Read Yimchungru Naga 1 Kiuthsü 15 Bible Online

1 Kiuthsü 15 - Yimchungru Naga bible

1 Kiuthsü 15

¹Davidnü anihbuh thsungkheak David kiuto ching thüyambo thsü, tüsho apinü Thrünpuh sangdan zopung thsakham tüsho ju thsungkheak khimyam khülang thsü.

²Judüki shenü she mushuh tüshe Levirünü Thrünpuh sangdan shuhbah de Davidnü thiyukhüm jih, tümüde ATUNGPUH sangdan shuhpü tüsho lünnü api tankihpü ATUNGPUHNÜ arü mokhit.

³ATUNGPUH sangdan shuhde aturü apinü athsakhamkhi azopung ching zopü thsüde Davidnü Israel alala Jirusalem ching bemukhung.

⁴Judüki Davidnü Aron tüsho Levi tsühsoniusobo bemukhung:

⁵Kohath tsührübo, abebuh Uriel lung api buhtsührü 120;

⁶Merari tsührübo, abebuh Asaia lung api buhtsührü 220;

⁷Gershon tsührübo, abebuh Joel lung api buhtsührü 130;

⁸Elizaphan tsührübo, abebuh Shemaia lung api buhtsührü 200;

⁹Hebron tsührübo, abebuh Eliel lung api buhtsührü 80;

¹⁰Uzziel tsührübo, abebuh Amminadab lung api buhtsührü 112.

¹¹Davidnü amükeamrübo Zadok tüsho Abiathar, tüsho Levirübo Uriel, Asaia, Joel, Shemaia, Eliel tüsho Amminadab ji.

¹²Apinü arü ki tha, “Nüsa Levirü yamkhünbo ching akubo ah; nüsa le nüsa buhtsührübo tsangkhitang, junangde nüsanü Israel Thrünpuh, ATUNGPUH sangdan lubah inü athsakhamkhi ching atubah.

¹³Akhuhbe ching nüsanü mühankhinü ATUNGPUH isa Thrünpuhnü isa azhihde bukakhiuk tümütüsho isanü api ki düshihde arhimopü mükeokhi.”

¹⁴Jumonü amükeamrübo tüsho Levirünü Israel Thrünpuh, ATUNGPUH sangdan shuhde atupü thsüde arübo tsangkhit.

¹⁵Tüsho Mosanü thiyukhüm jihkhi ATUNGPUH yu yande Levirünü Thrünpuh sangdan ju sangkhrihbo yukbah arü dubuh kheaknü shuh.

¹⁶Kheaküshe Davidnü Levirü aberübo ki bingshang, bingkhung tüsho larüpbo bede asühkhi düsheak achangnü khün thsüshihpü arü buhtsührü mokhitpü thiyukhüm jih.

¹⁷Jumonü Levirünü Joel tsührü Heman yüzahshih; tüsho api buhtsührü Berekia tsührü Asaph; tüsho Merari tsührübo, arü buhtsührü, Kushaia tsührü Ethan;

¹⁸tüsho arü lung arü buhtsührü khuh mahnepü, Zekaria, Jaaziel, Shemiramoth, Jehiel, Unni, Eliab, Benaia, Maaseia, Mattithia, Eliphelehu, tüsho Mikneia, tüsho aheangrübo Obed-edom le Jeiel.

¹⁹Khün thsürübo Heman, Asaph, tüsho Ethan arünü müwayinchi larüpbo king;

²⁰Zekaria, Aziel, Shemiramoth, Jeliel, Unni, Eliab, Maaseia, tüsho Benaia arünü khünru yande bingshangbo khung;

²¹tüshe Mattithia, Eliphelehu, Mikneia, Obed-edom, Jeiel, tüsho Azazia arünü püpü khünru yande bingkhungbo shuhbah be.

²²Levirü khün thobuh Kenanianü khün tho, tümüde api ju khün thsüsorü lakheah.

²³Berekia tüsho Elkana ane sangdan ripit aheangrü thsü.

²⁴Shebania, Joshaphat, Nethanel, Amasai, Zekaria, Benaia, tüsho Eliezer, amükeamrübonü Thrünpuh sangdan müngüh hulipungpungbo müt. Obed-edom tüsho Jehia ane she sangdan ripit aheangrü thsü.

²⁵Jumonü David le Israel azothsürübo tüsho chithürübo wühkenorübonü Obed-edom yam chingnü ATUNGPUH tangzüng sangdan shuh-a lupü asühachihde wutu.

²⁶Tümütüsho Thrünpuhnü ATUNGPUH sangdan shuhrü Levirü rungmonü arünü moshi 7 tüsho namfimihnupung 7 laksah-a kingaün.

²⁷David a shulünkhim athünak atsüdakbe phuyu, sangdan shuhpü Levirü alala, tüsho khün thsürü, khün thobuh Kenania arü she ju ruk yih, tüsho David a khimthünak phuyu;

²⁸jumonü Israel alalanü ATUNGPUH tangzüng sangdan ju zhide, shihjuh, hulipungpungbo, larüpbo, tüsho bingshangbo le bingkhungbo khungde shuhbah atu.

²⁹ATUNGPUH tangzüng sangdan David kiuto ching azahchoki, Saul tsührübe Mikalnü ayinripit chingnü abinkhita kheah, tüsho David kiulongthsüpuh jukde tüsho tsünde ngü; tüsho alibenü anihbe mulong chingnü api mükhemürang.