Read Yimchungru Naga 2 Kiu 5 Bible Online

2 Kiu 5 - Yimchungru Naga bible

2 Kiu 5

¹Siria kiulongthsüpuh bonungrü wühkenobuh, Naaman ju mungthu mihtsürü tüsho anihbuh putungrünü wüntre jihkhi lakheah, tümütüsho api hode ATUNGPUHNÜ Siria kilim akuk ngüshih. Api athrungrü amüzhak mihtsürü thsüa lalashe, aphamrü lakheah.

²Kheakü Siriarünü arü thirithsükhi khipkhüh ching Israel lomi chingnü aliberü anünürü khülang rama lu, tüsho alibenü Naaman niube tankih.

³Alibenü anihbe putungbe ki tha, “I tungpuhnü lang Samaria ching lakhi wukihrü kilim yükhülaa! Apinü nihbuh apham thsüngubah.”

⁴Jumonü Naamannü yüzah tüsho Israel lomi chingnü arükhi alibenü athakhi api tungpuh ki tha.

⁵Tüsho Siria kiulongthsüpuhnü tha, “Dale yüang, tüsho inü Israel kiulongthsüpuh kilim kihüm bede ayüshihbah.” Jumonü apinü shotoyinchi 3000, suna 6000, tüsho khimmih mihbüm 10 lubah yü.

⁶Apinü Israel kiulongthsüpuh ki lude ayükhi kihüm khekhi ju, “ Küyimki ha kihüm nü khiungbanü, I yamlarü Naaman nü kilim inü arüshihkheah de mükheahang, junangde nünü api apham thsüngujang.”

⁷Küyimki Israel kiulongthsüpuhnü kihüm khekhea, apinü anihbuh khim thorüp tüsho tha, “Asheshihpü yungsho rhangdung lashihpü thsüde I Thrünpuh ah de, ha buh mihtsürünü api mihtsürü apham thsüngushihpü I kilim thiyu arüshihcho de? Kheakü künangde apinü I kheak rukachihpü thsüchonü kheahang.”

⁸Tüshe küyimki Israel kiulongthsüpuhnü akhim thorüpkhi Thrünpuh mihtsürü Elishanü asokhea, apinü kiulongthsüpuh kilim thiyusheak yüshih, “Tümüde nünü nü khim thorüpkhea? Api I kilim arüshang, junangde Israel ching wukihrü khülang lah de apinü amükheahbah.”

⁹Jumonü Naamannü api khorabo tüsho khora-lolungbebo lubah arü, tüsho Elisha yam ripit ki tukloa zhip.

¹⁰Elishanü api kilim yunithsürü yüshihde tha, “Yüang, Jordan ching thüne ki müsühang, tüsho nü shihtsü thsüngubah tüsho müsühde akambah.”

¹¹Tüshe Naamannü abukakhiukde tsoabahde tha, “Tsükjide I thsungkheaknü api akhiukbah zhipbahle ATUNGPUH api Thrünpuh mung ching jide, tüsho api khahnü mü kheak muzhude apham thsüngubah de inü alümkheah!

¹²Damaska ayungbo, Abana tüsho Pharpar Israel kebo alala kheaknü atsübe yung de? Inü jurü ching müsühbah müsühde mükamkhukbea de?” Apinü rholobah abukakhiukde tso.

¹³Tüshe api yamlarübonü yübah api ki tha, “Abuh, mürangkhüh wukihbuhnü tümükhüh achak rhimopü nü ki thiyukhüm jihkhülaa, nünü ju mürhimoa laba de? Dale tüsho küdükhüh, apinü nü ki thakhi ju a, ‘ Müsühang, tüsho müsühde kamang?’”

¹⁴Jumonü apinü yüki tüsho Thrünpuh mihtsürü yu yande Jordan ching thüne ki yüzah; azürü nunu shihtsü nangde api shihtsü thsüngu tüsho api müsühde kam.

¹⁵Judüki api le api borü alala Thrünpuh mihtsürü kilim alode arü; apinü arübah amiki zhip tüsho tha, “ Kheakü Israel kheak hode alomi alala ching Thrünpuh müla de inü mükheahlah; muzhobah nü yamlarü kilimnü thsambah khülang leangkhijang.”

¹⁶Tüshe apinü tha, “Inü tankihkhi ATUNGPUH lale, inü tümü she müleangkhi!” Apinü aleangkhishihpü thsungkih, tüshe anihbuhnü thsunglo.

¹⁷Judüki Naamannü tha, “Jude yungsho, muzhobah alo khoranunu hah 2 nü yamlarü kilim jihang; tümüde nü yamlarünü küyimkishe taka kingaünkhi yungsho laksah-a kingaünkhi ATUNGPUH hode püpürü thrünpuh kilim müjih.

¹⁸Tüshe khülang dünkheaknü nü yamlarü ki ATUNGPUHNÜ neak bahshang: küyimki I putungrü kingaünpü I bin kheak angükihbah Rimmon yam ching yüzahba, tüsho I Rimmon yam ching khukningbanü, ha dünkheak ATUNGPUHNÜ nü yamlarü ki neak bahshang.”

¹⁹Apinü anihbuh ki tha, “Mungtsü chingnü yüang.” Tüshe küyimki api kinü Naaman anükhüh shude yüde alakhea,

²⁰Thrünpuh mihtsürü Elisha yamlabuh, Gehazinü lüm, “Siriarü Naamannü ajihkhi müleangkhide I putungpuhnü khide thülihde tsoshihdo. ATUNGPUH lale, inü api dunglim alihbah tüsho api kilimnü tümükhüh ngübah.”

²¹Jumonü Gehazinü Naaman dunglim yü. Küyimki Naamannü khürü api dunglim müshamkhi ngükhea, apinü anihbuh shorupü khora-lolungbe kheaknü jukkhi tüsho tha, “Alala dükde la shi?”

²²Apinü alo, “Am, tüshe I putungrünü athapü I arüshih, ‘Wukihrü boto chingnü 2 Ephraim awung lomi chingnü kheakü arüa lah; muzhobah ane kilim shotoyinchi 3000 tüsho khim mihbüm 2 jihang.’”

²³Naamannü tha, “Muzhobah shotoyinchi 6000 luang.” Apinü anihbuh kheak thsungkih, tüsho shotoyinchi 6000 tüsho khim mihbüm 2 rhüka qiuqiubo ching yukjih, tüsho api yamlarü 2 kilim jih-a Gehazi müngüh hanbah yüshih.

²⁴Küyimki api awung ching arükhea, apinü ane kheaknü qiuqiubo lu tüsho alunglim zoabah; apinü mihtsürü büne thiyia tsoshih.

²⁵Apinü yüzah tüsho api putungrü miki zhip; tüsho Elishanü api ki tha, “Gehazi, nü küching yükhea?” Apinü alo, “ Küdüküdü she nü yamlarü küching she müyü.”

²⁶Tüshe apinü anihbuh ki tha, “ Khürünü nü shorupü nihbuh khora-lolungbe kheaknü ajukkhichoki me ching I nü lung müyükhea de? Sho tüsho khimmih, oliv lu, tüsho kurungasolu, namfimihnu tüsho moshipung, tüsho athrürü le aliberü azhorübo leangkhipü ha kima de?

²⁷Jumonü Naaman apham ju nü tüsho nü tsühsoniuso kheak lünnü ayükihbah.” Jumonü anihbuh kheak phürüm nangde müyedo apham akhiukbah api mikinü tso.