Read Yimchungru Naga 2 Kiu 13 Bible Online

2 Kiu 13 - Yimchungru Naga bible

2 Kiu 13

¹Judarü Ahazia tsührü kiulongthsüpuh Joash kam mukukheak mahsampü ching, Jehu tsührü Jehoahaznü Israel kurungkheak Samaria ching kiulongthsüpü tankih; apinü kam thürükheak thüne kiulongthsü.

²Apinü ATUNGPUH miki amütsü rhimo, tüsho Nebat tsührü Jeroboam neakbo yande, apinü Israel neak yihbeakshih; api jurü kheaknü müchamachih.

³Israel kheak ATUNGPUHNÜ bukakhiuk, junangde apinü arübo mutuklode Siria kiulongthsüpuh Hazael khah ching jih, jushu Hazael tsührü Ben-hadad khah ching jih.

⁴Tüshe Jehoahaznü ATUNGPUH ki mushu, tüsho ATUNGPUHNÜ api ki anijih; tümüde Siria kiulongthsüpuhnü Israel junokhi apinü ngü.

⁵Jumonü ATUNGPUHNÜ Israel kilim akhümkhitrü khülang jih, junangde arü Siriarü khah chingnü tsokhit; tüsho akhuhlim nangde Israel mihtsürü nihbuh yambo ching la.

⁶Judüalalashe arünü Jeroboam yamkhün neakbo chingnü müchamachih, küpü apinü Israel neak yihbeakshih, tüshe jurü ching tsah; Ashera sangthsü she Samaria ching aninga lakheah.

⁷Jumonü Jehoahaz lung aningkhi bonungrü ju khoraberü 50, khoralolungbe 10 tüsho jingnü atsahrü mihtsürü 10,000 lang alakheah; tümüde Siria kiulongthsüpuhnü arübo thsümünim tüsho arübo hinitpung ching asungthulung nangde kamshih.

⁸Kheakü Jehoahaz rhimobo aningkhi tüsho apinü arhimokhi alala, api wu-sühmüh bede, Israel kiulongthsürü yukhean hüm ching thrüta müla de?

⁹Junangde Jehoahaz nihbuh jipürü lung yap, tüsho arünü api Samaria ching kiuyukabah; jushu atsührü Jehoashnü api müthri.

¹⁰Juda kiulongthsüpuh Joash kam samrükheak thünepü ching, Jehoahaz tsührü Jehoashnü Israel kurungkheak Samaria ching kiulongthsüpü tankih; apinü kam thürükheak thuruk kiulongthsü.

¹¹Apinü she ATUNGPUH miki amütsü rhimo; apinü Israel neak yihbeakshihkhi Nebat tsührü Jeroboam neakbo alala chingnü müchamachih, tüshe apinü jurü ching tsah.

¹²Kheakü Jehoashnü arhimokhibo aningkhi, tüsho apinü arhimokhi alala, Juda kiulongthsüpuh Amazia kheak keochihkhi wu-sühmühbo Israel kiulongthsürübo yukhean hüm ching thrüta müla de?

¹³Junangde Jehoash nihbuh jipürü lung yap, tüsho Jeroboamnü api kiulongthsübinkiu kheak bin; Jehoash ju Israel kiulongthsürü bolung Samaria ching kiuyukabah.

¹⁴Kheakü küyimki Elisha ashepü thsüde ayapkhea, Israel kiulongthsüpuhnü api kilim tripde zhi, “Abuh, Abuh! Israel khora-lolungbebo tüsho khoraberübo!”

¹⁵Elishanü api ki tha, “Sanglüh khülang tüsho hühzobo luang”; jumonü apinü sanglüh tüsho hühzobo lu.

¹⁶Judüki apinü Israel kiulongthsüpuh ki tha, “Sanglüh hünkihang”; tüsho apinü hünkih. Elishanü api khah ju kiulongthsüpuh khah kheak nim.

¹⁷Jushu apinü tha, “Aniakhiuklim ayinripit khimshuhang”; tüsho apinü ju khimshuh. Elishanü tha, “ Kipang”; tüsho apinü kip. Judüki apinü tha, “Akukpü ATUNGPUH yo hühzo, Siria kurungkheak kukpü hühzo! Tümüde nünü arü mükheamshihyi khiungde Aphek ching Siriarü kheak keochihbah.”

¹⁸Apinü mutuklode tha, “Hühzobo luang”; tüsho apinü jurübo lu. Apinü Israel kiulongthsüpuh ki tha, “Jurübonü alo kheak rhapang”; apinü mahsam ki rhap tüsho tukloabah.

¹⁹Judüki Thrünpuh mihtsürünü api kheak bukakhiuk tüsho tha, “Nünü phüngü yungsho thuruk ki rhappü lado; junangde nünü Siriarü mükheamkhamyi khiungde alaksahpü lado, tüshe kheaküa nünü Siriarü kheak mahsam ki lang akukbah.”

²⁰Junangde Elisha sheabah, tüsho arünü api kiuyukabah. Kheakü Moabrü khunungnü kam aban mükheankim ching lomi ching azahde la.

²¹Mihtsürü ju kiuyuka bahde alachoki, thiriri khunung khülang ngü tüsho ashemi ju Elisha kiuyuk ching jipa bah; pang junü Elisha robo kheak qiu akede, api arhang kamlode asürü tüsho ajingnü zhip.

²²Kheakü Siria kiulongthsüpuh Hazaelnü Jehoahaz nimungbo alala ching Israel juno.

²³Tüshe ATUNGPUHNÜ arü ki müthsüm tüsho muzho; Abraham, Isak tüsho Jakob thsülimnü apinü arü kilim rholo, tüsho arü müdükheakshih; yungsho api mikinü khihni khiungde arü yana mübah.

²⁴Küyimki Siria kiulongthsüpuh Hazael shekhea, api tsührü Ben-hadadnü api müthri.

²⁵Jushu thirithsü ching, abuh Jehoahaz kheaknü alukhi kiutobo Jehoahaz tsührü Jehoashnü Hazael tsührü Ben-hadad kheaknü lulo. Jehoashnü mahsam ki api kuk tüsho Israel kiutobo lulo.