Read Yimchungru Naga 2 Kiu 11 Bible Online

2 Kiu 11 - Yimchungru Naga bible

2 Kiu 11

¹Kheakü küyimki Ahazia abe, Athalianü anihbe tsührü shea ngükhea, alibenü kiulongthsü yamkhün alala thsümünimpü thsakham.

²Tüshe kiulongthsüpuh Joram tsührübe tüsho Ahazia achi Jehoshebanü Ahazia tsührü Joash bea lu, tüsho alaksahpü lakhi kiulongthsüpuh tsührü bolungnü jika bebah tso; alibenü api le akümrü yappung khiungshak ching zo. Hanangde alibenü api Athalia kheaknü ram, junangde api mülaksah;

³Athalianü lomi kurungkheak kiulongthsüchoki api alibe lung kam thuruk ATUNGPUH yam ching jika lakheah.

⁴Tüshe kam thünepü ching Jehoiadanü yüshih tüsho chibo kurung wühkenorübo, mih-aheangrü tüsho lim-aheangrübo ATUNGPUH yam ching api ki bebah arü. Apinü arü kheak tangzüng thsü tüsho ATUNGPUH yam ching thiyuchihchimkhi bukkhüp arübo zo; jushu apinü arü ki kiulongthsüpuh tsührü huh.

⁵Apinü arü ki thiyukhüm jih, “Nüsanü arhimopü ju ha: nüsa shihcham mahsam ching bokhüh amuni rhimo ching arürünü kiulongthsüpuh yam aheangbah,

⁶bokhüh Sur ripit ki labah, tüsho bokhüh lim-aheangrü dunglim ripit ki labah. Nüsanü thüyam ju aheangde alabah, jude yungsho athsümünimbah;

⁷tüsho nüsa khunung mahne amunimung rhimo arürünü kiulongthsüpuh thsungkheak ATUNGPUH yam aheangbah.

⁸Tüshe nüsanü athrip abande mihtsürü aban nihbuh khah ching thsühnuk shuhbah kiulongthsüpuh mükamdobah; shepü ju phünide arübanü alaksahbeah. Api arüchoki tüsho ayüchoki kiulongthsüpuh lung laang.”

⁹Wühkenorübonü amükeambuh Jehoiadanü thiyukhüm jihkhi yande alala rhimo; mihbüm abannü amuni rhimo ching yürü bebah amükeambuh Jehoiada kilim arü.

¹⁰Amükeambuhnü David thsühbo tüsho tsungbo ATUNGPUH yam ching lakhi wühkenorübo kilim jih;

¹¹thrip abande kiulongthsüpuh aheangpü, aheangrübonü nihbuh khah ching thsühnuk shuhbah, thüyam tsülimnü huzulim khiungde kingaün sadam tüsho thüyam mühide zhip.

¹²Judüki apinü kiulongthsüpuh tsührü bede akhiukbah api kheak kuthran thranjih, tüsho api kilim tangzüng jih; arünü api kiulongthsüpuh de zhiyuk, tüsho api mujude-mokhit; arünü arü khahbo dam tüsho zhi, “ Kiulongthsüpuh kutsüpde laang!”

¹³Küyimki Athalianü aheangrü tüsho mihtsürü alankhi sokhea, alibenü mihtsürübo kilim ATUNGPUH yam ching yüzah;

¹⁴küyimki alibenü akheahkhea, jipü-yakli yande, kiulongthsüpuh lung wühkenorübo, kiulongthsüpuh rheang ki hulipungpung khungrübo, tüsho mihtsürü alala asühachihde tüsho hulipungpung khungde dungjing ki zhipde ngü. Athalianü anihbe khim thorüp tüsho zhi, “Amülim! Amülim!”

¹⁵Judüki amükeambuh Jehoiadanü bonungrü kurung zokhi wühkenorübo ki thiyukhüm jih, “Alibe ju aheangrü phu dükeak bekhitang, tüsho khürünü anihbe yansho nukshangnü laksahang.” Tümüde amükeambuhnü tha, “Anihbe A TUN GPU H yam chingnü dülaksah.”

¹⁶Jumonü arünü anihbe rambah kiulongthsüpuh yam lim bede yü, tüsho khora ripit kinü alibe laksah.

¹⁷Jehoiadanü ATUNGPUH tüsho kiulongthsüpuh le mihtsürü dükeak tangzüng thsü, junangde arübo ATUNGPUH mihtsürü thsübah; kiulongthsüpuh tüsho mihtsürübo dükeak she thsü.

¹⁸Judüki mihtsürü alala Baal yam ching yü, tüsho ju thokheam; api kingaün sadambo tüsho api sangthsübo arünü adütre kamde yihthünak, tüsho arünü Baal yo amükeambuh Mattan kingaün sadam mikinü laksah. Amükeambuhnü ATUNGPUH yam kurungkheak aheangrübo mokhita zo.

¹⁹Apinü chibo kurung wühkenorübo, mihaheangrü, lim-aheangrü, tüsho lomi mihtsürü alala bea lu; tüsho arünü ATUNGPUH yam chingnü kiulongthsüpuh bede aki, tüsho limaheangrü ripit limronü kiulongthsüpuh yam lim yü; tüsho apinü kiulongthsü-binkiu kheak bin.

²⁰Jumonü lomi mihtsürü alala asühachih; tüsho kiulongthsüpuh yam ching nukshangnü Athalia laksahshu kiuto zhikabah.

²¹Joash kiulongthsüpü tankihchoki api kam 7 azorü lakheah.