Read Yimchungru Naga 1 Kiu 2 Bible Online

1 Kiu 2 - Yimchungru Naga bible

1 Kiu 2

¹Küyimki David ashepü nimung khiungde arükhea, apinü atsührü Solomon ki thsangdan tüsho tha:

²“I alomi alala yüpung limro yüpü khiungmuroh. Reangzahang, mulong toang,

³tüsho Mosa yakzan ching thrüta lakhi nangde api limrobo ching tsahde, api yakzanbo, api yukhümbo, api yuzüngbo tüsho api thiyumütsanbo anide ATUNGPUH nü Thrünpuhnü thiyukhüm jihkhibo zoang, junangde nünü arhimokhi alala ching tüsho nü yüpungbo ching akuk ngübah.

⁴Judüki apinü I dünkheak asukkhi ATUNGPUHNÜ api yubo zobah: ‘Nü tsühsoniusobonü arü mulong athrünkhinü tüsho arü me athrünkhinü I miki thiyuronü nihbuh limro ching anide tsahsho, Israel kiulongthsü-binkiu kheak nü müthrirü mülade müthsü.’

⁵“Kheaküshe Zeruia tsührü Joabnü I ki tümü rhimokhea, apinü Israel bonungrü limthorü mahne, Ner tsührü Abner, tüsho Jether tsührü Amasa laksah. Apinü mungtsü kim ching thirithsü thiyih bukshih, tüsho thirithsü thiyih api chim mükamde pangrümbe kheak yihkih.

⁶Jumonü nü lümlung ayannü rhimoang, tüshe abuyukkhi api ku mungtsü chingnü Ashe-lomi ching düyüzahshih.

⁷Judüalalashe, Gileadrü Barzillai tsührübo kheak tsüde rhimoang, tüsho arübo a nü dükhüm kheak yimtsührü bolung beshang; tümüde küyimki I nü khiung Absalom kheaknü alihde atsokheanü arünü thiyuro-amuzhonü I shoru.

⁸Kheaküshe nü lung Bahurim chingnü Benjaminrü, I Mahanaim lim yüchoki khide khühde I athrubuh Gera tsührü Shimei lah; tüshe küyimki apinü Jordan ching I shorupü akikhea, ATUNGPUH tamde inü api ki thiyuchihchim, ‘Inü nü nukshangnü müsheshih.’

⁹Tüshe api ki amülim mülade düthsü, tümüde nü lümlung larü mihtsürü khülang ah; nünü api kheak tümü rhimobeanü amükheahbah, tüsho nünü abuyukkhi api ku thiyih bebah Ashe-lomi ching hanyukbeah.”

¹⁰Judüki David ju nihbuh jipürü lung shede yü, tüsho David kiuto ching kiuyukabah.

¹¹Davidnü Israel kurungkheak kam yirü kiulongthsü; apinü Hebron ching kam thüne kiulongthsü, tüsho Jirusalem ching kam samrükheak mahsam kiulongthsü.

¹²Jumonü Solomonnü abuh David kiulongthsü-binkiu kheak bin; tüsho api kiulongthsü düküngde kam.

¹³Judüki Haggith tsührü Adonijanü Solomon abe Bathsheba kilim arü. Alibenü keokhi, “Nü mungtsü chingnü arücho de?” Apinü alo, “Mungtsü chingnü.”

¹⁴Jushu apinü tha, “Inü nü ki thiyu khülang thapü kuknahnü?” Alibenü alo, “Thaang.”

¹⁵Apinü tha, “Kiulongthsü I yo ah tüsho Israel alalanü I kiulongthsüpü mürheangkheah de nünü mükheahlah; tahle, kiulongthsü ju müthriabah tüsho I niurü yo kamabah, tümüde ATUNGPUH kilimnü api yo thsüa lah.

¹⁶Tüsho kheakü inü nü ki khülang mushupü lah; I ki düthsunglo.” Alibenü api ki tha, “Thaang.”

¹⁷Apinü tha, “Muzhobah kiulongthsüpuh Solomon ki — apinü nü ki muthsunglo — Shunamrü Abishag I niube thsüpü keokhiang.”

¹⁸Bathshebanü tha, “Khide tsülah; nü thsung thsüde inü kiulongthsüpuh ki thabah.”

¹⁹Jumonü Bathshebanü Adonija thsung thsüde athajihpü kiulongthsüpuh Solomon ki yü. Kiulongthsüpuhnü alibe shorupü asürü, tüsho alibe ki khukning; jushu apinü anihbuh kiulongthsü-binkiu kheak bin, tüsho kiulongthsüpuh abe khilim kiulongthsü-binkiu püpü lubah arü, tüsho alibenü anihbuh tsülim peang bin.

²⁰Judüki alibenü tha, “Inü nü ki mushupü khülang lah; I ki düthsunglo.” Tüsho kiulongthsüpuhnü alibe ki tha, “Aba, thaang; tümüde nü ki inü muthsunglo.”

²¹Alibenü tha, “Shunamrü Abishag ju nü khiung Adonija niube thsüpü jihang.”

²²Kiulongthsüpuh Solomonnü abe ki alo, “Tümüde Shunamrü Abishag ju Adonija thsungkheak nünü keokhicho? Api thsungkheaknü kiulongthsü she keokhiang! Tümüde api I khiung azopü ah; api thsungkheak lang dükeo tüshe amükeambuh Abiathar tüsho Zeruia tsührü Joab thsungkheak she keokhiang!”

²³Judüki kiulongthsüpuh Solomonnü ATUNGPUH tamde thiyuchihchim, “Thrünpuhnü I kheak alü she rhimoshang, tümüde Adonijanü api rhangdung shuh-a jihde ha lümkhi thsüdo!

²⁴Kheakü jumonü shepünü I buh David kiulongthsü-binkiu kheak binshih, tüsho shepünü alokhide I kilim kiulongthsü yamkhün khülang kamshihkhea, ATUNGPUH lale, khihni Adonija asheshihbah.”

²⁵Jumonü kiulongthsüpuh Solomonnü Jehoiada tsührü Benaia yüshih; apinü anihbuh kinga lungshih, tüsho api sheabah.

²⁶Kiulongthsüpuhnü amükeambuh Abiathar ki tha, “Nü lomi lim, Anathoth ching yüang; tümüde nü asheshihpü thülünlah. Tüshe ha kim ching inü nü müsheshih, tümütüsho nünü I buh David müngüh Atungpuh T HRÜNPU H sangdan han, tüsho I buh thsünükhi alala ching nünü berungde alakheah.”

²⁷Jumonü Solomonnü Abiathar ju ATUNGPUH amükeamrü chingnü yana tsoshih, junü ATUNGPUHNÜ Shilo ching Eli yamkhün dünkheak thakhi yu dünjishih.

²⁸Küyimki Joab kilim thiyusheak arükhea (tümüde Joabnü Absalom murunga lalashe Adonija rung) apinü ATUNGPUH arüngyam ching shande yü tüsho kingaün sadam juhbo kheak ramlo.

²⁹Küyimki ha kiulongthsüpuh Solomon ki thakhea, “Joab a alihde yünü ATUNGPUH arüngyam ching lah tüsho kheakü kingaün sadam rheang ki lah,” Solomonnü Jehoiada tsührü Benaia ki tha, “Yüang, api kinga lungshang.”

³⁰Jumonü Benaianü ATUNGPUH arüngyam ching arü tüsho api ki tha, “Kiulongthsüpuhnü thiyukhüm jihchoh, ‘ Akhiukang.’ ” Tüshe apinü tha, “Muh, I ha kheak shebah.” Judüki Benaianü kiulongthsüpuh ki thiyusheak lulode arübah tha, “Ha Joabnü thado, tüsho ha I ki apinü alokheah.”

³¹Kiulongthsüpuhnü api ki alo, “Apinü athakhi nangde rhimoang, api kinga lungshang tüsho kiuyuka bahang; tüsho Joabnü akeangnü thiyih bukshihkhi amülim ju I tüsho I buh yamkhün chingnü lubah tsoang.

³²Apinü thiyih bukshihkhi ATUNGPUHNÜ anihbuh ku kheak hanlodarübah, tümütüsho I buh Davidnü mümükheahde, apinü anihbuh kheaknü atsübe thiyuro mihtsürü mahne, Ner tsührü Abner, Israel bonungrü limthobuh, tüsho Jether tsührü Amasa, Juda bonungrü limthobuh yande nukshangnü laksah.

³³Jumonü arü thiyih ju Joab ku kheak tüsho api tsühsoniusobo ku kheak lünnü arülobah; tüshe David, api tsühsoniusobo, api yamkhün, tüsho api kiulongthsü-binkiu kilim a ATUNGPUH kilimnü lünnü mungtsü labah.”

³⁴Judüki Jehoiada tsührü Benaianü wutu tüsho api kinga lungshihbah api laksah; tüsho api ju sunglo ching anihbuh yam ching kiuyukabah.

³⁵Api müthri kiulongthsüpuhnü Jehoiada tsührü Benaia ju bonungrü kurungkheak yüzahshih, tüsho kiulongthsüpuhnü Abiathar müthri amükeambuh Zadok yüzahshih.

³⁶Judüki kiulongthsüpuhnü yüshihbah Shimei jidarü, tüsho api ki tha, “Nünü Jirusalem ching thüyam khülang thsübah ju ching laang tüsho ju chingnü külim she düyü.

³⁷Tümüde nü wukhiukbah Kidron ayung ho nimungnü, nü ashebah de mütsande mükheahang; nü thiyih ju nü ku kheak kihbah.”

³⁸Tüsho Shimeinü kiulongthsüpuh ki tha, “Nünü athakhi ju tsülah; I tungpuh kiulongthsüpuhnü athakhi nangde, nü yamlarünü rhimoanü.” Jumonü Shimeinü Jirusalem ching nimung ahihkhüh la.

³⁹Tüshe kam mahsam dunglim Shimei yo azhorü mahne Gathrü Maaka tsührü kiulongthsüpuh Akish kilim tsoabahkhi dünji. Küyimki ha Shimei ki thakhea, “Nü yo azhorübo Gath ching lah.”

⁴⁰Shimeinü asürü tüsho donki kheak binbah api yo azhorübo yimde Gath ching Akish kilim yü; Shimeinü yü tüsho azhorübo Gath chingnü bedarü.

⁴¹Küyimki Shimei ju Jirusalem chingnü Gath lim yübah alodarüdo de Solomon ki thakhea,

⁴²kiulongthsüpuhnü yüshihbah Shimei jidarü, tüsho api ki tha, “ATUNGPUH tamde, ‘Nü wukhiukbah dangpung khürü ching yükhi nimungnü nü ashebah’ de nü ki thiyukhüm jihde thiyuchihchimshihkhi yung de? Tüsho nünü I ki tha, ‘Nünü athakhi tsülah; inü leangkhichoh.’

⁴³Dale küde thsah nünü ATUNGPUH tüsho inü nü ki thiyukhüm jihkhi muzokhea?”

⁴⁴Kiulongthsüpuhnü Shimei ki thalo, “Nünü I buh David kheak amütsü rhimokhi alala nü mulong chingnü mükheahlah; jumonü ATUNGPUHNÜ amütsü rhimo nü ku kheak hanlodarübah.

⁴⁵Tüshe kiulongthsüpuh Solomon a müngühmühibah, tüsho David kiulongthsü-binkiu a A TUN GPU H miki lünnü alabah.”

⁴⁶Judüki kiulongthsüpuhnü Jehoiada tsührü Benai ki thiyukhüm jih; tüsho anihbuhnü wukhiukbah api kinga lungshih, tüsho api sheabah.