Read Yimchungru Naga 2 Sam 4 Bible Online

2 Sam 4 - Yimchungru Naga bible

2 Sam 4

¹Küyimki Saul tsührü Ishboshetnü Abner ju Hebron ching shedo de asokhea, api mulong niniabah, tüsho Israel alala arhunganim.

²Kheakü Saul tsührü a thirithsü ching wühkenorü mahne lakheah; khülang mung Baana, tüsho püpü mung Rekab. Ane Beeroth chingnü Benjaminrü Rimmon tsührü ah — tümüde Beeroth ju Benjamin trük chingnü alakheah.

³( Kheakü Beeroth mihtsürübo tsode yünü Gittaim ching khihni khiungde khiungkerü nangde lah.)

⁴Saul tsührü Jonathan a jing kikkhi tsührü khülang lakheah. Küyimki Saul tüsho Jonathan dünkheak Jezreel chingnü thiyusheak arükheanü api kam 5 lakheah. Api mütrürünü shuh-a lubah alihde tso; tüsho anihbe niokheamde atsochoki, api ayokhi tüsho jingkikrü kamkheah. Api mung Mephiboshet lakheah.

⁵Kheakü Beerothrü Rimmon tsührü Rekab tüsho Baana ane tsahmusu, tüsho animuro Ishboshet yam ching api sühakhimde alachoki arü.

⁶Anenü wheat hi lupü nangde api yam alunglim yüzah, tüsho abuk ching düchip; jushu Rekab tüsho akhiung Baana ane tsoabah.

⁷Kheaküshe api yappung khiungshak dükhüm kheak binde alachoki ayam ching arü; anenü api laksah tüsho aku lipshaka lu. Jushu anenü aku lubah tsüngreroro Araba limro lim tso.

⁸Anenü Ishboshet ku Hebron ching David kilim hande arü tüsho kiulongthsüpuh ki tha, “Nü rhangdung yimbuh nü riri, Saul tsührü Ishboshet ku lah; khihni ATUNGPUHNÜ Saul tüsho api tsührü kheak I tungpuh kiulongthsüpuh royimjihdo.”

⁹Davidnü Beerothrü Rimmon tsührü Rekab tüsho Baana ki alo, “ATUNGPUH rhangdung labuh hode thiyuchihchimchoh, shepünü I rhangdung I riri khah chingnü rhokhitkhea,

¹⁰küyimki khürünü I ki, ‘ Kheahang, Saul sheabahdo’ de athakhea, apinü thiyusheak atsü lubah arürü she, inü api rambah Ziklag ching laksah — ha api yusheak thsungkheaknü inü api kilim thsambah jihkheah.

¹¹Dale tüsho thiyuro mihtsürü khülang nihbuh yam ching ayapkiu kheak mihbukmuyuk mihtsürünü laksahsho, küdükhüh she alaba! Tüsho kheakü api thiyih nüke khah chingnü mükheangba de, tüsho nüke alomi chingnü müdükheakshihba de?”

¹²Jumonü Davidnü athrününgtsüngbo ki thiyukhüm jih tüsho ane laksah; arünü ane khah tüsho jingbo lipshak tüsho ane pangbo Hebron ching kekhip rheang ki zhin. Tüshe arünü Ishboshet ku a lubah Hebron ching Abner mibahpung ching kiuyukabah.