Read Yimchungru Naga 1 Kiuthsü 14 Bible Online

1 Kiuthsü 14 - Yimchungru Naga bible

1 Kiuthsü 14

¹Tair kiulongthsüpuh Hiramnü cedar sangthulungbo mühahbah yunithsürübo tüsho lungzünrü le sangrhimosorü David kilim thüyam thsüpü yüshih.

²Judüki ATUNGPUHNÜ api Israel kurungkheak kiulongthsürü kamshih tüsho api mihtsürü Israel dünlimnü api kiulongthsü changde shuhkihdo de Davidnü anikhit.

³Davidnü Jirusalem ching niuberü hihde lu, tüsho David ju tsührübo tüsho tsührübebo ahihdo abuh kam.

⁴Harü ha Jirusalem ching api tsührübo mung: Shammua, Shobab, tüsho Nathan; Solomon,

⁵Ibhar, Elishua, tüsho Elpelet;

⁶Noga, Nepheg, tüsho Japhea;

⁷Elishama, Beeliada, tüsho Eliphelet.

⁸Küyimki Israel alala kurungkheak kiulongthsürü thsüpü David mujude-mokhitkhi Filistiarünü asokhea, Filistiarü alala David yimde wutu; Davidnü ju so tüsho arü azhihde wukhiuk.

⁹Kheakü Filistiarü arü tüsho Rephaim jindükhün ching zukleangnü yan.

¹⁰Davidnü Thrünpuh ki keokhi, “I Filistiarü azhihde wutuba shi? Nünü arübo I khah ching jihba shi?” ATUNGPUHNÜ api ki tha, “Wutuang, tüsho inü arübo nü khah ching jihbah.”

¹¹Jumonü apinü Baal-perazim ching wutu, tüsho ju ching Davidnü arü kuk. Davidnü tha, “Düchi zünkhi nangde Thrünpuhnü I khah hode I riri azhihde zünashung.” Jumonü ju dangpung ki Baal-perazim de jichoh.

¹²Arünü arü thrünpuhbo ju ching bahbah tso, tüsho David yukhüm hode jurübo takabah.

¹³Kheaküshe khülang ki Filistiarünü jindükhün ching zukleangnü thirithsü.

¹⁴Küyimki Davidnü Thrünpuh ki keokhilokhea, Thrünpuhnü api ki tha, “Nü arü dunglim muwutu; mükamde yüang tüsho balsam sangbo kinü arü kheak arang.

¹⁵Küyimki balsam sangbo ku kheak jing khün nünü asobanü, judüki keochihpü wukhiukang; tümüde Filistiarü bonungrü kinga lungshihpü Thrünpuh nüsa müngüh yüdo.”

¹⁶Thrünpuhnü api ki thiyukhüm jihkhi nangde Davidnü rhimo, tüsho arünü Filistiarü bonungrü Gibeon chingnü Gezer khiungde yankhit.

¹⁷David mungthukhi lomi alala ching yü tüsho trükshih alala kheak Thrünpuhnü api treshihpü handarü.