Read Yimchungru Naga 2 Sam 8 Bible Online

2 Sam 8 - Yimchungru Naga bible

2 Sam 8

¹Kim anükhüh dunglim, Davidnü Filistiarü yan tüsho arü bukkhüp kamshih; Filistiarü khah chingnü Davidnü Metheg-amma lu.

²Apinü kheaküshe Moabrü kuk tüsho arübo alo kheak yapshihbah liunü ake; apinü asheshihpü liu yung mahnenü ake, tüsho yung khülang akekhi ju rhangdung lashihpü thsü. Tüsho Moabrü ju David yamlarü kamabah tüsho api kilim ruk jih.

³Kheaküshe Zobarü Rehob tsührü kiulongthsüpuh Hadadezer anihbuh lung khimkhi thsülopü Euphra lim yüde alachoki Davidnü laksah.

⁴Davidnü api kheaknü khoraberü 700, tüsho jingnü atsahrü bonungrü 20,000 lu. Apinü lolungbe 100 thsungkheak khorabo suhdahde zobah aningkhi alala ajing lipshakjih.

⁵Küyimki Damaska ching larü Siriarünü Zobarü kiulongthsüpuh Hadadezer rungpü arükhea, Davidnü Siriarü mihtsürü 22,000 laksah.

⁶Judüki Damaska ching lakhi Siriarü bolung Davidnü bonungrü yambo thsü; tüsho Siriarü ju David yamlarü kam tüsho ruk hanbah arü, David yüpungbo ching ATUNGPUHNÜ akuk ngüshih.

⁷Hadadezer yamlarübonü suna tsungbo shuhkhi Davidnü lu tüsho Jirusalem lim lubah arü.

⁸Hadadezer kiutobo, Beta tüsho Berothai chingnü kiulongthsüpuh Davidnü müwayinchi ahihdo lu.

⁹Küyimki Davidnü Hadadezer bonungrü kukkhi Hamath kiulongthsüpuh Toinü asokhea,

¹⁰Toinü api tsührü Joram kiulongthsüpuh David ki salüm tüsho makshe jihshihpü yüshih tümütüsho apinü Hadadezer bede keochihbah api kuk. Kheakü Hadadezernü Toi kheak ahihdo ki thirithsüde alakheah. Joramnü shotoyinchi, suna tüsho müwayinchi han;

¹¹kiulongthsüpuh Davidnü trükshihbo kheaknü alukhi shotoyinchi tüsho suna alala lungnü harü she bebah apinü ATUNGPUH kilim müsühkhit,

¹²Edom, Moab, Amonrü, Filistiarü, Amalek, tüsho Zobarü Rehob tsührü kiulongthsüpuh Hadadezer kheaknü ayankhikhibo.

¹³Davidnü anihbuh thsungkheak mungthu ngü. Küyimki api alodarükhea, apinü Thimi Jindükhün chingnü Edomrü 18,000 laksah.

¹⁴Apinü Edom alala ching bonungrü yam thsü tüsho Edomrü alala David yamlarü kamabah. Tüsho David yüpungbo ching ATUNGPUHNÜ akuk ngüshih.

¹⁵Jumonü Israel alala kurungkheak Davidnü kiulongthsü; tüsho Davidnü thiyuro tüsho alungkinü api mihtsürü alala ki rhimo.

¹⁶Zeruia tsührü Joab ju bonungrü kurungkheak limthorü lakheah; Ahilud tsührü Jehoshaphat athrütyukrü lakheah;

¹⁷Ahitub tsührü Zadok tüsho Abiathar tsührü Ahimelek büne amükeamrü lakheah; Seraia a athrütbuh lakheah;

¹⁸Jehoiada tsührü Benaia ju Kerethrü tüsho Pelethrü kurungkheak aberü lakheah; tüsho David tsührübo amükeamrü lakheah.