Read Yimchungru Naga 2 Kiu 18 Bible Online

2 Kiu 18 - Yimchungru Naga bible

2 Kiu 18

¹Israelrü Ela tsührü Hoshea kiulongthsü kam asampü ching Juda kiulongthsüpuh Ahaz tsührü Hezekianü kiulongthsüpü tankih.

²Api kiulongthsüpü tankihchoki anihbuh kam 25 azorü lakheah; apinü Jirusalem ching kam mukukheak tuku kiulongthsü. Abe mung ju Zekaria tsührü Abi lakheah.

³Api jipürü Davidnü arhimokhi nangde apinü ATUNGPUH miki alungki rhimo.

⁴Apinü achang dangpung lukde dungjingbo lukkheam, tüsho Ashera sangthsü kiukheam. Apinü Mosanü athsükhi müwayinchi phuruto adütre kamde yihnak, tümüde ju nimungbo khiungde Israel mihtsürübonü ju ki kingaünde alakheah; ju Nehushtan de ajikheah.

⁵Apinü ATUNGPUH Israel Thrünpuh kheak akin la; junangde api dunglim yungsho api müngüh, Juda kiulongthsürü alala bolung sheshe api nangde mülakheah.

⁶Tümüde apinü ATUNGPUH ki thiyuronü la; apinü api yankhi chingnü müchamachih tüshe ATUNGPUHNÜ Mosa ki thiyukhüm jihkhibo ani.

⁷ATUNGPUH api lung lakheah; api yüpung alala ching akuk ngü. Apinü Asiria kiulongthsüpuh azhih tüsho api mütankih.

⁸Apinü Filistiarü Gaza tüsho ju lomibo, aheangsadam kinü chipi ayünkhi kiuto khiungde yan.

⁹Kiulongthsüpuh Hezekia kam phüyipü ching, küpü Israelrü Ela tsührü kiulongthsüpuh Hoshea kam thünepü lakhea, Asiria kiulongthsüpuh Shalmanesernü Samaria azhihde atubah ju yan,

¹⁰tüsho kam mahsampü akheam lim ju lu. Hezekia kam thurukpü tüsho Israel kiulongthsüpuh Hoshea kam tuku lachoki Samaria luabah.

¹¹Asiria kiulongthsüpuhnü Israelrü bede yünü Hala ching, Habor kheak, Gozan ayungbo, tüsho Midia kiutobo ching lashih,

¹²tümütüsho arünü ATUNGPUH arü Thrünpuh düsheak mani tüshe ATUNGPUH yamlarü Mosanü ajihkhi yukhüm alala — api tangzüngkhi thsümünim; arünü mani yungsho mürhimo.

¹³Kiulongthsüpuh Hezekia kam thürükheak phüyipü ching, Asiria kiulongthsüpuh Sennakeribnü chipi thsükhi Juda kiutobo alala azhihde atu tüsho yanabah.

¹⁴Juda kiulongthsüpuh Hezekianü Asiria kiulongthsüpuh kilim Lakish ching thaa yüshih, “Inü amülim rhimodo; I kheaknü tukloang; nünü tümüpürü I ki kheangbanü inü ajihbah.” Asiria kiulongthsüpuhnü Juda kiulongthsüpuh Hezekia ki shotoyinchi khahngak 10,000 tüsho suna khahngak 1000 kheang.

¹⁵Hezekianü ATUNGPUH yam tüsho kiulongthsüpuh rahpungyam ching lakhi shotoyinchi alala api kilim jih.

¹⁶Ju kim ching Hezekianü anihbuhnü ATUNGPUH arüngyam khimdopübo tüsho khimdopü dungjingbo kheak lüpkihkhi sunabo chakkhia Asiria kiulongthsüpuh kilim jih.

¹⁷Asiria kiulongthsüpuhnü bonungrü ahihdo lung Tartan, Rabsari tüsho Rabshake Lakish chingnü Jirusalem ching kiulongthsüpuh Hezekia kilim yüshih. Arünü wutu tüsho Jirusalem ching arü. Küyimki arü khiungkhea, Müsühmürarü Thulu limro ching achangbe kekhip keru ching zhip.

¹⁸Küyimki arünü kiulongthsüpuh jikhea, ju ching kiulongthsüpuh yam neakrü, Hilkia tsührü Eliakim, athrütbuh Shelma, tüsho athrütyukrü Asaph tsührü Joa akhiuk.

¹⁹Limthobuhnü tha, “Hezekia ki thaang: Ha Asiria kiulongthsüpuh ato kiulongthsüpuhnü thachoh: tümü kheak düthsün angüde nünü mulonglamcho?

²⁰Yancho yubo ju thirithsü thsungkheak lümkhi tüsho sühmüh de nünü lümcho de? Nü kheakü she kheak düthsün angübah I azhihkhea?

²¹Kheahang, kheakü nü Ijip kheak düthsün angüchoh, ju rhim tso zhakkhi kheak, shepünü angükihchonü khah düchipashungbah. Api kheak düthsün angürü alala ki Ijip kiulongthsüpuh Pharao ha ruk ah.

²²Tüshe nünü I ki, ‘Isanü ATUNGPUH isa Thrünpuh kheak düthsün angübah,’ de thacho ju Hezekianü achang dangpungbo luka bahde Juda tüsho Jirusalem ki, ‘Nüsanü Jirusalem ching ha kingaün sadam miki kingaünbeah’ de athakhi thsü yung de?

²³Kheakü arang, I tungpuh Asiria kiulongthsüpuh ki shozüng thiyuchihchimang: Nünü aberü mihtsürü ngükhuksho, inü khora 2000 nü kilim jihbah.

²⁴Nünü khora-lolungbe tüsho khoraberü thsungkheak Ijip kheak düthsün angüngü she küde thsah nünü I putungpuh torü bolung aninibe she amopü?

²⁵Kheaküshe, inü ATUNGPUH mübede ha dangpung azhihde atubah ju thsümünimkhea de? ATUNGPUHNÜ I ki tha, Ha lomi azhihde wutuang tüsho ju thsümünimang.”

²⁶Judüki Hilkia tsührü Eliakim, Shebna, tüsho Joanü limthobuh ki tha, “Muzhobah nü yamlarübo ki Aramik yu chingnü thaang, tümüde isanü ju anikhitlah; chipi ching larü mihtsürünü sode isa ki Juda yu chingnü dütha.”

²⁷Tüshe limthobuhnü arü ki tha, “I putungrünü harü yu nüsa putungrü tüsho nüsa ki thapü I arüshihkhea de, tüsho chipi kheak binrü nüsa lung nihbuh khih tsühpü tüsho nihbuh phüyanke yungpü larü ki yung de?”

²⁸Judüki limthobuhnü zhip tüsho Ibri yutha chingnü achangnü zhikhit, “Asiria kiulongthsüpuh, ato kiulongthsüpuh yu aniang!

²⁹Kiulongthsüpuhnü ha thachoh: ‘ Hezekianü nüsa rük dakishih, tümüde apinü nüsa I khah chingnü mübekhitkhuk.

³⁰Hezekianü ha thade, ATUNGPUH kheak düthsün dangüshih, Tsükjide ATUNGPUHNÜ isa bekhitbah, tüsho ha kiuto Asiria kiulongthsüpuh khah ching müjih.’

³¹Hezekia ki dani; tümüde Asiria kiulongthsüpuhnü ha thachoh: ‘Nüsanü I kheak mungtsüang tüsho I kilim akhiukang; jushu nüsa mihbüm abannü nüsa nihbuh kurungaso tüsho khubasodung chingnü atsühbah, tüsho nüsa nihbuh kekhip chingnü ayungbah,

³²I arübahle nüsa nihbuh lomi nangde alakhi, hi tüsho yukhu lomi, yikhap tüsho kurungasolu lomi, oliv müdangke tüsho mukhuke lomi ching bebah müyüyi khiungde, junangde nüsa labah tüsho müshe. Hezekianü nüsa bemüchihde ha thakhi dani, “ATUNGPUHNÜ isa bekhitbah.”

³³Trükshih thrünpuh khürünü Asiria kiulongthsüpuh khah chingnü lomi bekhitdü de?

³⁴Hamath tüsho Arpad thrünpuhbo küching la? Sepharvaim, Hena, tüsho Ivva thrünpuhbo küching la? Arünü Samaria I khah chingnü bekhitkhea de?

³⁵ATUNGPUHNÜ Jirusalem I khah chingnü bekhitpü thsüde, lomi alala thrünpuh bolung arü lomi I khah chingnü abekhitkhi ju she a?’ ”

³⁶Tüshe mihtsürübonü malan tüsho api ki thiyu khülang she malo, tümüde kiulongthsüpuh yukhüm ju, “Api ki dalo.”

³⁷Judüki Hilkia tsührü Eliakim, shepü kiulongthsüpuh yam neakde alakhea, athrütbuh Shebna, tüsho Asaph tsührü athrütyukrü Joanü arü khim thorüpbah kiulongthsüpuh ki arü tüsho limthobuh yubo api ki thaa huh.