüde ha rhimoshihnela?”

⁴Tüshe kiulongthsüpuh yunü Joab tüsho bonungrü limthorübo thadoabah. Jumonü Joab tüsho bonungrü limthorübonü Israel mihtsürü wühkhe lupü thsüde kiulongthsüpuh mikinü wukhiuk.

⁵Arünü Jordan ho, tüsho düjinglim Aroer le jindükhün phulung lakhi kiuto chingnü tankihbah Gad tüsho Jazer lim yü.

⁶Jushu arübo Gilead tüsho Hitrü lo ching Kadesh lim arü; tüsho Dan ching arübah, ju chingnü Sidon mükamde yü,

⁷tüsho Tair chipi le Hivrü tüsho Kananrü kiutobo alala ching arü; tüsho arü Juda lomi Negeb thrip Beersheba ching yü.

⁸Jumonü küyimki arü lomi alala ching yükhea, arübo khinu tuku tüsho nimung muku akheam ching Jirusalem lim alodarü.

⁹Joabnü wühkhe kheyukkhibo kiulongthsüpuh ki thiyusheak jih: Israel ching thsühnuk shuhsorü bonungrü 800,000 tüsho Juda ching 500,000 lakheah.

¹⁰Tüshe ju dunglim, David mulong thsümünim tümütüsho apinü mihtsürübo wühkhe lu. Davidnü ATUNGPUH ki tha, “Inü arhimokhi ching neak tode yihbeakdo. Tüshe kheakü, O ATUNGPUH , inü nü ki tamkhüntamnüchoh, nü yamlarü neak bahjang; tümüde inü bünkeangbünrude rhimodo.”

¹¹Küyimki Davidnü yapsu asürükhea, ATUNGPUH yu David yo wukihrü Gad kilim arü, tüsho tha,

¹²“Yüang tüsho David ki thaang: Hanangde ATUNGPUHNÜ tha: Inü nü kilim mungji mahsam jihchoh; khülang mokhitang, tüsho inü ju nü ki rhimobah.”

¹³Jumonü Gadnü David kilim arübah api ki tha; anihbuhnü api ki keokhi, “Nü lomi ching kam mahsam khümzung arüba shi? Yungsho nü riribonü nü yanchoki arü müngüh khinu mahsam tsoba shi? Yungsho nü lomi ching nimung mahsam arüm laba shi? Kheakü lümakheahang, tüsho I thiyibuh kilim alokhi tümü lulobah ayübanü mokhitang.”

¹⁴Judüki Davidnü Gad ki tha, “I lümthsünü ato ching lah; ikenü ATUNGPUH khah ching yüzahanü, tümüde api mihmüthsüm tolah; tüshe inü mihtsürü khah ching müyüzahnü.”

¹⁵Jumonü ATUNGPUHNÜ ju yapsunü akhukhi kim khiungde Israelrü kheak arüm yüshih; tüsho mihtsürü 70,000 Dan chingnü Beersheba khiungde sheabah.

¹⁶Tüshe küyimki yunirünü athsümünimpü Jirusalem lim akhah chungkhea, ATUNGPUHNÜ amütsü dünkheak lümlo, tüsho mihtsürü bolung athsümünimpü hanbah arürü yunirü ki ju tha, “Ha suhdo, kheakü nü khah tukloang.” Judüki ATUNGPUH yunirü ju Jebusrü Arauna hinitpung ching lakheah.

¹⁷Küyimki Davidnü mihtsürü thsümünimde alakhi yunirü ju angükhea, apinü ATUNGPUH ki tha, “I langzünü neak yihbeakdo, tüsho I langzünü mihbukmuyuk rhimodo; tüshe harü namfimihnubonü tümü rhimoa la? Inü tamkhüntamnüchoh, nü khahnü I tüsho I buh yamkhün kheak azhihang.”

¹⁸Ju nimung Gadnü David kilim arü tüsho api ki tha, “Wutuang tüsho Jebusrü Arauna hinitpung ching ATUNGPUH kilim kingaün sadam khülang thsüang.”

¹⁹ATUNGPUHNÜ thiyukhüm jihkhi Gadnü athakhi yande Davidnü wutu.

²⁰Küyimki Araunanü abinkhia kheahkhea, apinü kiulongthsüpuh tüsho api yamlarübo anihbuh kilim arüde ngü; tüsho Araunanü wukhiuk tüsho kiulongthsüpuh miki akin jihde alo kheak khukning.

²¹Araunanü tha, “I tungpuh kiulongthsüpuh tümüde api yamlarü kilim arükhea?” Davidnü tha, “ATUNGPUH kilim kingaün sadam khülang thsüpü nü kheaknü hinitpung thulopü ah, junangde arüm ju mihtsürübo kheaknü atuklobah.”

²²Jushu Araunanü David ki tha, “I tungpuh kiulongthsüpuhnü lushang tüsho apinü tümü tsülanü jihshang; ha ching taka kingaünpü thsungkheak moshipungbo lah, tüsho atakbe sang thsüpü hinitpung khimkhibo tüsho moshi kheak yo sangkapbo lah.

²³O kiulongthsüpuh, ha alala Araunanü kiulongthsüpuh kilim jihchoh.” Tüsho Araunanü kiulongthsüpuh ki tha, “ATUNGPUH nü Thrünpuhnü mulongde nü ki aloshang.”

²⁴Tüshe kiulongthsüpuhnü Arauna ki tha, “Yung, tüshe inü jurü adün jihbah nü kheaknü athulobah; adün tümü müjihde inü ATUNGPUH I Thrünpuh ki taka mükingaün.” Jumonü Davidnü hinitpung tüsho moshipung ju shotoyinchi 50nü thulo.

²⁵Davidnü ju kheak ATUNGPUH kilim kingaün sadam thsü, tüsho taka kingaünkhi le mungtsü kingaünbo jih. Jumonü apinü lomi thsungkheak tamkhüntamnükhi ATUNGPUHNÜ alojih, tüsho arüm ju Israel chingnü tukloabah.