Read Yimchungru Naga 1 Kiu 13 Bible Online

1 Kiu 13 - Yimchungru Naga bible

1 Kiu 13

¹Jeroboamnü rhümthüneabe jihpü kingaün sadam ki zhipchoki, Thrünpuh mihtsürü khülang ATUNGPUH yu hode Juda chingnü Bethel lim akhiuk

²tüsho ATUNGPUH yu hode kingaün sadam azhihde zhiyuk, tüsho tha, “O kingaün sadam, kingaün sadam, ATUNGPUHNÜ ha thachoh; ‘ Tsührü khülang David guk ching zübebah, amung Josia; tüsho apinü nü kheak rhümthüneabe jihrübo awung achangbo amükeamrübo nü kheak laksah-a kingaünbah, tüsho mihtsürü robo nü kheaknü atakbah.’”

³Ju nimungnü apinü amütsan jihde tha, “Ha ATUNGPUHNÜ athakhi amütsan ah: ‘ Kingaün sadam akeambah tüsho ju kheak lakhi awahbo sukkhita bahbah.’”

⁴Küyimki Thrünpuh mihtsürünü kingaün sadam azhihde Bethel ching zhikhi kiulongthsüpuhnü asokhea, Jeroboamnü kingaün sadam kheaknü akhah chungkhitbah tha, “Api ramang!” Tüshe api azhihde akhah chungkhitkhi ju thripshe thsüabah, junangde apinü anihbuh kilim tholoa mulukhuk.

⁵Kingaün sadam she keamabah, tüsho A TUN GPU H yu hode Thrünpuh mihtsürünü ajihkhi amütsan yande kingaün sadam kheaknü awah sukkhita bah.

⁶Kiulongthsüpuhnü Thrünpuh mihtsürü ki tha, “ Kheakü ATUNGPUH nü Thrünpuh ki mihmuzho mushuang, tüsho I thsungkheak tamkhüntamnüjang, junangde I khah I kilim alodarübah.” Jumonü Thrünpuh mihtsürünü ATUNGPUH ki mushu; tüsho kiulongthsüpuh khah api kilim alode arü, tüsho atan nangde kamlo.

⁷Judüki kiulongthsüpuhnü Thrünpuh mihtsürü ki tha, “I lung thüyam lim arang tüsho yimtsühang, tüsho inü nü kilim thsambah khülang jihbah.”

⁸Tüshe Thrünpuh mihtsürünü kiulongthsüpuh ki tha, “Nünü nü lakhit thripkhüh I jihjih she, I nü lung müyü; yungsho ha dangpung ching inü jim mütsüh yungsho ke muyung.

⁹Ha thsungkheak A TUN GPU H yu hode I ki thiyukhüm jih: Nünü jim mütsüh, yungsho ke muyung, yungsho nü arükhi limronü darülo.”

¹⁰Jumonü apinü püpü limro yü, tüsho api Bethel lim arükhi limronü alode marü.

¹¹Kheakü Bethel ching awün wukihrü khülang lakheah. Thrünpuh mihtsürünü ju nimung Bethel ching rhimokhi alala atsührübonü arübah api ki tha; apinü kiulongthsüpuh ki thakhi yubo she arünü arü abuh ki thaa huh.

¹²Arü abuhnü arü ki tha, “Api küpü limronü tsode?” Tüsho Thrünpuh mihtsürü Juda chingnü arübah atsokhi limro atsührübonü api ki huh.

¹³Judüki apinü atsührübo ki tha, “I thsungkheaknü donki thsakhamang.” Jumonü arünü api thsungkheak donki khülang thsakham tüsho api ju kheak künkih.

¹⁴Apinü Thrünpuh mihtsürü dunglim yü, tüsho api thülamdung khüp bina ngü. Apinü anihbuh ki tha, “Nü Juda chingnü arükhi Thrünpuh mihtsürü a de?” Apinü alo, “I ah.”

¹⁵Judüki apinü anihbuh ki tha, “I lung thüyam lim arang tüsho tsühyungang.”

¹⁶Tüshe apinü tha, “I alode marükhuk; yungsho ha dangpung ching I nü lung jim mütsüh yungsho ke muyung;

¹⁷tümüde ATUNGPUH yu hode I ki thado: Nünü ju ching jim mütsüh yungsho ke muyung; yungsho nü arükhi limronü dürholo.”

¹⁸Judüki wukihrü awünbuhnü alo, “Nü nangde I she wukihrü ah, tüsho ATUNGPUH yu hode yunirü khülangnü I ki tha: Api nü lung belobah nü yam ching arang, junangde apinü jim tsühbah tüsho ke yungbah.” Tüshe apinü anihbuh ki akeangyu thade alakheah.

¹⁹Judüki Thrünpuh mihtsürünü api lung alode yü, tüsho api yam ching jim tsüh tüsho ke yung.

²⁰Arübo dükhüm kheak binde alachoki, api belode arübuh wukihrü kilim ATUNGPUH yu arü;

²¹tüsho Juda chingnü arükhi Thrünpuh mihtsürü ki apinü zhiyuk, “ATUNGPUHNÜ ha thachoh: Tümütüsho nünü ATUNGPUH yu mani tüsho ATUNGPUH nü Thrünpuhnü nü ki thiyukhüm jihkhi müyan,

²²tüshe alode arü tüsho apinü nü ki jim dütsüh tüsho ke düyung de athakhi dangpung ching jim tsüh tüsho ke yung. Jumonü nü pang ju nüsa jipürü mibahpung ching kiuyuka mübah.”

²³Thrünpuh mihtsürünü jim tsüh tüsho ke yung dunglim, arünü api thsungkheak api belode arübuh wukihrü yo donki khülang thsakham.

²⁴Judüki api limro ching yüchoki, kekhüzü khülangnü limro ching api shoru tüsho api nguhsah. Apang ju limro ching bah-a lakheah, tüsho donki ju yean zhip; kekhüzü she ju ki zhip.

²⁵Mihtsürü hode yü tüsho limro ching pang ki kekhüzü zhipbah ngü. Tüsho arünü arübah wukihrü awün lapung kiuto ching tha.

²⁶Küyimki api limro chingnü belode arübuh wukihrünü ju sokhea, apinü tha, “Ha ATUNGPUH yu manibuh Thrünpuh mihtsürü ah; jumonü ATUNGPUHNÜ api ki thakhi yu yande ATUNGPUHNÜ api kekhüzü kilim jihbah, api zamthünak tüsho nguhsahdo.”

²⁷Tüsho apinü atsührübo ki tha, “I thsungkheak donki khülang thsakhamang.” Jumonü arünü ju thsakham.

²⁸Judüki api yü tüsho mi ju kekhüzü le donki ki limro ching bah-a ngü. Kekhüzünü mi ju mütsüh yungsho donki munguhsah.

²⁹Wukihbuhnü Thrünpuh mihtsürü mi ju shuhmusua donki kheak yihkih, tüsho atüzhopü tüsho api kiuyuka bahpü kiuto ching lubah arü.

³⁰Apinü mi ju anihbuh kiuyuk ching yapshih; tüsho api kheak tüzhode tha, “O, I keonio!”

³¹Apinü anihbuh kiuyuka bahshu, apinü atsührübo ki tha, “I küyimki shebanü, Thrünpuh mihtsürü mibahpung I mi bahang; I robo api robo ki yapshang.

³²Tümüde apinü A TUN GPU H yu hode Bethel ching kingaün sadam tüsho Samaria kiuto ching achang dangpungbo kheak lakhi thüyambo azhihde azhiyukkhi yusheak tsükjide adünjibah.”

³³Ha dünjishu she, Jeroboamnü api amütsü limro chingnü murholo, tüshe kheaküshe mihtsürü alala bolungnü achang dangpungbo thsungkheak amükeamrü thsüshih; sherünü amükeamrü kamnelanü apinü achang dangpungbo thsungkheak müsühkhit.

³⁴Hadürü ha Jeroboam yamkhün kilim neak kamabah, junangde tsükkhita bahpü tüsho alomi chingnü adükheakshihpü kam.