Read Yimchungru Naga 1 Kiu 22 Bible Online

1 Kiu 22 - Yimchungru Naga bible

1 Kiu 22

¹Israel tüsho Siria dükeak kam mahsam thirithsü mülade yü.

²Tüshe kam asampü ching Juda kiulongthsüpuh Jehoshaphat Israel kiulongthsüpuh kilim aki.

³Israel kiulongthsüpuhnü api yamlarübo ki tha, “Ramoth-gilead isa yo ah tüsho Siria kiulongthsüpuh kheaknü alulopü isanü tümü mürhimo de nüsanü mükheahnah?”

⁴Apinü Jehoshaphat ki tha, “Ramoth-gilead ching keochihpü nü I lung arünahnü?” Jehoshaphatnü Israel kiulongthsüpuh ki alo, “I a nü ruk ah; I mihtsürübo nü mihtsürü ah, I yo khorabo nü khora ah.”

⁵Tüshe Jehoshaphatnü Israel kiulongthsüpuh ki tha, “Akhuhde ATUNGPUH ki keokhiang.”

⁶Judüki Israel kiulongthsüpuhnü wukihrübo 400 bande bemukhung, tüsho arü ki tha, “Inü Ramoth-gilead bede keochihpü yüba shi, dashi I müyüba?” Arünü tha, “Wutuang; tümüde ATUNGPUHNÜ ju kiulongthsüpuh khah ching jihbah.”

⁷Tüshe Jehoshaphatnü tha, “Isanü akeokhipü thsüde ATUNGPUH wukihrü püpü ha ching müla de?”

⁸Israel kiulongthsüpuhnü Jehoshaphat ki tha, “Isanü A TUN GPU H ki keokhipü thsüde püpürü khülang Imla tsührü Mikaia lah; tüshe inü api mükheahne, tümüde apinü küyimkishe I thsungkheaknü atsü tümü she mümüchitchoh, tüshe thsümütsü lang ah.” Jehoshaphatnü tha, “ Kiulongthsüpuhnü hadürü dütha shi.”

⁹Judüki Israel kiulongthsüpuhnü atorü khülang jibah tha, “Imla tsührü Mikaia nahde bebah arang.”

¹⁰Kheakü Israel kiulongthsüpuh tüsho Juda kiulongthsüpuh Jehoshaphat ane shulünkhim yihbah Samaria ripit limro hinitpung ki kiulongthsü-binkiu kheak bin; tüsho wukihrü alalanü arü miki müchitde alakheah.

¹¹Kenaana tsührü Zedekianü anihbuh thsungkheak yinchi shihjuhbo thsü tüsho apinü tha, “ATUNGPUHNÜ ha thachoh: Siriarü müdükheakyi khiungde nünü harünü akhubah.”

¹²Wukihrü alalanü rukhüh lang müchit tüsho tha, “Ramoth-gilead ching wutuang tüsho kukang; ATUNGPUHNÜ ju kiulongthsüpuh khah ching jihbah.”

¹³Mikaia jipü yübuh yunithsürünü api ki tha, “ Kheahang, wukihrübo yu rukhühnü kiulongthsüpuh ki atsübe lah; nü yu she arü yu ruk thsang tüsho tsüde thaang.”

¹⁴Tüshe Mikaianü tha, “ATUNGPUH lale, tümüpürü ATUNGPUHNÜ I ki thachonü, inü athabah.”

¹⁵Küyimki api kiulongthsüpuh ki arükhea, kiulongthsüpuhnü api ki tha, “Mikaia, isa keochihpü Ramothgilead ching yüba shi, dashi isa müyüba?” Apinü alo, “Wutuang tüsho kukang; ATUNGPUHNÜ ju kiulongthsüpuh khah ching jihbah.”

¹⁶Tüshe kiulongthsüpuhnü api ki tha, “Tümüshe yung tüshe A TUN GPU H mung chingnü thiyuro thade küdükhüh ki lang inü nü ki thiyuchihchimshihba?”

¹⁷Judüki Mikaianü tha, “Namfimihnu aneakrü mülakhi nangde Israel alala inü awungbo kheak hiumüzütkhi ngüdo; tüsho ATUNGPUHNÜ tha, ‘ Harübo aputungrü müla; arübo mungtsü chingnü thüyam lim yüshang.’”

¹⁸Israel kiulongthsüpuhnü Jehoshaphat ki tha, “Apinü I dünkheak atsübe mümüchit de inü nü ki mütha de, tüshe thsümütsü lang?”

¹⁹Judüki Mikaianü tha, “Jumonü ATUNGPUH yu aniang: Inü ATUNGPUH api kiulongthsü-binkiu kheak, tsülim tüsho huzulim yinmi aputungrü alala zhipbah abinkhi ngü.

²⁰Tüsho ATUNGPUHNÜ tha, ‘ Shepünü Ahab mülomülapba, junangde api wutubah tüsho Ramoth-gilead ching lungbah?’ Judüki khülangnü khülang ha tha, tüsho püpürünü ju tha,

²¹me khülang mikhuh ching arübah ATUNGPUH miki zhipbah athakhi khiungde, ‘Inü api mulomülapbah.’

²²ATUNGPUHNÜ api ki keokhi, ‘ Küde thsah?’ Apinü alo, ‘Inü awukhiukbah tüsho anihbuh wukihrübo mün ching akeangyu tharü me thsübah.’ Judüki ATUNGPUHNÜ tha, ‘Nünü api mulomülapbah, tüsho nünü api bephülapbah; wukhiukang tüsho ju rhimoang.’

²³Jumonü nünü kheahang, ATUNGPUHNÜ harü nü yo wukihrübo alala mün ching akeangyu tharü me yukjihdo; ATUNGPUHNÜ nü thsungkheak thsümütsü thsakhamdo.”

²⁴Judüki Kenaana tsührü Zedekianü Mikaia kilim atubah, api müchip kheak dam tüsho tha, “Nü ki thapü ATUNGPUH me küpü limronü I hokhea?”

²⁵Mikaianü alo, “ Küyimki nü alungbe khiungshak ching jikpü yübanü ju nimung nünü amükheahbah.”

²⁶Judüki Israel kiulongthsüpuhnü thiyukhüm jih, “Mikaia bea lung, tüsho api belobah kiuto ching kovünor Amon tüsho kiulongthsüpuh tsührü Joash kilim yüang,

²⁷tüsho thaang, ‘ Kiulongthsüpuhnü ha tha: Ha buh ha rihyam ching yukang, tüsho I mungtsü chingnü marüchoki, api ki yikhap tüsho ke lang kipduhang.’”

²⁸Mikaianü tha, “Mürangkhüh nü mungtsü ching alode arüsho, ATUNGPUHNÜ I hode masukkheah.” Tüsho apinü tha, “Nüsa mihtsürü alalanü aniang.”

²⁹Jumonü Israel kiulongthsüpuh tüsho Juda kiulongthsüpuh Jehoshaphat Ramoth-gilead ching wutu.

³⁰Israel kiulongthsüpuhnü Jehoshaphat ki tha, “Inü I jak müthribah keochihpung yübah, tüshe nü a shulünkhim phuyuang.” Jumonü Israel kiulongthsüpuhnü ajak müthri tüsho keochihpung yü.

³¹Kheakü Siria kiulongthsüpuhnü api khoralolungbe wühkenorü 32 ki thiyukhüm jih, “Israel kiulongthsüpuh kheak hode anini yungsho ato bede dükeochih.”

³²Küyimki khora-lolungbe wühkenorübonü Jehoshaphat ngükhea, arünü tha, “Ha tsükjide Israel kiulongthsüpuh ah.” Jumonü arünü api bede keochihpü rholo; tüsho Jehoshaphatnü zhikhit.

³³Küyimki ju Israel kiulongthsüpuh yung de wühkenorübonü angükhea, arünü api müshamkhi chingnü rholo.

³⁴Tüshe mihtsürü khürünü nihbuh sanglüh hünkih tüsho mümükheahshihde Israel kiulongthsüpuh zülu le treangkhümbe dükeak kipyukjih; jumonü apinü anihbuh khoralolungbe bebuh ki tha, “Mükamloang tüsho I keochihpung chingnü bekhitang, tümüde I yurido.”

³⁵Ju nimung thirithsü ju takde kam, tüsho kiulongthsüpuh ju api khora-lolungbe kheak shuhkih-a atsunglobah arelim api she khiungde Siriarü kilim abinbah zo.

³⁶Judüki ani yüzahshu bonungrü ki thiyukhüm khülang yü, “Mihbüm abannü nihbuh kiuto tüsho nihbuh lomi lim yüloang!”

³⁷Junangde kiulongthsüpuh sheabah, tüsho Samaria ching lubah arü; arünü kiulongthsüpuh Samaria ching kiuyukabah.

³⁸Arünü khora-lolungbe ju Samaria kekhip chingnü müsüh; khihnubonü api thiyih müleakabah, tüsho ATUNGPUHNÜ athakhi yu yande müzammüramrübonü ju ching müsühmüra.

³⁹Kheakü aningkhi Ahab rhimobo, apinü arhimokhi alala, apinü athsükhi thsotorü yam, tüsho apinü athsükhitkhi kiutobo alala, Israel kiulongthsürübo yukhean hüm ching thrüta müla de?

⁴⁰Junangde Ahab ju nihbuh jipürü lung yap; tüsho api tsührü Ahazianü api müthri.

⁴¹Israel kiulongthsüpuh Ahab kam phüyipü ching Asa tsührü Jehoshaphatnü Juda kurungkheak kiulongthsüpü tankih.

⁴²Jehoshaphat kiulongthsüpü tankihchoki kam 35 azorü lakheah, tüsho apinü Jirusalem ching kam mukukheak phüngü kiulongthsü. Abe mung ju Shilhi tsührü Azuba lakheah.

⁴³Apinü abuh Asa limro alala ching tsah; ATUNGPUH miki alungki rhimode, apinü ju chingnü manguh; judüalalashe achang dangpungbo lude mutso, tüsho mihtsürübonü kheaküshe laksah-a kingaün tüsho achang dangpungbo kheak rhümthüneabe jih.

⁴⁴Jehoshaphatnü Israel kiulongthsüpuh kheak she mungtsü thsü.

⁴⁵Kheakü aningkhi Jehoshaphat rhimobo, apinü ahuhkhi wu-sühmüh, tüsho apinü thirithsükhi, Juda kiulongthsürübo yukhean hüm ching thrüta müla de?

⁴⁶Anihbuh abuh Asa nimungbo ching arüngyam ching müzammüramrü athrürübo lomi ching aninga lakhi, apinü yankhitabah.

⁴⁷Judüki Edom ching kiulongthsürü mülade alakheah; arungbuhnü yakzan shuh.

⁴⁸Jehoshaphatnü Ophir ching suna thsungkheak yübe Tarshish sangkungbo thsü; tüshe arü müyü, tümüde sangkungbo Ezion-geber ching thsümünimabah.

⁴⁹Judüki Ahab tsührü Ahazianü Jehoshaphat ki tha, “I yamlarübo nü yamlarü bolung sangkungbo ching yüshang,” tüshe Jehoshaphatnü mümulongde alakheah.

⁵⁰Jehoshaphat nihbuh jipürü lung yap tüsho abuh David kiuto ching kiuyukabah; atsührü Jehoramnü api müthri.

⁵¹Juda kiulongthsüpuh Jehoshaphat kam thürükheak thünepü ching Ahab tsührü Ahazianü Israel ching kiulongthsüpü tankih; apinü Israel kurungkheak kam mahne kiulongthsü.

⁵²Apinü ATUNGPUH miki amülim rhimo, tüsho abuh le abe limro ching, tüsho Israel neak yihbeakshihbuh, Nebat tsührü Jeroboam limro ching tsah.

⁵³Apinü Baal tankih, tüsho api kingaün; abuhnü arhimokhi nangde, apinü ATUNGPUH , Israel Thrünpuh bukakhiukshih.