Read Yimchungru Naga 2 Sam 5 Bible Online

2 Sam 5 - Yimchungru Naga bible

2 Sam 5

¹Judüki Israel trük alala Hebron ching David ki arübah tha, “ Kheahang, isa nü shih tüsho nü thiyih ah.

²Kim anükhüh thsungkheak, küyimki Saul isa kurungkheak kiulongthsürü lakhea, nünü Israel limbe. ATUNGPUHNÜ nü ki tha: nünü I mihtsürü Israel neakbah, nünü Israel kurungkheak yakzan shuhbah.”

³Jumonü Israel azothsürü alala Hebron ching kiulongthsüpuh ki arü; tüsho kiulongthsüpuh Davidnü Hebron ching ATUNGPUH miki arü kheak tangzüng khülang thsü, tüsho arünü Israel kurungkheak kiulongthsüshihpü David mujude-mokhit.

⁴David yakzan shuhpü tankihchoki kam 30 lakheah, tüsho apinü kam yirü yakzan shuh.

⁵Hebron ching apinü Juda kurungkheak kam thüne tüsho khinu thuruk yakzan shuh; tüsho apinü Jirusalem ching Israel alala tüsho Juda kurungkheak kam samrükheak mahsam yakzan shuh.

⁶Kiulongthsüpuh tüsho amihtsürübo Jebusrü azhihde Jirusalem lim yü, ju lo ching larübonü Davidnü ha ching mazahkhuk de lümbah api ki tha, “Nünü ha ching mazahkhuk, müktukrü tüsho jingkikrünü she nü yankhita bahbah.”

⁷Judüalalashe Davidnü chipi ayünkhi Zion yankhia lu, tüsho kheakü David kiuto de lah.

⁸Davidnü ju nimung tha, “Sherünü Jebusrü laksahbanü, Davidnü amükheahnekhi müktukrü tüsho jingkikrü laksahpü keru yande yüang.” Jumonü ha ruk tha, “Müktukrü tüsho jingkikrünü ATUNGPUH yam ching müyüzah.”

⁹Davidnü chipi ayünkhi müküh, tüsho David kiuto de ji. Millo kinü rünbah alala mükamde Davidnü kiuto thrün.

¹⁰Tüsho David atobe tüsho atobe kam, tümüde ATUNGPUH Wuto Thrünpuh api lung lakheah.

¹¹Tair kiulongthsüpuh Hiramnü yunithsürübo, cedar sangbo, sangrhimosorü tüsho lungzünrü bebah David yam thsüpü yüshih.

¹²Judüki ATUNGPUHNÜ api Israel kurungkheak kiulongthsürü kamshihdo de Davidnü anikhit, tüsho apinü amihtsürü Israel thsungkheaknü api kiulongthsü shuhkih.

¹³Api Hebron chingnü arüshu, Davidnü Jirusalem ching hanniuberü tüsho niuberü ahihdo lu; tüsho tsührü athrürü tüsho aliberü ahihdo David kilim zübejih.

¹⁴Harü ha Jirusalem ching api kilim zübejihkhi mungbo: Shammua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Elishama, Eliada, tüsho Eliphelet.

¹⁷Küyimki David ju Israel kurungkheak kiulongthsürü kamshihdo de Filistiarünü asokhea, Filistiarü alala David yimde wutu; tüshe Davidnü ju sobah chipi ayünkhi ching yüzah.

¹⁸Kheakü Filistiarü arü tüsho Rephaim jindükhün ching sukkhi.

¹⁹Davidnü ATUNGPUH ki keokhi, “I Filistiarü azhihde wutuba shi? Nünü arübo I khah ching jihba shi?” ATUNGPUHNÜ David ki tha, “Wutuang; tümütüsho tsükjide Filistiarü nü khah ching jihbah.”

²⁰Jumonü Davidnü Baal-perazim ching arü, tüsho ju ching arü kuk. Apinü tha, “ Keking bukkhitkhi nangde ATUNGPUHNÜ I riribo I müngüh bukmüzütshihdo.” Jumonü ju dangpung ki Baal-perazim de ji.

²¹Ju ching Filistiarünü arü sangthsübo bah, tüsho David le amihtsürübonü lubah tso.

²²Kheaküshe Filistiarü atu, tüsho Rephaim jindükhün ching sukkhi.

²³Küyimki Davidnü ATUNGPUH ki keokheanü, apinü tha, “Nü duwutu; arü dunglim mükamde yüang, tüsho balsam sang kinü arü tholoang.

²⁴Küyimki balsam sang kumung tsahkhi düsheak nünü asobanü, judüki rhüngrhüngang; tümüde Filistia bonungrü kinga lungshihpü ATUNGPUH nü müngühnü yüdo.”

²⁵ATUNGPUHNÜ thiyukhüm jihkhi nangde Davidnü rhimo; tüsho apinü Filistiarü Geba chingnü Gezer khiungde yande müsham.