Read Yimchungru Naga 1 Kiu 18 Bible Online

1 Kiu 18 - Yimchungru Naga bible

1 Kiu 18

¹Nimung ahihdo dunglim, tsüng marükhi kam mahsampü ching ATUNGPUH yu Elija kilim arü, “Yüang, nünü Ahab shoruang; inü alomi ching tsüng arüshihbah.”

²Jumonü Elijanü yü tüsho Ahab shoru. Khümzung ju Samaria ching khitode alakheah.

³Ahabnü kiulongthsüpuh yam abebuh Obadia ji. ( Kheakü Obadianü tode ATUNGPUH wüntre;

⁴küyimki Jezebelnü A TUN GPU H wukihrübo laksahkhamkhea, Obadianü wukihrü chi khülang bea lubah arü thünim thünim lungkhün mahne ching jikshih, tüsho arü kilim yikhap tüsho ke jih.)

⁵Judüki Ahabnü Obadia ki tha, “ Kenü lakhibo tüsho ayung lakhi lomi hode yüang; khükijua khorabo le khoranunubo zopü rimkiu isanü angübah, tüsho shiwühbo khülang she müdükheak.”

⁶Jumonü arünü hode ayüpü lo arü dükeak chamachih; Ahabnü khülim anihbuh zangrü yü, tüsho Obadianü püpü lim anihbuh zangrü yü.

⁷Obadia limro ching lachoki, Elijanü api shoru; Obadianü api kheahkhitbah khukning tüsho tha, “Ju nü a de, I tungpuh Elija?”

⁸Apinü anihbuh ki alo, “I ah. Yüang, Elija ha ching lah de nü tungpuh ki thaang.”

⁹Tüsho apinü tha, “Inü künangde neak yihbeakkhi, I laksahshihpü nü yamlarü Ahab kilim jihba le?

¹⁰ATUNGPUH nü Thrünpuh lale, nü yimpü trükshih yungsho kiulongthsü sheshe müthiyikhi müla; tüsho küyimki arünü, ‘ Api ha ching müla’ de athaba, nü müngü de kiulongthsü yungsho trükshihnü api ki thiyuchihchimshih.

¹¹Tüshe kheakü nünü thachoh, ‘Yüang, Elija ha ching lah de nü tungpuh ki thaang.’

¹²I kheakü tsoakede ATUNGPUH menü inü mümükheahkhi lim nü bede ayübah; jumonü, küyimki inü yübah Ahab ki thaba tüsho apinü nü müngükhuksho, I nü yamlarü I athunuchokinü ATUNGPUH wüntrede lalashe apinü I laksahbah.

¹³Jezebelnü ATUNGPUH wukihrübo laksahchoki, inü künangde A TUN GPU H wukihrü chi khülang ramkhide arü thünim thünim lungkhün mahne ching jihshihkhea tüsho arü kilim yikhap le ke jihkhi inü I tungpuh ki mütha de?

¹⁴Kheaküshe nünü thachoh, ‘Yüang, Elija ha ching lah de nü tungpuh ki thaang’; apinü tsükjide I laksahbah.”

¹⁵Elijanü tha, “Wuto ATUNGPUH lale, shepü miki I zhipcho, tsükjide khihni api ki I huhbah.”

¹⁶Jumonü Obadianü Ahab shorupü yü, tüsho api ki tha; tüsho Ahabnü Elija shorupü yü.

¹⁷Küyimki Ahabnü Elija ngükhea, Ahabnü api ki tha, “Israel küpkhuk jihrü ju nü a de?”

¹⁸Apinü alo, “Inü Israel küpkhuk müjih; tüshe nü tüsho nü buh yamkhünnü küpkhuk jihdo, tümütüsho nünü ATUNGPUH yukhümbo bahyuk tüsho Baalbo yando.

¹⁹Kheakü jumonü Jezebel dükhüm kheak yimtsührü Baal wukihrü 450 tüsho Ashera wukihrü 400 lung Israel alala Karmel wung kheak I ki bemukhungang.”

²⁰Jumonü Ahabnü Israelrü alala tüsho Baal wukihrübo Karmel wung kheak mukhungpü ji.

²¹Judüki Elijanü mihtsürübo alala thüninde arü tüsho tha, “Nüsa külokhüh lümkhi mahne dükeak leamba le? Mürangkhüh ATUNGPUH ju Thrünpuh a sho api yanang; tüshe Baal thsüa lasho, api yanang.” Mihtsürübonü api ki thiyu bümkhüh she malo.

²²Judüki Elijanü mihtsürübo ki tha, “ATUNGPUH wukihrü bolung I lang aninga lah; tüshe Baal wukihrübo akhekhi 450.

²³Moshipung mahne isa kilim jihang; arünü arü thsungkheak moshipung khülang mokhitshihbah, adütre kamde khapshang, tüsho sang kheak zoshang, tüshe ju kheak mo muyuk; inü moshipung püpü thsakhambah sang kheak zobah, tüshe ju kheak mo muyuk.

²⁴Jushu nüsanü nüsa thrünpuh mung jibah tüsho inü ATUNGPUH mung jibah; thrünpuh shepünü mo hode alochonü api Thrünpuh ah.” Mihtsürü alalanü alo, “Tsüde thado!”

²⁵Judüki Elijanü Baal wukihrübo ki tha, “Nüsa thsungkheak moshipung khülang mokhitang tüsho ju akhuhde thsakhamang, tümüde nüsa hihlah; jushu nüsa thrünpuh mung jiang, tüshe ju kheak mo tümü düyuk.”

²⁶Jumonü arü kilim jihkhi moshipung arünü lubah thsakham, tüsho yapsunü animuro khiungde Baal mung jide zhi, “O Baal, isa ki alojang!” Tüshe düsheak tümü müla tüsho malojih. Arünü athsükhi kingaün sadam mükamde arünü tsün.

²⁷Animuro Elijanü arü ki keangrümünede tha, “Achangnü zhiang! Tsükjide api thrünpuh khülang ah; api lümkhi hihlah, yungsho api zuknuklah, yungsho api hantsah yüa lah, yungsho khükia api yapshea lah tüsho ayihmusubeah.”

²⁸Judüki arünü achangnü zhi, tüsho arü lalim yakli yande, arünü arü zangrü pang chingnü thiyih mubukkhityi khiungde nukshang tüsho thsühbonü tsüt.

²⁹Animuro hobah, arelim taka kingaünpü khiungde arünü mutuklode kolahkochide dapdapruru. Tüshe düsheak müla, tümü she malojih.

³⁰Judüki Elijanü mihtsürü alala ki tha, “I kilim phünide arang”; tüsho mihtsürü alala api ki phünide arü. Akhuhde apinü lungabahkhi A TUN GPU H kingaün sadam thsakhamlo;

³¹Elijanü Jakob tsührü khekhi trükbo ayannü lung 12 lu, shepü ki ATUNGPUH yu arüshihde tha, “Israel ju nü mung labah”;

³²ATUNGPUH mung ching apinü lungbonü kingaün sadam thsü. Apinü ju mükamde ke pungdüchi 14 yüzahpü thsüde atonü wungkeru kiu.

³³Ju khin apinü sang akhinashunü zobah moshipung ju adüban adübanü khapthünak tüsho sang kheak zo. Apinü tha, “Pangjiphüh ching ke yukang tüsho taka kingaünkhi le sang kheak bukkihang.”

³⁴Jushu apinü tha, “Mahne kipü she thsüloang”; tüsho arünü mahne kipü thsülo. Kheaküshe apinü tha, “Mahsam kipü thsang”; tüsho arünü mahsam kipü thsü,

³⁵jumonü kingaün sadam alala mükamde ke buk, tüsho wungkeru kiukhi she kenü mi.

³⁶Animuro kingaün jihkhi kim ching wukihbuh Elija phünide arü tüsho tha, “O ATUNGPUH , Abraham, Isak, tüsho Israel Thrünpuh, nü Israel ching Thrünpuh tüsho I nü yamlarü tüsho nü yukhüm hode harü alala rhimodo de khihni mükheahshang.

³⁷I ki alojang, O ATUNGPUH , I ki alojang, junangde ha mihtsürübonü, O ATUNGPUH , nü Thrünpuh ah de amükheahbah tüsho nünü arü mulong rholoshihbah.”

³⁸Judüki ATUNGPUH mo aki tüsho taka kingaünkhi sang, lung, asungthulung aniuabah, tüsho wungkeru kiukhi ching ke she kungabahshih.

³⁹Küyimki mihtsürü alalanü ju ngükhea, arü miro mükhümbah tha, “ATUNGPUH ju Thrünpuh ah; ATUNGPUH lang Thrünpuh ah.”

⁴⁰Elijanü arü ki tha, “Baal wukihrübo ramang; arü khülang she dütsoshih.” Judüki arünü arübo ram; tüsho Elijanü arübo Kishon dükhün ching bede aki, tüsho arübo ju ching laksah.

⁴¹Elijanü Ahab ki tha, “Wutubah tsühang tüsho yungang; tümüde ju ching tsüng hihde arükhi düsheak lah.”

⁴²Jumonü Ahabnü wutubah tsüh tüsho yung. Elijanü Karmel mujuk kheak wutu; ju ching apinü alo kheak khukning tüsho amiro api mukhukbo dükeak yüzah.

⁴³Apinü api yamlarü ki tha, “ Kheakü wutuang, keto limpeang kheahang.” Apinü wutubah kheah tüsho tha, “Ju ching tümü müla.” Judüki apinü tha, “Thüne ki yüloang.”

⁴⁴Athüne kipü apinü tha, “ Kheahang, amo anikhüh mihtsürü khah dükhüh keto chingnü atuchoh.” Judüki apinü tha, “Yübah Ahab ki thaang, ‘Nü khora-lolungbe thrüa lung tüsho tsüngnü nü müyanphuhchokinü yükiang.’”

⁴⁵Anikhüh kim chingnü amobo tüsho apung bede thüning mitingabah; tsüng ju sopunglipkhiuk thsüde arü. Ahabnü Jezreel lim yü.

⁴⁶Tüshe ATUNGPUH khah Elija kheak lakheah; apinü achim rüma lu tüsho Jezreel limro lim Ahab müngüh alihde yü.