Read Yimchungru Naga 1 Kiu 10 Bible Online

1 Kiu 10 - Yimchungru Naga bible

1 Kiu 10

¹Küyimki Sheba kiulongthsübenü Solomon mungthukhi sokhea, (ATUNGPUH mung hode mungthukhi) akeokhikhibo amüküp lubah alibenü api rükakipü arü.

²Alibenü maba-thsürü ahihdo lung mungji aphuaphu hankhi kemelbo, suna ahihdo, tüsho amo-achak lungbo hanbah Jirusalem lim arü; tüsho küyimki alibe ju Solomon ki arükhea, alibenü alüm ching lakhi alala api ki tha.

³Alibenü akeokhikhibo alala Solomonnü alokham; apinü alibe ki müthanakkhukpü thsüde kiulongthsüpuh thsungkheaknü khide achak mülakheah.

⁴Küyimki Sheba kiulongthsübenü Solomon lümlung, apinü athsükhi thüyam alala kheahkhitkhea,

⁵api dükhüm kheak tsühyungbe, api torü yambo, tüsho api yamlarübo arükhi, arü khimmih, api pung-jihrübo, tüsho apinü ATUNGPUH yam ching taka kingaünkhibo ngükhea, anihbe sheak mülade kam.

⁶Jumonü alibenü kiulongthsüpuh ki tha, “Nünü akuk ngüde rhimokhibo tüsho nü lümlung dünkheak inü I lomi chingnü asokhi yusheak dükdü ah,

⁷tüshe I arübah I müknü müngüyi khiungde inü akin mülakheah. Chama lang she I ki müthaa lah; nü lümlung tüsho lakhitnü inü asokhi yusheak zhihodo.

⁸Nü niuberübo asühpü! Nü yamlarübo mutuklode nü ki arürübo tüsho nü lümlung sorü asühpü!

⁹Nü kheak asühbuh tüsho nü Israel kiulongthsü-binkiu kheak binshihbuh ATUNGPUH nü Thrünpuh shiang! Tümütüsho ATUNGPUHNÜ lünnü Israel muzhodo, jak mükheahpü tüsho thiyuro rhimopü apinü nü kiulongthsürü kamshihdo.”

¹⁰Judüki alibenü kiulongthsüpuh kilim suna khahngak 4000 akumung mungji aphuaphu ahihdo tüsho amo-achak lungbo jih; Sheba kiulongthsübenü kiulongthsüpuh Solomon kilim jihkhi mungji aphuaphu hadükhüh küyimkishe hande marüde alakheah.

¹¹(Kheaküshe, Hiramnü sangkungbo chingnü suna, almug sang ahihdo tüsho amo-achak lungbo Ophir chingnü hanbah arü.

¹²Kiulongthsüpuhnü almugnü ATUNGPUH yam tüsho kiulongthsüpuh yam duhlobe, tüsho khün thsürü thsungkheaknü bingkhungbo tüsho bingshangbo thsü; khihni khiungde hadürü almug sang marü yungsho müngülo.)

¹³Tüsho kiulongthsü thsambah jihkhi kheak khiode Sheba kiulongthsübenü lunede akheangkhi alala Solomonnü alibe kilim jih. Jushu alibenü nihbe yamlarübo lung Sheba lomi lim alode yü.

¹⁴Kam khülang ching Solomon kilim arükhi suna ju khahngak 23,000 bande lakheah,

¹⁵ju yinzüyindorü tüsho shothsümolorü tüsho Arabia kiulongthsürü le lomi ching kovünorbo kilimnü arükhi ching yukrulah.

¹⁶Kiulongthsüpuh Solomonnü sunanü akingkhi tsung atoto 200 thsü; tsung ato abande suna khahngak 7 bande yüzah.

¹⁷Apinü sunanü akingkhi tsung 300 thsü; tsung abande suna khahngak 2 bande yüzah; tüsho kiulongthsüpuhnü jurübo Lebanon Murung Yam ching yuka zo.

¹⁸Kheaküshe kiulongthsüpuhnü kiulongthsü-binkiu ato thsotorünü thsü, tüsho ju kheak suna müthsün yihkih.

¹⁹Kiulongthsübinkiu ju jingdükü 6 lakheah. Kiulongthsü-binkiu aku kheak dunglim peang ju mükama lakheah, tüsho binkiu thrip abande khah angüpung tüsho ju yean kekhüzü 2 zhipde thsü,

²⁰jingdükü 6 ching khülang khülang aban akheam kheak kekhüzü 6 thsübah 12 zhip. Kiulongthsü küching she ha ruk küyimkishe müthsüakheah.

²¹Solomon yungbe pungbo alala sunanü thsü, tüsho Lebanon Murung Yam ching lakhi pungphurubo ju suna müthsünnü thsü, shotoyinchi a mulu, tümüde Solomon nimungbo ching ju amo-achak ah de mülüm.

²²Tümüde keto ching Hiram sangkungbo lung kiulongthsüpuh sangkungbo lakheah. Kam mahsam ching khülang ki Tarshish sangkungbonü suna, shotoyinchi, thsotorü, shihngü tüsho shuhyibo hanbah arü.

²³Hanangde kiulongthsüpuh Solomon ju lakhit tüsho lümlung ching lomi kiulongthsürübo kheaknü ahokhi lakheah.

²⁴Thrünpuhnü api lümkhi ching yukjihkhi lümlung anipü lomi athrünkhinü Solomon kilim arüpü kün.

²⁵Mihbüm abannü thsambah, shotoyinchi kukrukbo, suna, khimmih, thsühnukbo, mungji aphuaphubo, khora, khoranunu, kam aban hihdakde lubah arü.

²⁶Solomonnü khora-lolungbe tüsho khorabo bemukhung; khoralolungbe kiutobo tüsho Jirusalem ching zokhi api yo khora-lolungbe 1400 tüsho khora 12,000 lakheah.

²⁷Kiulongthsüpuhnü api Jirusalem ching shotoyinchi ju lungbo nangde kamshih tüsho apinü cedarbo ju Shephela ching lakhi sangzhinasodung nangde hihdakde kamshih.

²⁸Solomonnü khorabo Ijip tüsho Kue chingnü lubah arü, tüsho kiulongthsüpuh shothsümolorünü jurübo amo jihbah Kue chingnü leangkhi.

²⁹Khora-lolungbe ju Ijip chingnü shotoyinchi 600 tüsho khora 150 jihbah lubah arü; junangde kiulongthsüpuh shothsümolorü hode jurübo ju Hit tüsho Siria kiulongthsürübo kilim mühah-a yüshih.