Read Yimchungru Naga 2 Kiu 7 Bible Online

2 Kiu 7 - Yimchungru Naga bible

2 Kiu 7

¹Tüshe Elishanü tha, “ATUNGPUH yu aniang: ATUNGPUHNÜ ha thachoh, shido ha kim ching wheat hi atsüdak khahngak 3 yungsho barli khahngak 6 shotoyinchi 1 mo Samaria chipiripit kinü ayinbah.”

²Judüki kiulongthsüpuh miki arüde alakhi wühkenobuhnü Thrünpuh mihtsürü ki tha, “ATUNGPUHNÜ yinmi ching ayinripit thsüthsü she, hadürü dünjikhukba de?” Tüshe apinü tha, “Nünü ju nü müknü angübah, tüshe nünü jurü mütsüh.”

³Kheakü apham kihrü mihtsürü 4 kiuto chipi ripit aleanglim lakheah, arü khülangnü khülang ki tha, “Tümüde isa ashe khiungde ha kheak binpü?

⁴Mürangkhüh isanü, kiuto ching yüzahanü de thasho, kiuto ching khümzung lah, tüsho isa ju ching shebah; tüshe isa ha kheak binsho she isa ashebah. Jumonü, isanü Siriarü binkheampung ching yüanü; arünü isa rhangdung aningshihsho, isa rhangdung labah; tüsho arünü isa laksahsho, isa ashebah.”

⁵Jumonü arünü Siriarü binkheampung ching yüpü shuhyini ching tsahmusu; tüshe küyimki arü Siriarü binkheampung münkheam kheak arükhea, ju ching sheshe mülade alakheah.

⁶Tümüde ATUNGPUHNÜ Siria bonungrü ki khora-lolungbe, khorabo, tüsho bonungrü amuliuh düsheak soshih, junangde arünü khülangnü khülang ki tha, “Israel kiulongthsüpuhnü isa bede thirithsüpü Hit kiulongthsürübo tüsho Ijip kiulongthsürübo muloa lah.”

⁷Jumonü arünü shuhyini chingnü tsoabah tüsho arü khimyambo, khorabo, tüsho arü donkibo le binkheampung ju ruk lang zojihbah arü rhangdung thsungkheak tsoabah.

⁸Küyimki harü apham kihrü mihtsürübonü binkheampung münkheam ki arükhea, arünü khimyam ching yüzahbah tsühyung, shotoyinchi, suna tüsho khimmih hana lu tüsho yübah jurü rama zo. Jushu arü alode arübah khimyam püpü ching yüzah, ju chingnü she kukruk hana lu, tüsho yübah jurü rama zo.

⁹Judüki arünü khülangnü khülang ki tha, “Isanü tümü rhimochonü amülim ah. Ha thiyusheak atsü nimung khülang ah; isanü düsheak makhiuksho tüsho yapsu ayin khiungde aleangsho, isa kheak thsümütsü arübah; jumonü isanü yüanü tüsho kiulongthsüpuh yamkhün ki thaanü.”

¹⁰Jumonü arünü arü tüsho kiuto ripit aheangrübo ki jibah arü ki tha, “Isa Siriarü binkheampung ching yükheah, tüshe ju ching sheshe müla yungsho muso, tümü müla tüshe khorabo, donkibo chinga zolah, tüsho khimyambo lang ju ruk lah.”

¹¹Judüki ripit aheangrübonü ji tüsho kiulongthsüpuh yamkhün ki zhiyukjih.

¹²Kiulongthsüpuhnü azhing ching asürü, tüsho api yamlarübo ki tha, “Siriarünü isa azhihde tümü tsanglungchonü inü nüsa ki thaanü. Isa khümlah de arünü mükheahlah; jumonü arünü ha lümde mükeak ching jikpü binkheampung chingnü tsodo, ‘ Küyimki arü kiuto chingnü akhiukbanü, isanü arü arhangnü alubah tüsho kiuto ching yüzahbah.’ ”

¹³Api yamlarübo lung khülangnü tha, “Mihtsürü khürünü khorabo aningkhi 5 lushang, tümütüsho arübo ha ching lakhi Israel boto nangde akambah; yungsho, inü athapü ju, arübo sheabahkhi Israel boto nangde akambah; junangde isanü arü yüshihanü tüsho tümü dünjia lanü yimkhitshihanü.”

¹⁴Jumonü arünü khora-lolungbe, khora bede 2 mokhit, tüsho kiulongthsüpuhnü arübo Siria bonungrü dunglim yüshih. Apinü aberübo ki tha, “Yüang tüsho yimkhitang.”

¹⁵Jumonü arünü arü dunglim Jordan khiungde yü; Siriarünü niokheamchoki bahkhi khimmih tüsho thsühnukbo limro ching hiumüzüta lakhi arünü ngü. Jumonü yunithsürübonü alode arübah kiulongthsüpuh ki tha.

¹⁶Judüki mihtsürübonü wukhiuk, tüsho Siriarü binkheampung yankhia lu. Junangde ATUNGPUH yu yande wheat hi atsüdak khahngak 3 yungsho barli khahngak 6 shotoyinchi 1 mo yin.

¹⁷Kheakü kiulongthsüpuhnü api miki arüde alakhi wühkenobuh ju chipiripit aheangpü yüzahshih; kiulongthsüpuh ju Thrünpuh mihtsürü ki akichoki apinü anihbuh ki thakhi nangde mihtsürübonü wühkenobuh ju ripit ching thrüma sheshih.

¹⁸Tümüde küyimki Thrünpuh mihtsürünü kiulongthsüpuh ki thakhea, “Shido ha kim ching wheat hi atsüdak khahngak 3 yungsho barli khahngak 6 shotoyinchi 1 mo Samaria chipiripit ki yinbah,”

¹⁹wühkenobuhnü Thrünpuh mihtsürü ki tha, “ATUNGPUHNÜ thüning ching ayinripit thsüthsü she, hadürü dünjiba de?” Tüsho apinü alo, “Nünü ju nü mükbonü angübah, tüshe nünü jurü mütsüh.”

²⁰Athakhi nangde ju api kheak dünji; mihtsürübonü api ripit kinü thrüma sheshih.