Read Yimchungru Naga 2 Kiu 16 Bible Online

2 Kiu 16 - Yimchungru Naga bible

2 Kiu 16

¹Remalia tsührü Peka kam thürükheak thünepü ching Judarü Jotham tsührü kiulongthsüpuh Ahaznü kiulongthsüpü tankih.

²Ahaz kiulongthsüpü tankihchoki api kam 20 azorü lakheah; apinü Jirusalem ching kam thürükheak thuruk kiulongthsü. Api Jipürü Davidnü arhimokhi nangde apinü nihbuh Thrünpuh ATUNGPUH miki alungki mürhimo,

³tüshe apinü Israel kiulongthsürübo limro ching tsah. ATUNGPUHNÜ Israel müngühnü yankhita bahkhi trükshihnü athraneanbe rhimokhibo yande apinü atsührü athrürü she monü taka kingaün.

⁴Apinü achang dangpungbo, awungbo kheak, tüsho sangdung aphüyak aban khüp laksah-a kingaün tüsho rhümthüneabe tak.

⁵Judüki Siria kiulongthsüpuh Rezin tüsho Israelrü Remalia tsührü kiulongthsüpuh Pekanü Jirusalem kheak thirithsüpü atu; arünü Ahaz yan tüshe api mukuk.

⁶Ju kim ching Siria kiulongthsüpuh Rezinnü Judarü yankhita bahbah Siriarü thsungkheak Elath lulo. Jushu Edomrünü Elath ching yü tüsho ju ching khihni khiungde lah.

⁷Ahaznü Asiria kiulongthsüpuh Tiglath-pileser ki yunithsürübo yüshihde tha, “I nü yamlarü tüsho nü tsührü. Atung, tüsho I yanrü Siria kiulongthsüpuh tüsho Israel kiulongthsüpuh khah chingnü khümkhitang.”

⁸Ahaznü ATUNGPUH yam le kiulongthsüpuh rahpung-yam ching lakhi shotoyinchi tüsho suna she lu, tüsho Asiria kiulongthsüpuh kilim thsambah khülang mühah.

⁹Asiria kiulongthsüpuhnü api ki ani; Asiria kiulongthsüpuhnü Damaska azhihde wutu tüsho ju lubah mihtsürübo Kir ching rama lubah yü; jushu apinü Rezin laksah.

¹⁰Küyimki kiulongthsüpuh Ahaznü Tiglath-pileser shorupü Damaska ching yükhea, apinü Damaska ching lakhi kingaün sadam ngü. Kiulongthsüpuh Ahaznü kingaün sadam jakruk kikiukbah athsüpü lümkhi adüngakhinü amükeambuh Uria kilim jih-a yüshih.

¹¹Amükeambuh Urianü kingaün sadam thsü; junangde amükeambuh Urianü kingaün sadam ju ruk thsü tüsho Damaska chingnü Ahaz malodarüyide thsükham.

¹²Küyimki kiulongthsüpuh Damaska chingnü alungkhea, apinü kingaün sadam ju kheah. Jushu kiulongthsüpuhnü kingaün sadam ki phünide yübah ju kheak yükih,

¹³tüsho apinü taka kingaün tüsho hi kingaün tak, tüsho kingaün sadam kheak ayungbe kingaün dungkih, tüsho api mungtsü kingaün thiyih rhakkih.

¹⁴ATUNGPUH miki lakhi müwayinchi kingaün sadam ju kingaün sadam aso le ATUNGPUH yam dükeak, thüyam kinü yihkhita lu, tüsho ju anihbuh kingaün sadam dukulim zo.

¹⁵Kiulongthsüpuh Ahaznü amükeambuh Uria ki thiyukhüm jihde tha, “ Kingaün sadam ato kheak yapsu taka kingaünkhi, arelim hi kingaün, kiulongthsüpuh yo taka kingaünkhi, tüsho api hi kingaün, ju lung lomi mihtsürübo yo taka kingaünkhi, arü hi kingaün, tüsho arü ayungbe kingaün jihang; jushu taka kingaünkhi thiyih, tüsho laksah-a kingaün thiyih alala ju mükamde rhakkihang; tüshe müwayinchi kingaün sadam a I thsungkheaknü keokhikeorabe thsübah.”

¹⁶Amükeambuh Urianü kiulongthsüpuh Ahaznü thiyukhüm jihkhi nangde lüpdükhi rhimo.

¹⁷Judüki kiulongthsüpuh Ahaznü arüngyam ching ahorikhi lolungbe nimmuwuh-a zo, tüsho ju kheaknü müsühmüra-phuru luakhin; apinü müwayinchi moshipung khüp lakhi kekungbo yihkhit, tüsho ju lung kheangkhi kheak zo.

¹⁸Kheaküshe Asiria kiulongthsüpuh thsungkheak, apinü amüsüh sadam arüngyam ching thsükhi yihkhit, tüsho apinü alungbe kiulongthsüpuh yüzah limro ATUNGPUH yam chingnü yihkhit.

¹⁹Kheakü aningkhi Ahaznü arhimokhibo, Juda kiulongthsürübo yukhean hüm ching thrüta müla de?

²⁰Ahaz nihbuh jipürü lung yap, tüsho api jipürü lung David kiuto ching kiuyukabah; api tsührü Hezekianü api müthri.