Read Yimchungru Naga 2 Kiu 24 Bible Online

2 Kiu 24 - Yimchungru Naga bible

2 Kiu 24

¹Api nimungbo ching Nebukednezar Babilon kiulongthsüpuh atu; Jehoiakim kam mahsam api yamlarü kamabah; apinü rholo tüsho api azhih.

²ATUNGPUHNÜ api azhihde Kaldea, Siria, Moab, tüsho Amon bonungrübo yüshih; apinü ayamlarü wukihrübo hode asukkhi ATUNGPUH yu yande Juda azhihde dükheakshihpü arübo yüshih.

³Manasenü ayihbeakkhi neakbo alala dünkheaknü api mikinü yihkhita bahpü, tsükjide ha ATUNGPUH yukhüm hode Juda kheak arü,

⁴tüsho apinü neak mükihrü thiyih bukshihkhi dünkheak she ah; tümüde apinü neak mükihrü thiyihnü Jirusalem mishih, tüsho ATUNGPUHNÜ neak bahjihpü mümulongde alakheah.

⁵Kheakü aningkhi Jehoiakim rhimobo, tüsho apinü arhimokhi alala, Juda kiulongthsürübo yukhean hüm ching thrüta müla de?

⁶Jumonü Jehoiakim nihbuh jipürü lung yap; jushu atsührü Jehoiakinnü api müthri.

⁷Ijip kiulongthsüpuhnü api lomi chingnü makhiuklo, tümüde Babilon kiulongthsüpuhnü Ijip kiulongthsüpuh yo alala Ijip ayung chingnü Euphra ayung khiungde luabah.

⁸Jehoiakin kiulongthsüpü tankihchoki api kam 18 azorü lakheah; apinü Jirusalem ching khinu mahsam kiulongthsü. Abe mung ju Jirusalemrü Elnathan tsührü Nehushta lakheah.

⁹Abuhnü arhimokhi nangde apinü ATUNGPUH miki amütsü rhimo.

¹⁰Ju kim ching Nebukednezar Babilon kiulongthsüpuh yamlarübo Jirusalem ching atu, tüsho kiuto yanabah.

¹¹Api yamlarübonü kiuto yande alachoki, Nebukednezar Babilon kiulongthsüpuh kiuto ching arü;

¹²Jehoiakin Juda kiulongthsüpuhnü anihbuh abe, api yamlarübo, atorübo, api yam ching atorübo Babilon kiulongthsüpuh kilim jihabah. Babilon kiulongthsüpuhnü anihbuh kiulongthsü kam tizheahpü ching Jehoiakin rama lubah tso.

¹³Apinü ATUNGPUH yam rahpung, tüsho kiulongthsüpuh yam rahpungbo alala hanbah tso; ha alala ATUNGPUHNÜ müchitkhi nangde, apinü Israel kiulongthsüpuh Solomonnü athsükhi suna kukrukbo alala ATUNGPUH arüngyam ching lakhi adütre kamde kingthünak.

¹⁴Apinü Jirusalemrü alala, atorü alala, thirithsürü alala, aramrü 10,000, sang kizükidorü alala tüsho yingkingrü lubah tso, lomi ching zhochih traktrak mihtsürü kheak hode she maning.

¹⁵Apinü Jehoiakin, kiulongthsüpuh abe, aniube, atorübo, tüsho lomi ching adungtobo Jirusalem chingnü rama lubah Babilon ching yü.

¹⁶Babilon kiulongthsüpuhnü athrungrü mihtsürü alala 7000, kizükidorü tüsho yingkingrü 1000, arü alala sühmüh larü tüsho thirithsüpü ching athülünkhibo rama lubah Babilon lim arü.

¹⁷Babilon kiulongthsüpuhnü api müthri, Jehoiakin akü Mattania kiulongthsürü kamshih, tüsho api mung Zedekia de müthrijih.

¹⁸Zedekia kiulongthsüpü tankihchoki api kam 21 azorü lakheah; apinü Jirusalem ching kam thürükheak khülang kiulongthsü. Abe mung ju Libnarü Jeremia tsührü Hamutal lakheah.

¹⁹Jehoiakimnü arhimokhi nangde apinü ATUNGPUH miki amütsü rhimo.

²⁰Dükde, Jirusalem tüsho Juda kheak ATUNGPUHNÜ khide bukakhiuk, junangde apinü arübo amikinü yana tsoshih. Jushu Zedekianü Babilon kiulongthsüpuh kheak azhihde wusu.