Read Yimchungru Naga 1 Kiu 4 Bible Online

1 Kiu 4 - Yimchungru Naga bible

1 Kiu 4

¹Kiulongthsüpuh Solomon ju Israel alala kurungkheak kiulongthsürü lakheah,

²tüsho api yo atorübo harü lakheah: Zadok tsührü Azaria ju amükeamrü lakheah;

³Shisha tsührübo Elihoreph tüsho Ahija ane athrütrübo lakheah; Ahilud tsührü Jehoshaphat ju athrütyukrü lakheah;

⁴Jehoiada tsührü Benaia ju bonungrü limthorü lakheah; Zadok tüsho Abiathar ane amükeamrü lakheah;

⁵Nathan tsührü Azaria ju atorübo kumung lakheah; Nathan tsührü Zabud ju amükeamrü tüsho kiulongthsüpuh müyamrü lakheah;

⁶Ahishar a kiulongthsürü-yam abebuh lakheah; Abda tsührü Adoniram ju amüküp rhimo ching abebuh lakheah.

⁷Israel alala kurungkheak Solomon yo atorübo 12 lakheah, arünü kiulongthsüpuh tüsho api yamkhün thsungkheak tsühyungbe jih; mihbüm abannü kam ching khinu khülang thsungkheak jih.

⁸Arü mungbo harü lakheah: Benhur, Ephraim awung lomi ching;

⁹Bendeker, Makaz, Shaalbim, Beth-shemesh, tüsho Elon Bethhanan ching;

¹⁰Benhesed, Arubboth ching (api kilim Soko tüsho Hepher lo alala lakheah);

¹¹Benabinadab, Naphath-dor alala ching (api lung Solomon tsührü Taphath, aniube lakheah);

¹²Ahilud tsührü Baana, Taanak, Megiddo, tüsho Jezreel khüp lakhi Zarethan yean Beth-shan alala, tüsho Bethshan chingnü Abelmehola, Jokmeam thripkhüh khiungde;

¹³Bengeber, Ramoth-gilead ching (api yo ju Gilead ching lakhi Manase tsührü Jair kiulongbo tüsho Bashan ching lakhi Argob lomi, chipi ayünkhi tüsho müwayinchi khrihbebo lakhi kiuto 60);

¹⁴Iddo tsührü Ahinadab, Mahanaim ching;

¹⁵Ahimaaz, Naphtali ching (apinü Solomon tsührü Basemath aniube thsüpü lu);

¹⁶Hushai tsührü Baana, Asher tüsho Bealoth ching;

¹⁷Parua tsührü Jehoshaphat, Issakar ching;

¹⁸Ela tsührü Shimei, Benjamin ching;

¹⁹Uri tsührü Geber, Amorrü kiulongthsüpuh Sihon tüsho Bashan kiulongthsüpuh Og lomi, Gilead lo ching; tüsho api ju lang lomi ching kovünor lakheah.

²⁰Juda tüsho Israel ju keto yean loyi nangde hihde alakheah; arünü tsühyung tüsho asüh.

²¹Solomon ju Euphra chingnü Filistia lomi kiulongthsürübo alala kurungkheak, Ijip aredungyean she khiungde wu-sühmüh lakheah; arünü ruk handarü tüsho Solomon rhangdung lakhi amuyung tankih.

²²Nimung khülang ching Solomonnü alupü lakhi ju amokhitkhi ayikangkang khahngak 1500, tüsho jim khahngak 3000,

²³amüdangkhi moshipung 10, tüsho sangrung tsühbe moshi 20, namfimihnu 100, ju lung shihmüchi, shahyih, tuzhuk tüsho amüdangkhi thunu.

²⁴Tümüde apinü aniyüzahlim Euphra kewung alala, Tiphsa chingnü Gaza khiungde kiulongthsürübo alala kurungkheak yakzan shuh; tüsho thrip alala ching apinü mungtsü lakheah.

²⁵Solomon rhangdung lachoki Juda tüsho Israel, Dan chingnü Beersheba she khiungde nihbuh kurungasolu tüsho khubaso dungbo lade kurampung tsüde alakheah.

²⁶Solomon a khoralolungbe yam 40,000, tüsho khoraberü 12,000 lakheah.

²⁷Jurü atorübonü kiulongthsüpuh Solomon tüsho kiulongthsüpuh dükhüm ki arürü alala kilim khinu aban tsühyungbe jih; arü yihnüpü lüpdükhi ngüde alakheah.

²⁸Arünü nihbuh rhimo ayannü khorabo tüsho püpü khorabo thsungkheak barli tüsho hineang yihnüpü lakhi dangpung ching handarü.

²⁹Thrünpuhnü Solomon kilim lümlung khide ato, akheahkhitpü, tüsho keto yean loyi mükhebinkhi nangde anikhitkhi ato jih,

³⁰junangde Solomon lümlungnü aniakhiuklim mihtsürü alala lümlung, tüsho Ijip lümlung alala zhidoabah.

³¹Api ju alala kheaknü lümlung larü lakheah, Ezrarü Ethan tüsho Mahol tsührübo Heman, Kalkol, tüsho Darda kheaknü lümlung la; api mungthukhi mühirü trükshih alala ching bude yü.

³²Apinü müchitmudu 3000 thrüt, tüsho api khünbo 1005 khekhit.

³³Apinü Lebanon ching lakhi cedar kheaknü chipi ching mukhuhkhi monam khiungde sangbo dünkheak thakhuk; apinü shiwühbo, wuhnubo, keakninphuru, tüsho thüngüh dünkheak thakhuk.

³⁴Solomon lümlung anipü thsüde trükshih alala chingnü mihtsürübo arü; api lümlung sobah lomi kiulongthsürübo alala chingnü arü.